ဘၣ်သ့ၣ်သ့ၣ် နကစးထီၣ်နတၢ်လဲၤလၢ ကီၢ်အမဲရကၤမုၢ်နုၥ်ကလံၤထံး(southwest United States), ဖဲဝ့ၢ်လၢ ဖၣ်ကမူၣ်အါတဝ့ၢ်, အမံၤလၢ “ဝ့ၢ်ဘၣ်မနုၤအဃိ(Why)” ဖဲကီၢ်စဲၣ်အရံၣ်စိနါ (Arizona) န့ၣ်လီၤ. နတၢ်လဲၤခီဂၥ်ကီၢ်အကျဲန့ၣ် ကလဲၤဖျိ “ဝ့ၢ်တလီၤတံၢ်လီဆဲး (Uncertain)” ဖဲကီၢ်စဲၣ်ထဲးစဲး(Texas) န့ၣ်လီၤ. ဆူမုၢ်ထီၣ်ကလံၤစိးန့ၣ်, နကအိၣ်ဘှံးအိၣ်သါ ဖဲ “ဝ့ၢ်တၢ်သးအုး(Dismal)” ဖဲကီၢ်စဲၣ်ထဲနစံၣ်(Tennessee) န့ၣ်လီၤ. လၢခံကတၢၢ် နကတုၤဃီၤဆူ နတၢ်လဲၤအကတၢၢ်လၢအမ့ၢ် “ဝ့ၢ်တၢ်ပျံၤတၢ်ဖုး(Panic)” ဖဲကီၢ်စဲၣ်ဖဲၣ်စၢၣ်ဘ့နံယၤ(Pennsylvania)လီၤ. တၢ်လဲၤအံၤ ဘၣ်တဘၣ် တမ့ၢ်နကဃုထၢလဲၤ ဘၣ်ဆၣ်, မ့ၢ်တၢ်လီၢ်အနီၢ်ကီၢ်တဖၣ်လၢ အမဲရကၤအမဲၥ်ဖံးခိၣ်က့ၢ်ဂီၤအလိၤန့ၣ်လီၤ.
တဘျီတခီၣ် သးသမူအတၢ်လဲၤန့ၣ် မၤသးဒ်အံၤအသိး လီၤတံၢ်လီၤဆဲးလီၤ. ပနၢ်ပၢၢ်ဒီး သးကလၢၢ်ဘၣ်ညီညီ လၢၦၤအံၣ်စရ့လးဖိတဖၣ် အတၢ်အိၣ်မူအကီအခဲ လၢၦၢ်မုၢ်ကနၢအပူၤ (၅ မိၤ ၂:၇)န့ၣ်လီၤ. တၢ်အိၣ်မူန့ၣ် ကီခဲသ့ဝဲလီၤ. ဘၣ်ဆၣ် မ့ၢ်ပထံၣ် တၢ်မၤအသးသဃဲၤအဂုၤအဂၤတဖၣ် ကစီဒီဧါ. ပဒုးအိၣ်ထီၣ် ပတၢ်လဲၤအတၢ်တိၥ်ကျဲၤဒၣ်ပဝဲ, ဒီးဃၣ်ဒူချၢသးလၢ ယွၤအကျဲန့ၣ်လီၤ (၁:၄၂-၄၃). ဒ်ၦၤအံၣ်စရ့းလးဖိတဖၣ်အသိး, ပကဒူးကဒ့ၣ်တၢ်အါဘျီ ဘၣ်ဃးဒီးပတၢ်လိၣ်ဘၣ်တဖၣ် (၄ မိၤ ၁၄:၂)န့ၣ်လီၤ. ပတၢ်ကဒူးကဒ့ၣ်ကိးနံၤအပူၤ, ပသးဒ့ဒီ ယွၤအတၢ်တိၥ်တဖၣ် (:၁၁) န့ၣ်လီၤ. ၦၤအံၣ်စရ့လးဖိတဖၣ်အပူန့ၣ် ကမၤကဒီးအသး တဘျီဘၣ်တဘျီ လၢပပူၤစ့ၢ်ကီးလီၤ.
ယွၤစံးဂၢၢ်စံးကျၢၤဝဲလၢ ပမ့ၢ်ပိၥ်အကျဲန့ၣ်, အဝဲကအုၣ်ခီၣ်ၦၤ ဆူတၢ်လီၢ်လၢအဂ့ၤဒိၣ်တက့ၢ်န့ၢ် “ဝ့ၢ်တၢ်သးအုး”န့ၣ်လီၤ. အဝဲကကတဲၥ်ကတီၤန့ၢ်တၢ်ဒီး ပကအိၣ်ဒီးကယဲၢ်တၢ်လၢ ပလိၣ်ဘၣ်နီၢ်နီၢ်တဖၣ်န့ၣ်လီၤ (၅ မိၤ ၂:၇, ဖံး ၄:၁၉). နၥ်သက့န့ၣ်, ပသ့ၣ်ညါပၥ်စၢၤတၢ်အံၤ ထဲန့ၣ်ညါဒၣ်လဲၥ်, ပလီၤတိၢ်အါစုအါဘျီန့ၣ်လီၤ. အလီၢ်အိၣ် လၢ ပကပိၥ်ယွၤအတၢ်တိၥ်ကျဲၤန့ၣ်လီၤ.
ပမ့ၢ်နီၣ်သိလ့ၣ်ဆူညါ ၆ နၣ်ရံၣ်အယံာ်လၢ “ဝ့ၢ်တၢ်ပျံၤတၢ်ဖုး(Panic)”န့ၣ်, ပကတုၤဆူ တၢ်လီၢ်လၢတၢ်သ့ၣ်ညါအီၤ ဒ်“ဝ့ၢ်တၢ်စံးပၥ်ဂၢၢ်ကျၢၤ(Assurance)” ဖဲကီၢ်စဲၣ်ဘၢ်ကၠံနံယၤမုၢ်နုၥ်(West Virginia)တကပၤန့ၣ်လီၤ. ပမ့ၢ်ပျဲယွၤ နဲၣ်ပကျဲန့ၣ် (စံး ၁၁၉:၃၅) ပကလဲၤတၢ်လၢ တၢ်သးခု အပူၤ ဃုၥ်ဒီးကစၢ်ယွၤလၢ ၦၤနီၣ်တၢ်အလီၢ်န့ၣ်လီၤ. တၢ်အံၤမ့ၢ်တၢ်စံးပၥ်ဂၢၢ်ကျၢၤလၢ အဘၣ်ဆိၣ်ဂ့ၤသၦၢ်တၢၢ်လီၤ.
