ဖဲပအီၣ်ခရၠာစးံာ်အိၣ်ဖျဲၣ်ဟါတၢ်အီၣ်၀ံၤ‚ ယဒဲၣ်မုၣ်အဲနၣ် ပာ်လီၤန့ၣ်ပှၤဒဲယိၣ်လီၤႉ တၢ်အဆၢထံကိၢ်ကိၢ်သွဲသွဲ ဃုာ်ဒီးကိၣ်အဖျၢၣ်ပံာ်ပံာ်‚ အလွဲၢ်အကလုာ်ကလုာ် ထီၣ်ဖီလၢ တၢ်အထံအဖီခိၣ်‚ ဒီးတၢ်အံၤမ့ၢ် ပှၤတ့ှူးဖိအကိၣ်လၢအဘၣ်တၢ်အီၣ်အီၤ ဖဲတၢ်ခုၣ် အလါစိစတံးမူး‚ လၢအဟဲအိၣ်ထီၣ်ညီနုၢ် ဖဲခရၠာစးံးစမၢးစ်အလါန့ၣ်လီၤႉ ဖံးတ်‚ လၢအမ့ၢ်အ၀ဲအဖိခွါဖိလၢအအိၣ်သၢနံၣ်တဂၤ‚ လၢတၢ်ပာ်ကဖၢလၢအသးပူၤ နဲၣ်တၢ်ဆူကိၣ်အံၤ ဒီးတဲထီၣ်၀ဲလၢ‚ ‘‘ယမၤတၢ်အံၤ ဒီးတၢ်အဖျၢၣ် အ၀ဲန့ၣ်’’ လီၤႉ ယနံၤခူသူၣ်လၢယသးပူၤ‚ ဖဲလၢဖံးထ် မၤကဲထီၣ်ကိၣ်အဖျၢၣ်ဖိတဖၣ် လၢတၢ် အက့ၢ်အဂီၤလီၤဆီ ဒီးက့ၢ်ဂီၤမ့ၢ်တအိၣ်ဖျၢၣ်ဖျၢၣ်ဘၣ်ဆၣ်‚ အ၀ဲပာ်တၢ်တဖၣ်အံၤ ဒ်အ၀ဲအတၢ်စုသ့ အတၢ်မၤလၢအဂ့ၤကတၢၢ်တဖၣ်အသိးန့ၣ်လီၤႉ
တၢ်အံၤ ဒုးဆိကမိၣ်ထီၣ်ယၤလၢ ကစၢ်ယွၤထံၣ်ပ၀ဲတဖၣ် ဒ်လဲၣ်န့ၣ်လီၤႉ ဖဲအ၀ဲတ့လီၤ ပှၤကူပှၤကညီလၢ အစုတၢ်ဘၣ်သ့ အလီၤဘီလီၤမုၢ် လၢခံကတၢၢ်‚ အ၀ဲ ‘ထံၣ်တၢ်လၢအတ့လီၤ၀ဲတမံၤလၢ်လၢ် မ့ၢ်တၢ်လၢအဂ့ၤ၀ဲ (၁ မိၤ ၁း၃၁) လီၤႉ ဖဲလၢ ပှၤကူပှၤကညီတဖၣ် ဖဲတၢ်မၤသး၀ံၤအလီၢ်ခံ ကဲထီၣ်ပှၤလၢ အမၤတၢ်ဒဲးဘးဒၣ်လဲာ်‚ ပှၤကွဲးထါစံးပ့တၢၤ ပာ်ပနီၣ်လၢ‚ ပမ့ၢ်ပှၤလၢ ‘‘တၢ်တ့လီၤ (ယၤ) အိၣ်ဒီးပျံၤတၢ်အလီၢ် ဒီးကမၢကမၣ်တၢ်အလီၢ်’’ (စံး ၁၃၉း၁၄) ႉ ပမ့ၢ်ကဒီးဒံး ကစၢ်ယွၤအဒွဲလၤကူၣ်သ့ လၢအတ့လီၤ၀ဲအဂ့ၤကတၢၢ်တဖၣ်‚ ဖဲလၢပမ့ၢ်အိၣ်လၢ တၢ်ဒဲးဘး လၢအတမုာ်တလၤ အပူၤဒၣ်လဲာ်န့ၣ်လီၤႉ ဒီးကစၢ်ယွၤ တပာ်တ့ၢ်ကွံာ် ပှၤလၢတၢ်ဒဲးဘးအပူၤန့ၣ်ဘၣ်ႉ အ၀ဲပရၤက့ၤပှၤ‚ လၢခရၠာစးံာ်အပူၤ ဆူတၢ်ကကဲထီၣ် အတၢ်မၤလၢ အတ့လီၤ၀ဲလၢ (ဘၣ်ဘျိးဘၣ်ဒါ လၢတၢ်ကမၤတၢ်ဂ့ၤ ဆူအ၀ဲအလၤကပီၤအဂီၢ် (အ့း ၂း၁၀) န့ၣ်လီၤႉ
တဘျီဘျီ‚ ယသးပ့ၤနီၣ်ဘၣ်တၢ်လၢတမ့ၢ်ထဲလၢ ယဘၣ်တၢ်တ့လီၤယၤ လီၤအဲၣ်လီၤကွံ‚ မ့မ့ၢ် ယဘၣ်တၢ်တ့ကဒီးယၤလၢ လီၤအဲၣ်လီၤကွံ လၢခရၠာစးံာ်အပူၤ စ့ၢ်ကီးန့ၣ်လီၤႉ လၢတၢ်သးပ့ၤနီၣ်ဘၣ် တၢ်မ့ၢ်တၢ်တီတဖၣ်အပူၤ‚ ယဂုာ်ကျဲးစၢး ဟူးဂဲၤ ဃုာ်ဒီး တၢ်သးကညီၤလီၤက့ၤဘၣ်ယသးန့ၣ်လီၤႉ မ့မ့ၢ်နၤတခီလဲၣ်ႉ ဖဲယကွၢ် ယလံၤ ခွါဖိအတၢ်သးခုလၢအကိၣ်ဖျၢၣ်အက့ၢ်အဂီၤ လၢအလီၤနံၤတဖၣ်‚ ယသ့ၣ်နီၣ်ထီၣ်က့ၤလၢ‚ ပ့ကၢးတၢ်မၤက့ၤတ့က့ၤပှၤဆူ တၢ်ကအိၣ်ဒီးက့ၢ်ဂီၤ ဒ်ယွၤ ထံၣ်ပှၤဒ်လဲၣ် အသိး ပမ့ၢ်အ၀ဲအဒွဲလၤကူၣ်သ့ လၢအတ့လီၤ၀ဲ အဂ့ၤကတၢၢ် လၢအအဲၣ်ဘၣ်၀ဲ‚ လၢအဘၣ်တၢ်ပရၤက့ၤ လၢခရၠာစးံာ်န့ၣ်လီၤႉ လၢတၢ်အံၤအဃိ‚ မ်ပကမူသကိး တၢ်မူလၢ အပှဲၤဒီးတၢ်သးခု ဒ်ကစၢ်ယွၤအတၢ်မၤလၢအတ့လီၤ၀ဲအသိးန့ၣ်တက့ၢ်ႉ