နါစံၣ်ကၢးစတၣ်စၢၣ်‚ ပှၤအိၣ်ဘှံးလၢတၢ်သး၀ံၣ် အီၣ်ပရၠာစးၣ် (တၢ်သး၀ံၣ်ဟူးဂဲၤလၢ အပာ် ဖျါထီၣ်တၢ်ဃဲၤ) တဂၤ‚ အသးဘၣ်ဒိဖဲအလဲၤဟးအိၣ်သကိး အမိၢ်ဒီးသ့ၣ်ညါဘၣ်လၢ မိၢ်အံၤ မၤန့ၢ်ခိၣ်နူာ်ဘၣ်ဒိတၢ်ဆါန့ၣ်လီၤႉ မိၢ်အံၤတသ့ၣ်ညါက့ၤဒၣ်လဲာ် ဖိမုၣ်အံၤဒီး တကတိၤတၢ်နီတမံၤစ့ၢ်ကီးလီၤႉ ဖဲအလဲၤဟးအိၣ်သကိးကိးလါ၀ံၤအလီၢ်ခံ‚ နါစံၣ်အိၣ်ဒီး တၢ်ဆိကမိၣ်တခါလီၤႉ အ၀ဲစးထီၣ်သး၀ံၣ်န့ၢ်တၢ်ဆူအမိၢ်အအိၣ်လီၤႉ မိၢ်အံၤအမဲာ်ချံကပီၤထီၣ် ဖဲတၢ်သံကျံအကလုၢ်သီၣ်ထီၣ် ဒီးစးထီၣ်သး၀ံၣ်စ့ၢ်ကီး တၢ်လၢ မံးနံး ၂၀ န့ၣ်လီၤႉ ၀ံၤအလီၢ်ခံ‚ နါစံၣ်အမိၢ်စးထီၣ်နံၤသီၣ်ထီၣ် ဒီးကတိၤနံၤ တၢ်လၢ‚ တၢ်အံၤ မ့ၢ် ‘‘ကၢးစတၣ်စၢၣ်ပှၤသး၀ံၣ်တၢ်ဖိတဖၣ်’’လီၤႉ တၢ်လီၤကမၢကမၣ်ဒိၣ်ဒိၣ်အါအါ ဟ့ၣ် ကူၣ်တၢ်လၢအဘၣ်ထွဲဒီး တၢ်သံကျံအစိကမီၤ‚ ဒ်ပှၤယါဘျါတၢ်လၢ သးတကပၤ မၤ၀ဲ အသိး‚ ဒ်သိးဒုးသ့ၣ်နီၣ်ထီၣ်က့ၤတၢ်လၢ တၢ်လီၤမၢ်တၢ်ကသ့ၣ်နီၣ်ထီၣ်က့ၤတၢ်တဖၣ် န့ၣ်လီၤႉ သး၀ံၣ် ‘တၢ်သး၀ံၣ်လီၢ်လံၤလၢအမံၤဟူသၣ်ဖျါတဖၣ်’ မ့ၢ်တၢ်လၢအဘၣ်ဖျါ ထီၣ် တၢ်လၢအမၤလီၤကဆှၣ်တၢ်သးဟးဂီၤ‚ မၤစှၤလီၤတၢ်သးပ့ၤနီၣ်တၢ်‚ မၤဆံးလီၤ စှၤလီၤတၢ်ဘၣ်လဲၤဆူ ဂ့ၢ်ဂီၤအူတၢ်ယါဘျါတၢ်ဆါအဒၢးဒီးမၤစှၤလီၤစ့ၢ်ကီး တၢ်ဘၣ်စူးကါကသံၣ်မၤဂၢၢ်ပှၤသးတဖၣ်န့ၣ်လီၤႉ
တၢ်ဃိထံအါမးအံၤစးထီၣ်သးလၢ တၢ်သ့ၣ်နီၣ်ထီၣ်က့ၤ တၢ်သူၣ်၀ံၣ်သးဆၢ န့ၣ်လီၤႉ ဒ်လံာ်စီဆှံပာ်ဖျါ၀ဲအသိး‚ တၢ်သးခုလၢအဟဲလၢတၢ်သူၣ်၀ံၣ်သးဆၢအံၤ မ့ၢ်တၢ်ဟ့ၣ်တမံၤလၢယွၤဒီး တၢ်အံၤမ့ၢ်တၢ်နီၢ်နီၢ်န့ၣ်လီၤႉ ‘‘စံးထီၣ်ပ့တၢၤယွၤတက့ၢ်ႉ အဂ့ၢ်ဒ်အံၤ‚ သး၀ံၣ်ပကစၢ်န့ၣ် မ့ၢ်အဂ့ၤလီၤႉ မ့ၢ်အမုာ်၀ဲအဂ့ၢ်လီၤႉ တၢ်စံးထီၣ်ပ့တၢၤ ယွၤန့ၣ် မ့ၢ်အဂ့ၤအဘၣ်လီၤ’’ (စံး ၁၄၇း၁) ႉ
လၢလံာ်စီဆှံအဆၢအါမးအပူၤ‚ ကစၢ်ယွၤအပှၤဂီၢ်မုၢ်တဖၣ် ဘၣ်တၢ်ဟ့ၣ်ဂံၢ် ဟ့ၣ်ဘါအ၀ဲသ့ၣ်လၢ ကသး၀ံၣ်စံးထီၣ်ပ့တၢၤဆူကစၢ်ယွၤအအိၣ်န့ၣ်လီၤႉ ‘သး၀ံၣ်ထီၣ် ယွၤတက့ၢ်ႉ အဂ့ၢ်ဒ်အံၤ‚ မၤ၀ဲလၢတၢ်ထီၣ်ထီလီၤ’ (ယ့ှှါ ၁၂း၅) ႉ ‘‘ဒီးပာ်တၢ်သး၀ံၣ် အသီလၢယထးခိၣ်‚ တၢ်စံးထီၣ်ပ့တၢၤကစၢ်လီၤႉ ပှၤအါဂၤ ကထံၣ်ဘၣ်၀ဲဒီး ကပျံၤတၢ်‚ ဒီးကသန့ၤအသးလၢယွၤလီၤ’’ (စံး ၄၀း၃) ႉ ဒ်ပတၢ်သး၀ံၣ်ဟ့ၣ်ဆူၣ်ထီၣ်က့ၤပသးအသိး‚ ကဲထီၣ်စ့ၢ်ကီး တၢ်သူၣ်ဆူၣ်သးဆူၣ်လၢ ပှၤလၢအနၢ်ဟူတၢ်အံၤန့ၣ်လီၤႉ မ်ပ၀ဲကိးဂၤ ပကသ့ၣ်နီၣ်ထီၣ်ပကစၢ်ယွၤန့ၣ် မ့ၢ်ယွၤလၢအဒိၣ်၀ဲမုၢ်၀ဲ့ကၢး၀ဲဘၣ်၀ဲလၢ ပကစံးထီၣ် ပ့တၢၤအီၤန့ၣ်လီၤႉ