ပှၤမၤတၢ်ဖိတဖုဘူးတဲာ်ထံလီၤသကာ်ကိၢ်လိၣ်လၢကမါတဖျၢၣ် လၢအပှဲၤဒီး ထံလီၤသကၤ ဒီးပာ်ဖှိၣ်ထီၣ်၀ဲလၢ ထံလီၤသကၤဟံၣ်ပူၤန့ၣ်လီၤႉ ဖဲန့ၣ်အကတီၢ် လၢအ၀ဲသ့ၣ် အကျါပှၤမၤတၢ်ဖိတဂၤ‚ သ့ၣ်ညါဘၣ်လၢအနၣ်ရၠာစးံၣ်ဟါမၢ်ကွံာ်လၢ ထံလီၤသကၤ တၢ်သူၣ်ထီၣ်အပူၤ‚ လၢအတအိၣ်ဒီး့တဲၤဖိနီတဘ့ၣ်န့ၣ်လီၤႉ အ၀ဲ ဒီးအတံၤသကိးတဖၣ် ဃုထံၣ်တၢ်အံၤသပှၢ်ပှၢ်‚ ဘၣ်ဆၣ် တၢ်ဆၢကတီၢ်လၢာ်ကွံာ် ကလီကလီန့ၣ်လီၤႉ
ဖဲအ၀ဲသ့ၣ်ဆိကတီၢ်ကွံာ်အသးအခါ ပိာ်ခွါဖိတဂၤလၢအထံၣ်အ၀ဲသ့ၣ် ဟးထီၣ်အံၤ‚ လဲၤနုာ်ဆူ တၢ်သူၣ်ထီၣ်အပူၤန့ၣ်လီၤႉ တယံာ်‚ အ၀ဲဟဲက့ၤ ဟးထီၣ် ဃုာ်ဒီးနၣ်ရၠာစးံၣ် လၢအဖီၣ်၀ဲလၢအစုန့ၣ်လီၤႉ ဖဲအ၀ဲသ့ၣ်သံကွၢ်အီၤ လၢမ့ၢ်အထံၣ်က့ၤ နၣ်ရၠာစးံၣ်အံၤဒ်လဲၣ်‚ ဒီးအ၀ဲစံးဆၢက့ၤတၢ်လၢ ‘ယဆ့ၣ်နီၤအိၣ်ဃိကလာ် ဒီးတယံာ် ယနၢ်ဟူဘၣ် နၣ်ရၠာစးံၣ် အလဲၤတၢ်အသီၣ်လီၤ’ႉ
လံာ်စီဆှံစံးဘၣ်တဲဘၣ်တၢ်ဂ့ၢ်အါမးလၢ အဘၣ်ထွဲဒီး တၢ်လုၢ်တၢ်ပရၤလၢ အအိၣ်လၢ တၢ်အိၣ်ဃိကလာ်န့ၣ်လီၤႉ ဒီးလၢတၢ်ကမၢကမၣ်အလီၢ်တအိၣ်‚ တဘျီဘျီ ကစၢ်ယွၤကတိၤကသွံတၢ်လၢ ကလုၢ်ဖိနဲကဲၣ်တခါ (၁ စီၤ ၁၉း၁၂) န့ၣ်လီၤႉ လၢသးသမူလၢအပှဲၤဒီးတၢ်ဖံးအါမၤအါအပူၤ‚ တၢ်အံၤ ကီခဲလၢတၢ်ကနၢ်ဟူကစၢ်ကလုၢ် န့ၣ်လီၤႉ ဘၣ်ဆၣ်‚ ပမ့ၢ်ဆိကတီၢ်တၢ်ဂုာ်ဖံးဂုာ်မၤတၢ် ဒီးစူးကါတၢ်ဆၢကတီၢ်ဘရၣ်ဘှီၣ်တနီၤ ဃုာ်ဒီးအီၤဒီးအကလုၢ်ကထါ‚ ပကနၢ်ဟူအ၀ဲအကလုၢ်ကပုာ်လုးဖိလၢ ပတၢ် ဆိကမိၣ်တဖၣ်အပူၤန့ၣ်လီၤႉ
ထါစံးထီၣ်ပ့တၢၤ ၃၇း၁-၇ မၤလီၤတံၢ်ပှၤလၢပနာ်န့ၢ်ယွၤသ့၀ဲဆူတၢ်ကမၤပူၤဖျဲးပှၤလၢ ‘ပှၤအၢဖိတဖၣ်အတၢ်ကူၣ်’‚ ဟ့ၣ်ပှၤတၢ်အိၣ်တဒၢအလီၢ် ဒီးမၤစၢၤပှၤဆူ တၢ်ကအိၣ်ဒီး တၢ်ကလုၢ်တီလီၤႉ ဘၣ်ဆၣ်‚ ပမၤတၢ်အံၤ ကသ့၀ဲ ဖဲလၢတၢ်တၢထီၣ်တၢလီၤတဖၣ်လၢအအိၣ်၀းတရၠာစးံးလၢပဃၢၤန့ၣ်ဒ်လဲၣ်ႉ
အဆၢဖိ ၇ ဟ့ၣ်ကူၣ်ပှၤလၢ ပကဘၣ် ‘အိၣ်ဘှီၣ်ကလာ်လၢယွၤအပူၤ ဒီး ကွၢ်လၢ်ယွၤအကျဲ’ န့ၣ်လီၤႉ ပစးထီၣ်အီၤသ့ ခီဖျိတၢ်မၤလိန့ၢ်တၢ်လၢ တၢ်အိၣ်ဃိ ကလာ်လၢ စှၤမံးနံး ဖဲပဃ့ထုကဖၣ်၀ံၤန့ၣ်လီၤႉ မ့တမ့ၢ် ခီဖျိတၢ်ဖးလံာ်စီဆှံ ဘရၣ်ဘရၣ် ဘှီၣ်ဘှီၣ် ဒီးပျဲယွၤအကလုၢ်ကထါနုာ်လီၤဆူ ပသးကံၢ်ပူၤသ့၀ဲလီၤႉ ၀ံၤ‚ အလီၢ်ခံ‚ ဘၣ်တဘၣ် နကနၢ်ဟူ အ၀ဲအတၢ်ကူၣ်သ့ အတၢ်ကတိၤဆူနအိၣ်‚ ကစုဒုဒီး ဂၢၢ်ဂၢၢ် ဒ်နၣ်ရၠာစးံၣ်တဖျၢၣ်လဲၤတၢ်အသီၣ်အသိးန့ၣ်လီၤႉ