ယတၢ်သးထီၣ်ဟဲအိၣ်ထီၣ် ဖဲပိာ်မုၣ်တဂၤ မၤယၤတဘၣ်အပူၤ အ၀ဲဒၣ် ပာ်ကမၣ်ယၤဒီး သီၣ်၀ံသဲကလၤယၤန့ၣ်လီၤႉ ယအဲၣ်ဒိးလၢ ပှၤကိးဂၤကသ့ၣ်ညါလၢ အ၀ဲမၤကမၣ်ယၤ‚ အဲၣ်ဒိးလၢ အ၀ဲကတူၢ်ဘၣ်တၢ် ဒ်ယတူၢ်ဘၣ်တၢ်လၢအအၢအသိးန့ၣ်လီၤႉ ယသး သဘံၣ်ဘုၣ်ထီၣ်ဒီး တၢ်သူၣ်ဒိၣ်သးဖျိး တုၤဒၣ်လဲာ်လၢ ယခိၣ်ဆါထီၣ်တစုန့ၣ်လီၤႉ ဘၣ်ဆၣ်‚ ဖဲယဃ့ထုကဖၣ်လၢ တၢ်လၢယတူၢ်ဘၣ်တၢ်ဆါအံၤကဘျါန့ၣ်ဒီး သးစီဆှံ ဒုးသ့ၣ်ညါယၤလၢ တၢ်ဂ့ၢ်တဖၣ်အံၤလီၤႉ ဖဲယသးအိၣ် ဟ့ၣ်ကၣ်တၢ်ကတီၢ်‚ မ့ၢ်ယဃ့ကညးလၢ ကစၢ်ယွၤကယါဘျါယၤသ့၀ဲဒ်လဲၣ်ႉ ဖဲလၢယမ့ၢ်နာ်လၢ အ၀ဲကဟုကယာ်ယၤအခါ‚ ဘၣ်မနုၤလၢ ယတနာ်ဘၣ်အီၤဆူ တၢ်ကဟံးဃာ်ပၢၤဃာ် တၢ်အိၣ်သးအံၤ န့ၣ်လဲၣ်ႉ ပသ့ၣ်ညါလၢ‚ တလီၢ်လီၢ်ပှၤလၢ အဘၣ်တၢ်မၤဆါအီၤတဖၣ်‚ မၤဆါကဒါက့ၤ ပှၤဂုၤပှၤဂၤန့ၣ်လီၤႉ ယဃ့ကညးကစၢ်ယွၤလၢ ကမၤစၢၤယၤလၢ တၢ်ကပျၢ်ကွံာ် ပိာ်မုၣ်အံၤ အတၢ်ကမၣ်ဒီး လဲၤကဒီးဆူညါလၢ တၢ်ဘၣ်လိာ်ဖိးဒ့လိာ်က့ၤအဂီၢ်န့ၣ်လီၤႉ
ပှၤကွဲးထါစံးထီၣ်ပ့တၢၤ စီၤဒၤ၀ံး သ့ၣ်ညါနၢ်ပၢၢ် တၢ်ကီတၢ်ခဲလၢတၢ်ကနာ်န့ၢ်ယွၤ ဖဲတၢ်ဘၣ်၀ံံသးစူၤတၢ်လၢ တၢ်တတီတ့တၢ်အကတီၢ်န့ၣ်လီၤႉ စီၤဒၤ၀ံးမၤတၢ်အဂ့ၤကတၢၢ် ဒ်သိးကမ့ၢ်တၢ်ခ့တၢ်ပှၤလၢ အလီၤအဲၣ်လီၤကွံတဂၤလီၤႉ ဘၣ်ဆၣ်‚ စီၤပၤစီၤစီလူးတခီ သးကါဘၣ်အီၤဒီး ဆၢမၤသံအီၤ (၁့ှှမူၤ ၂၄း၁-၂) လီၤႉ စီၤဒၤ၀ံး ဘၣ်တူၢ်ဘၣ်တၢ်ဖဲ ကစၢ်ယွၤမၤတၢ်ဒီး ကတဲာ်ကတီၤအီၤလၢ တၢ်ကဒိးန့ၢ် ဘၣ် လီၢ်ပစိာ်‚ ဘၣ်ဆၣ် အ၀ဲဃုထၢဒံးဒၣ် တၢ်ကမၤလၤကပီၤကစၢ်ယွၤလၢ ကဟ့ၣ် ကၣ်တၢ်အလီၢ် (း၃-၇) န့ၣ်လီၤႉ လၢအ၀ဲတခီ‚ မၤတၢ် ဒ်သိးကဘၣ်လိာ်က့ၤလၢ စီၤစီလူး ဒီးအးလီၤတၢ်အစၢလၢ ကဟဲအိၣ်ထီၣ်တဖၣ်လၢ ကစၢ်ယွၤအစုပူၤ (း၈-၂၂) လီၤႉ
ဖဲတၢ်အိၣ်သး မ့ၢ်ဖျါထီၣ်လၢ ပှၤအဂုၤအဂၤတဖၣ် မၤကမၣ်ဘၣ်ပှၤ‚ ဖဲအံၤပဘၣ်ဂုာ်ကျဲးစၢးသပှၢ်ပှၢ်လၢ တၢ်တတီတ့တၢ်အတၢ်ကွၢ်ဆၢၣ်မဲာ်န့ၣ်လီၤႉ ဘၣ်ဆၣ်‚ လၢကစၢ်ယွၤ အတၢ်သးကညီၤအတၢ်မၤတၢ်လၢ ပသးကံၢ်ပူၤဒီး လၢပှၤဂုၤပှၤဂၤအသးပူၤ‚ ပပျၢ်ပှၤဂၤအတၢ်ကမၣ်သ့ ဒ်အ၀ဲပျၢ်ပတၢ်ကမၣ်အသိး‚ ဒီး ဒိးန့ၢ်တၢ်ဆိၣ်ဂ့ၤ လၢ အ၀ဲကတဲာ်ကတီၤ၀ဲလၢပဂီၢ်န့ၣ်လီၤႉ