ပှၤစူၢ်က့ၤနာ်က့ၤသီတၢ်တဂၤ အသူၣ်ဆူၣ်သးဆူၣ်၀ဲနီၢ်နီၢ်လၢ ကဖးလံာ်စီဆှံန့ၣ်လီၤႉ ဘၣ်ဆၣ်‚ အ၀ဲလီၤမၢ်ကွံာ်လၢ မဲာ်ချံအတၢ်ထံၣ်ဃုာ်ဒီး အစုခံခီလၢ တၢ်ပိၢ်ဖးတခါ န့ၣ်လီၤႉ ဖဲအနၢ်ဟူဘၣ်ပိာ်မုၣ်တဂၤလၢ အဖးဘရၠာစး့လံၣ် (လံာ်မဲာ်ဖျၢၣ် လၢပှၤမဲာ်တထံၣ် တၢ်အဂီၢ်) လၢအနိးဖံး အ၀ဲဂုာ်ကျဲးစၢး မၤ၀ဲဒ်န့ၣ်လီၤႉ ဘၣ်ဆၣ်‚ သ့ၣ်ညါဘၣ် စ့ၢ်ကီးလၢ နၢာ်ဘိ (တၢ်ဒုးသ့ၣ်ညါ တၢ်ဟုးတၢ်ဂဲၤလၢပနီၢ်ခိ) လၢအအိၣ်လၢအနိးဖံးစိးနါ တဖၣ် စ့ၢ်ကီး ဟးဂီၤန့ၣ်လီၤႉ လၢခံ‚ အ၀ဲအသးပှဲၤဒီး တၢ်သးခု ဖဲအထံၣ်သ့ၣ်ညါဘၣ်လၢ အကလၢၢ်ဘၣ် ဘရၠာစး့လံၣ် အလံာ်မဲာ်ဖျၢၣ်လၢ အပ@ၤသ့၀ဲန့ၣ်လီၤႉ အ၀ဲထံၣ်န့ၣ် ကျဲတဘိ လၢကဖးလံာ်စီဆှံဒီးသးခုဘၣ်လၢ ကစၢ်ယွၤ အကလုၢ်ကထါန့ၣ်လီၤႉ
တၢ်သးခုဒီး တၢ်မုၢ်လၤသးခု မ့ၢ်သးအတၢ်ဟူးတၢ်ဂဲၤတဖၣ်လၢ ၀ံယံးရၠာစးမံယၤ လဲၤခီဖျိဘၣ်‚ ဖဲအဒိးန့ၢ်ကစၢ်ယွၤအကလုၢ်ကထါန့ၣ်လီၤႉ အ၀ဲစံး လၢ ‘‘ယထံၣ်န့ၢ် နတၢ်ကတိၤဒီး ယအီၣ်ကွံာ်အီလီၤ’’ (ယံး ၁၅း၁၆) ႉ လၢအတလီၤဂာ်ဘၣ်ဒီး ပှၤယူၤဒၤဖိ လၢ အတပးကဲ ကစၢ်ယွၤအကလုၢ်ကထါ (၈း၉) ဒီး‚ ၀ံယံးရၠာစးမံယၤ စူၢ်ဒီးသးခုလၢ ယွၤအကလုၢ်ကထါအပူၤန့ၣ်လီၤႉ မ့ၢ်နာ်သက့ဒ်န့ၣ်‚ အ၀ဲအတၢ်စူၢ်ယွၤ အကလုၢ်ကထါဆှၢအီၤ ဆူတၢ်ကသမၢအီၤလၢ အပှၤဂီၢ်မုၢ်ဒၣ်၀ဲဒီး မၤအၢမၤနးအီၤလၢ တၢ်တတီတ့တၢ် အပူၤန့ၣ်လီၤ (၁၅း၁၇) ႉ
ပ၀ဲတနီၤ‚ ပကလဲၤခီဖျိဘၣ်တၢ် ဒ်သိးဒီး၀ံယံးရၠာစးမံယၤအံၤစ့ၢ်ကီးလီၤႉ တဘျီ‚ ပဖး ယွၤအကလုၢ်ကထါလၢတၢ်သးခု‚ ဘၣ်ဆၣ် တၢ်စူၢ်ယွၤအကလုၢ်ဆှၢပှၤ ဆူ တၢ်တူၢ်ဘၣ်တၢ်ဒီး တၢ်သမၢကွံာ်ပှၤလၢ ပှၤဂုၤပှၤဂၤတဖၣ်လီၤႉ ဒ်၀ံယံးရၠာစးမံယၤ အသိး‚ ပဟဲစိာ် ပတၢ်သဘံၣ်ဘုၣ်လၢသးအံၤ ဆူကစၢ်ယွၤအအိၣ်သ့လီၤႉ အ၀ဲစံးဆၢ ၀ံယံးရၠာစးမံယၤ လၢအယၢၤထီၣ်ကဒီးက့ၤ တၢ်အၢၣ်လီၤလၢအ၀ဲ (ယွၤ) ဟ့ၣ်လီၤအီၤဖဲ‚ အ၀ဲဘၣ်တၢ်ကိးအီၤ အဆိကတၢၢ်တဘျီလၢ တၢ်ကကဲထီၣ်၀ံတဂၤ (း၁၉-၂၀‚ ယံး ၁း၁၈-၁၉) န့ၣ်လီၤႉ ကစၢ်ယွၤဒုးသ့ၣ်နီၣ်က့ၤအီၤလၢ အ၀ဲတပျဲလၢအပှၤဂီၢ်မုၢ် ကမၤသးဟးဂီၤအီၤနီတစုန့ၣ်ဘၣ်ႉ ပမၤန့ၢ်တၢ်နာ်န့ၢ်လီၤသး ဒ်သိးအံၤသ့၀ဲစ့ၢ်ကီး လီၤႉ ကစၢ်ယွၤအကလုၢ်တီ၀ဲဒီး တညိကွံာ်ပှၤနီတစုဘၣ်လီၤႉ