မ့ၢ်နကဃုထၢ ဒ်သိး- ကလိာ်ကွဲလၢ ကီၢ်စွံးစလဲန်အမူခိၣ်ဖီအဖီခိၣ်ဧါ‚ မ့တမ့ၢ် ကမၤ ပူၤဖျဲး ဖိသၣ်တဖၣ်လၢတၢ်လီၤဘၣ်ယိၣ်လၢ ဖရၠာစးးန့ၣ်ဧါႉ မ့ၢ် ပှၤပတီၢ်မုၢ်ဖိ နံၣ်ခိလၢးစ် ၀့န်ထၢၣ် ဃုထၢ ဒ်သိးကလဲၤဆူဖရၠာစးး န့ၣ်လီၤႉ ဖဲ ၁၉၃၈ နံၣ်‚တၢ်ဒုး ကကဲထီၣ်လၢ ခၠဲးကိၣ်စလိၣ်ဘဲးကံယါ ဒီး ကၠၤမန့ၢ် အဘၢၣ်စၢၤန့ၣ်လီၤႉ ဖဲနံၣ်ခိလၢးစ် လဲၤဟးအိၣ်သကိး ပှၤဘၣ်ကီဘၣ်ခဲအဒဲက၀ီၤတဖၣ်လၢ ဖရၠာစးး‚ ဖဲပှၤယူဒၤ၀့ၢ်ဖိတဖၣ် အိၣ်ဘၣ်လၢ တၢ်လီၤ ပျံၤလီၤဖုးတၢ်အိၣ်သးတဖၣ်န့ၣ် အ၀ဲကလၢၢ်ဘၣ်တၢ်လၢ တၢ်တိာ်လၢ ကမၤစၢၤတၢ်အဂီၢ်န့ၣ်လီၤႉ အ၀ဲဃုကျိၣ်စ့ ဒ်သိးကစိာ်ဆှၢဖိသၣ်လၢ အကယၤတဖၣ်အကယၤ ဘံၣ်ဘံၣ်ဘၢဘၢလၢ ဖရၠာစးး ဆူ ကီၢ်အဲးကလံး လၢတၢ်ကဟုကယာ်အဂီၢ်လၢ ပှၤအဲကလံးဖိ အဒူၣ်အထၢတဖၣ်န့ၣ်လီၤႉ မ့ၢ်တၢ်ဆၢကတီၢ်ဖဲ တချုးဟီၣ်ခိၣ်ဒီဘ့ၣ် တၢ်ဒုးခံဘျီတဘျီစးထီၣ်သးန့ၣ်လီၤႉ
အ၀ဲအတၢ်ဟူးတၢ်ဂဲၤတဖၣ်‚ ကဲထီၣ်တၢ်အဒိအတဲာ်လၢ ပှၤလၢအဘၣ် တၢ်ကိးအီၤလၢ ထါစံးထီၣ်ပ့တၢၤ ‘စံၣ်ညီၣ်န့ၢ် ပှၤဖှီၣ်ဖိယာ်ဖိဒီး ပှၤဖိၣ်ဃဲႉႉႉ’’ (၈၂း၃) န့ၣ်လီၤႉႉ စီၤအၤစာ်လၢ အမ့ၢ်ပှၤကွဲးထါစံးထီၣ်ပ့တၢၤအံၤ‚ သးအိၣ်မၤဟုးထီၣ်ဂဲၤထီၣ် အပှၤဂီၢ်မုၢ် ဒ်သိးကကဲထီၣ် ပှၤစဲၣ်နီၤလၢ ပှၤလၢအလိၣ်ဘၣ် တၢ်မၤစၢၤ ‘မၤပူၤမၤဖျဲး ပှၤဘၣ်နးဘၣ်ဖှီၣ်ဒီး ပှၤဖှီၣ်ဖိယာ်ဖိ‚ မၤထူၣ်ဖျဲးအီၤလၢ ပှၤတတီၤတလိၤ အစုပူၤန့ၣ် တက့ၢ်’’ (း၄) ႉ ဒ်ဖိသၣ်တဖၣ်လၢ နံၣ်ခိလၢးစ် မၤပူၤဖျဲးလၢ တၢ်တလီၤဘှံးလီၤတီၤအပူၤအသိး‚ ပှၤကွဲးထါစံးထီၣ်ပ့တၢၤ ကတိၤန့ၢ်တၢ်လၢ ပှၤလၢအကတိၤ ထူၣ်ဖျဲးတၢ်လၢ အကစၢ်ဒၣ်၀ဲတန့ၢ်၀ဲတဖၣ်အဂီၢ် – ပှၤဖှီၣ်ဖိယာ်ဖိ ဒီး ပှၤမုၣ်ကမဲလၢ အလိၣ်ဘၣ် တၢ်တီတၢ့်ကၢးဒီး တၢ်ဘံၣ်တၢ်ဘၢန့ၣ်လီၤႉ
တနံၤအံၤ‚ ဖဲပကွၢ်တၢ်ဆူတၢ်လီၢ်ကိးပူၤန့ၣ် ပထံၣ်ဘၣ် ပှၤကူပှၤကညီတဖၣ် အိၣ်လၢ တၢ်လိၣ်ဘၣ်တၢ်မၤစၢၤအပူၤ‚ လၢအဟဲခီဖျိသးလၢတၢ်ဒုးတၢ်ယၤ‚ ကလံၤမုၢ် ဒီး တၢ်ကီတၢ်ခဲအဂုၤအဂၤတဖၣ်န့ၣ်လီၤႉ ဖဲလၢ ပမ့ၢ်မၤဘၣ်လိာ်တၢ်ဂ့ၢ်ကီကိးမံၤ မ့ၢ်တသ့၀ဲဘၣ်ဆၣ်‚ ပဆိကမိၣ်ထီၣ် တၢ်အံၤလၢ တၢ်ထုကဖၣ်လၢပမၤအီၤသ့ဆူ တၢ်ကမၤတၢ်လၢတၢ်အိၣ်သးတဖၣ် လၢကစၢ်ယွၤဟဲစိာ်အီၤဆူ ပတၢ်အိၣ်မူအပူၤ န့ၣ်လီၤႉ