ဖဲကၠိအနံၣ်စးထီၣ်ကတီၢ်န့ၣ် စံၣ်ႉကၠ့ လၢအသးအိၣ် ၁၄ နံၣ် စံၣ်လီၤလၢသိလ့ၣ်အပူၤ လၢတၢ်သးခု ဒီးဂဲၤကလံၣ်ဒီတကျဲ‚ ဖဲမုၢ်ထူၣ်ကၠိစံၣ်လီၤကိးဘျီဒဲးန့ၣ်လီၤႉ အ၀ဲအမိၢ် ဒိန့ၢ်တၢ်ဂီၤ၀ံၤဒီး နီၤလီၤတၢ်ဂီၤလၢအဒိ၀ဲတဖၣ်လၢ စံၣ်ႉကၠ့ အတၢ်ဟဲက့ၤစံၣ်လီၤလၢကၠိ န့ၣ်လီၤႉ အ၀ဲဂဲၤကလံၣ် မ့ၢ်လၢအ၀ဲသးခုလၢ အတၢ်အိၣ်မူအပူၤ ဒီးမၤသးခုစ့ၢ်ကီး ပှၤဂုၤပှၤဂၤလၢ အတၢ်ဟူးတၢ်ဂဲၤအံၤန့ၣ်လီၤႉ ဘၣ်တနံၤ‚ ပှၤထၢဖှိၣ်က့ၤတၢ်ကမှံၤခံဂၤ‚ ဟ့ၣ်တၢ်ဆၢကတီၢ်လၢ ကဆိကတီၢ် အ၀ဲသ့ၣ် အတၢ်ဖံးတၢ်မၤလၢအအါဒီး ဂဲၤကလံၣ်ဃုာ်ဒီးပိာ်ခွါဖိ‚ လၢအမ့ၢ်ပှၤလၢ အထုးန့ၢ် ပှၤဂုၤပှၤဂၤအသး လၢအတၢ်ဂဲၤကလံၣ်န့ၣ်လီၤႉ ပှၤသၢဂၤအံၤ‚ ပာ်ဖျါထီၣ် တၢ်ဘၣ်ကူဘၣ်ဂာ် အတၢ်သးခုအစိၤကမီၤနီၢ်နီၢ်န့ၣ်လီၤႉ
ပှၤကွဲးထါစံးထီၣ်ပ့တၢၤ ၁၄၉ ပာ်ဖျါထီၣ် တၢ်ဂံၢ်ထံးလၢအဘၣ်ထွဲဒီး တၢ်သးခုလၢအဟဲလၢယွၤန့ၣ်လီၤႉ ပှၤကွဲးထါစံးထီၣ်ပ့တၢၤဟ့ၣ်ဂံၢ်ဟ့ၣ်ဘါ ယွၤအပှၤ ဂီၢ်မုၢ်တဖၣ် ဒ်သ်းကပာ်ဖှိၣ်ထီၣ်သးဒီး ‘သး၀ံၣ်ထီၣ်ယွၤ လၢတၢ်သး၀ံၣ်အသီ’ (း၁) လီၤႉ
အ၀ဲ ကွဲမုာ်ပှၤအံၣ်စရၠာစး့လးဖိတဖၣ်လၢ က‘သးခုလၢပှၤလၢတ့လီၤအီၤအပူၤ’ ဒီး က ‘သူၣ်ဖှံသးညီလၢ အစီၤပၤအပူၤ’ (း၂) န့ၣ်လီၤႉ ယွၤကိးပှၤလၢ ကဘူၣ်ထီၣ်ဘါထီၣ်အီၤ‚ ဃုာ်ဒီးတၢ်ဂဲၤကလံၣ်ဒီး ဒၢဖိဒီးတနၢ် (း၁-၃) လီၤႉ ဘၣ်မနုၤအဃိလဲၣ်ႉ မ့ၢ်လၢတၢ်အံၤ မ့ၢ်တၢ်လၢ အဘၣ်ယွၤအသးလၢ အပှၤဂီၢ်မုၢ်လီၤႉ မၤဃံမၤလၤပှၤအသူၣ်စူၤသးစူၤ လၢတၢ်အုၣ်က့ၤခီၣ်က့ၤလီၤ (း၄) ႉ
ပပၢ်လၢပဘူၣ်ထီၣ်ဘါထီၣ်အီၤအံၤ တ့လီၤပှၤဒီးပၢၤဃာ်စးက၀ၣ်အံၤန့ၣ်လီၤႉ အ၀ဲသးခုလၢပပူၤ မ့ၢ်လၢပမ့ၢ်အ၀ဲအဖိလၢ အအဲၣ်၀ဲတဖၣ်န့ၣ်လီၤႉ အ၀ဲတ့လီၤပှၤ‚ သ့ၣ်ညါပှၤဒီး ကွဲမုာ်ပှၤလၢ နီၢ်တဂၤအတၢ်ရၠာစး့လိာ်မုာ်လိာ်ဒီးအီၤလီၤႉ မ့ၢ်တၢ်လၤ တၢ်ကပီၤလီၤႉ ပပၢ်သးဘိလၢ အလီၤအဲၣ်ဒီး မူ၀ဲတဂၤအံၤ‚ မ့ၢ်ပတၢ်ဂ့ၢ်တၢ်ပီၢ်လၢ ပကသးခု လီၤစိလီၤထီန့ၣ်လီၤႉ ပသးခုပ၀ဲသ့လၢ ယွၤအတၢ်ဟ့ၣ်တပယူာ်ဃီလၢ အမ့ၢ်
အ၀ဲအတၢ်အိၣ်ဒီးပှၤဒီး သးခုစံးဘျုးက့ၤအီၤကိးနံၤလၢ ပှၤလၢအတ့လီၤပှၤတဂၤ အတၢ်ဟ့ၣ်အဖီခိၣ်န့ၣ်လီၤႉ