အဲဘလ့ အမဲန့ၣ်ကၠၢၣ် တဲအီၤ, “ယကမၤဆံးလီၤစှၤလီၤ ဝဲၤကျိၤလၢ နအဲၣ်ဘၣ်အီၤန့ၣ် မ့ၢ်နသးထီၣ်ယၤအဖၢမုၢ်ဒံးလီၤဧါ”. လၢတၢ်အ့ၣ်တံၢ်အမဲအဖူၤ အဝဲစံးဆၢဝဲလၢ “တသးထီၣ်ဘၣ်” လီၤ. အသးဘၣ်တံၥ်တၥ်အ့န့ဒိၣ်မး မ့ၢ်လၢ တၢ်သံကွၢ်အီၤ ဒ်ၦၤဘၣ်ဆဲခွဲးအသိး အဃိလီၤ. အဝဲကျဲးစၢးမၤစၢၤတ့ၢ် ခီပနံၣ် ခီဖျိကကွဲန့ၢ်ကရူၢ်အဂၤတဖၣ် လၢအသးစဲအတၢ်မၤယ ဘၣ်ဆၣ် အတၢ်လီၢ်တၢ်ကျဲအံၣ်ဖိအံၤအဃိ တကဲထီၣ်
ဒ်အဝဲဆၢဝဲအသိးဘၣ်. အဝဲမၤသ့ထဲ အမဲၥ်ထံလီၤ ဘၣ်ဆၣ် အဝဲပၥ်လီၤအသးလၢ ကမၤဝဲ ဖဲအမဲန့ၣ်ကၠၢၣ်တဲအီၤလီၤ. ဒ်အဝဲမုၢ်လၢ်ဝဲအသိး အဝဲမၤတၢ်လဲလိၥ်တသ့ သ့ၣ်သ့ၣ်, ဘၣ်ဆၣ် ဒ်အဝဲမၤဝဲသ့အသိး မၤဝဲအဂ့ၤကတၢၢ်လီၤ. လၢစီၤပ့းတရူးအလံၥ်ပရၢတၢတဘ့ၣ်အပူၤန့ၣ် အဝဲဟ့ၣ်ဂံၢ်ဟ့ၣ်ဘါ ၦၤစူၢ်က့ၤနၥ်က့ၤခရံၥ်လၢ အဆိကတၢၢ် တဖၣ်အံၤ ဒ်သိးကပၥ်လီၤအသးလၢ “ကယဲၢ်ၦၤကညီ အတၢ်စံၣ်ညီၣ်အဖီလၥ်” လီၤ (၁ ပ့း ၂:၁၃). နကဟံးဃၥ် နတၢ်သူၣ်တီသးရၤလၢ တၢ်မၤအကီအခဲအကတီၢ်န့ၣ် တညီဝဲဘၣ်. ဘၣ်ဆၣ် စီၤပ့းတရူးစံးလၢ ယကမၤတၢ်အဂ့ၤထီဘိလီၤ. “မ်သုအိၣ်ဒီး သုတကဲၥ်ပဝးဂ့ၤလၢ ၦၤကလုၥ်တဖၣ်အကျါ, ဒ်သိးၦၤလၢအစံးအၢသု ဒ်ၦၤမၤ တၢ်အၢတၢ်သီန့ၣ် တုးအကွံၥ်သုမၤတၢ်ဂ့ၤ ဒီးကစံးထီၣ်ပတြၢၤယွၤ ဖဲတၢ်အိၣ်သကိး အမုၢ်နံၤန့ၣ်တက့ၢ်” (:၁၂). အါန့ၢ်အန့ၣ် တၢ်အံၤ မၤစၢၤၦၤလၢပကဒုးနဲၣ် ပဒိတဲၥ်လၢအဲၣ်ယွၤပျံၤယွၤ ဆူ ၦၤစူၢ်နၥ်တၢ်အံၤတဖၣ်လီၤ.
ပမ့ၢ်အိၣ်ဘၣ်ဖဲ တၢ်မၤလီၢ်လၢ ၦၤမၤနါစိၦၤန့ၣ်, ပမ့ၢ်ဟးထီၣ်ကွံၥ်န့ၣ် ကဂ့ၤဝဲလီၤ (၁ ကရံၣ် ၇:၂၁). ဘၣ်ဆၣ် ဖဲခိၣ်ဃၢၤလၢ ဟ့ၣ်ၦၤတၢ်ဘံၣ်တၢ်ဘၢန့ၣ် ဂ့ၤပမၤထွဲ ပတၢ်မၤန့ၣ် ခီဖျိ သးမုၥ်စီဆှံအတၢ်မၤစၢၤၦၤ ဒီးသ့ၣ်နီၣ်ထီၣ် “အိၣ်ဒီး အဘျုးလၢ ယွၤအမဲၥ်ညါလီၤ” (၁ ပ့း ၂:၂၀). ဖဲပစူၢ်တၢ်စိတၢ်ကမီၤန့ၣ် ပအိၣ်ဒီးတၢ်ခွဲး တၢ်ယၥ်လၢ ပကဒုးနဲၣ်ၦၤဂၤလၢ ပပိၥ်ယွၤအခံဒီး မၤလၤကပီၤအီၤလီၤ.