ဒဲးဘံၣ်‚ မ့ၢ်တၢ်မၤကဆှဲကဆှီတၢ်အတၢ်မၤ ကစၢ်တဂၤ‚ ထီဘိဃုထံၣ်န့ၢ်အါထီၣ် ပှၤလၢ ကကိးအီၤတဖၣ်လၢ တၢ်ကသူၣ်ထီၣ် အတၢ်မၤအဂီၢ်န့ၣ်လီၤႉ လၢတၢ်ဆဲးကျိးတဘျီ‚ အ၀ဲကတိၤတၢ်ဒီး ပိာ်မုၣ်တဂၤလၢအစံးဘၣ်အီၤလၢ ‘‘အခဲအံၤ‚ ယဟ့ၣ်တၢ်အပရၤလၢ ယကမၤကဆှဲကဆှီတၢ်အဂီၢ်တန့ၢ်ဘၣ်ႉ ယဘၣ်န့ၢ် ခဲစၢၣ်အတၢ်ဆါဒီး ယဘၣ်ဒိး တၢ်ယါဘျါသးန့ၣ်လီၤ’’ႉ စးထီၣ်ဖဲန့ၣ်‚ ဒဲးဘံၣ်ဆၢတဲာ်လၢ‚ ‘‘ပိာ်မုၣ်တအိၣ်၀ဲနီတဂၤ လၢအဘၣ်န့ၢ်ခဲစၢၣ်တၢ်ဆါ‚ လၢကဘၣ် တၢ်ဃၣ်ကွံာ်အီၤန့ၣ်ဘၣ်ႉ အ၀ဲသ့ၣ် ဟ့ၣ်ထီၣ် ဒၣ်လဲာ် တၢ်မၤကဆှဲကဆှီအတၢ်မၤလၢ တလိၣ်တၢ်ဟ့ၣ်အလဲ’’ န့ၣ်လီၤႉ လၢတၢ်အံၤ အဃိ‚ ဖဲ ၂၀၀၅ နံၣ်န့ၣ် အ၀ဲစးထီၣ် က့ှုၢ်ကရၠာစးၢတခါလၢ တၢ်တဟံးန့ၢ်တၢ်အဘျုး‚ ဖဲခီပနံၣ်တဖၣ် ဟ့ၣ်မၤဘူၣ်အ၀ဲသ့ၣ်အတၢ်မၤကဆှဲကဆှီတၢ် အတၢ်မၤဆူ ပိာ်မုၣ်တဖၣ်လၢ အတူၢ်ဘၣ်ခဲစၢၣ်တၢ်ဆါန့ၣ်လီၤႉ ခီဖျိလၢ အတၢ်မၤစၢၤဖိအံၤအဃိ ပိာ်မုၣ်တဂၤ ကလၢၢ်ဘၣ်လၢအအိၣ်ဒီး တၢ်နာ်န့ၢ်လီၤသး ဖဲဟဲက့ၤဘၣ်ဆူအဟံၣ်လၢ အကဆှီ တဖျၢၣ်အကတီၢ်ဒီး အ၀ဲစံးလၢ ‘‘လၢတၢ်အဆိကတၢၢ်န့ၣ် ယနာ်နီၢ်နီၢ်လၢ ယကမၤနၢၤကွံာ် ခဲစၢၣ်တၢ်ဆါအံၤ‚ သ့၀ဲန့ၣ်လီၤ’’ႉ
တၢ်ကလၢၢ်ဘၣ်လၢတၢ်ဒိးန့ၢ် တၢ်ကဟုကယာ်ဒီး တၢ်ဆီၣ်ထွဲန့ၣ် ကဲထီၣ် တၢ်မၤစၢၤဒီး တၢ်မၤမုာ်ထီၣ်ပှၤ ဖဲပကွၢ်ဆၢၣ်မဲာ်ဘၣ်ဒီး တၢ်လၢအတၤပှၤအကတီၢ် န့ၣ်လီၤႉ တၢ်သ့ၣ်ညါလၢ ကစၢ်ယွၤအတၢ်အိၣ်ဒီးပှၤ ဒီးမၤစၢၤပှၤ‚ လီၤလီၤဆီဆီ ဟဲစိာ်တၢ်မုၢ်လၢ်လၢ ကဟ့ၣ်ဂံၢ်ဟ့ၣ်ဘါပသးန့ၣ်သ့၀ဲလီၤႉ ထါစံးထီၣ်ပ့တၢၤ ၄၆ မ့ၢ် ထါတယုၢ်လၢ အဘၣ်တၢ်အဲၣ်ဘၣ်အီၤလၢ ပှၤအါဒံအါဂၤ ဖဲအလီၤဘၣ်ဆူ တၢ်နးတၢ်ဖှီၣ်တဖၣ်လီၤႉ ဒုးသ့ၣ်နီၣ်စ့ၢ်ကီးပှၤ လၢ‚ ‘ယွၤမ့ၢ်ပတၢ်ပူၤဖျဲးအလီၢ်‚ ဒီးပဂံၢ်ပဘါလီၤႉ လၢတၢ်မၤကိၢ်မၤဂီၤန့ၣ် ပှၤထံၣ်န့ၢ်အီၤလၢ တၢ်မၤစၢၤလီၤဆီဒၣ်တၢ်လီၤ’’ ဒီး ‘‘အိၣ်ဃိကလာ်ဒီးသ့ၣ်ညါလၢ ယမ့ၢ်ယွၤတက့ၢ်ႉႉႉ ယကအိၣ်ထီၣ်ထီလၢ ဟီၣ်ခိၣ်ချၢ လီၤႉ တၢ်သုးမုၢ်ဂီၢ်မုၢ်အယွၤ အိၣ်ဒီးပှၤႉႉႉ’’ (း၁‚ ၁၀-၁၁) န့ၣ်လီၤႉ
ဒုးသ့ၣ်နီၣ်ထီၣ်က့ၤပသးလၢ ကစၢ်ယွၤအတၢ်အၢၣ်လီၤတဖၣ်ဒီး အတၢ်အိၣ် ဒီးပှၤန့ၣ် ကဲထီၣ်တၢ်လၢအအိၣ်ဒီးအခီပညီလၢ တၢ်မၤစၢၤလၢ အမၤသီထီၣ်က့ၤ ပသူၣ် ပသးဒီး ဟ့ၣ်ပှၤတၢ်ဂံၢ်တၢ်ဘါဒီးတၢ်နာ်န့ၢ်လီၤသးလၢ တၢ်ကတိၤဖျိကွံာ် ကွၢ်ဆၢၣ်မဲာ် တၢ်အကတီၢ်လၢ အကီခဲတဖၣ်န့ၣ်လီၤႉ