ခိၣ်နၢ်လၢ အနဲၣ်ပ၀ဲပှၤခီလ့ၣ်ကၠိက့ှူၢ်ဖိလၢ တၢ်သူၣ်၀ံၣ်သးဆၢအံၤ‚ ကွၢ်ထွဲစ့ၢ်ကီး ပှၤလၢ တၢ်ဒ့တနၢ်တဘျီဃီ‚ လၢတၢ်သ့တၢ်ဘၣ်အပူၤ မၤဘၣ်လိာ်ဘၣ်စး မူဒါတဖၣ် အံၤန့ၣ်လီၤႉ ဖဲမူးသးခုတခါ၀ံၤ‚ လီၤလီၤဆီဆီ‚ ဖျါလၢအလီၤဘှံးလီၤတီၤ‚ လၢတၢ်အံၤအဃိ‚ ယသံကွၢ်အီၤလၢ မ့ၢ်အိၣ်၀ဲဘၣ်လိာ်ဘၣ်စး ကစီဒီဧါလီၤႉ အ၀ဲစံးဆၢက့ၤယၤလၢ‚ ‘ယတမၤတၢ်ဒ်သိးအံၤ လၢခါလၢအပူၤကွံာ်နီတဘျီဘၣ်’ႉ ၀ံၤအ၀ဲဆှဲဖျါလၢ တနၢ်တဖျၢၣ်အံၤ‚ အကလုၢ်သီၣ်တလိၤအဃိ‚ ယဘၣ်ဒ့အီၤလၢ ‘ခံ’ (ကီး) လီၤဆီ ခံကလုာ် – ယစုထွဲဘၣ်ဒ့ ခံတကလုာ်ဒီး ယစုစ့ၣ်ဘၣ်ဒ့၀ဲ အဂၤတကလုာ်လၢ မူးသးဖှံ ဒီတကတီၢ်ညါလီၤ’’ႉ ယကမၢကမၣ်ဘၣ်လၢ အ၀ဲအတၢ်သ့တၢ်ဘၣ်လၢ တၢ်ဒ့တၢ်ဒီး ကမၢကမၣ်ဘၣ်စ့ၢ်ကီး‚ ကစၢ်ယွၤလၢ အတ့လီၤပှၤကူပှၤကညီတဖၣ်‚ ဒ်သိးကမၤကဲထီၣ်လိၣ်ထီၣ် တၢ်ဒ်သိး အံၤန့ၣ်လီၤႉ
စီၤပၤစီၤဒၤ၀ံး ပာ်ဖျါထီၣ် တၢ်လၢအဒိၣ်န့ၢ် တၢ်အံၤဒၣ်လဲာ်တကလုာ်လၢ အကမၢကမၣ်ဘၣ်တၢ်‚ ဖဲအကွဲး၀ဲလၢ ‘‘တၢ်တ့လီၤယၤ အိၣ်ဒီးပျံၤတၢ်အလီၢ်‚ ဒီးကမၢကမၣ်တၢ်အလီၢ်လီၤႉ မၤသးဒ်န့ၣ်ဒီး ယကစံးထီၣ်ပ့တၢၤနၤလီၤႉ နတၢ်မၤတဖၣ် လီၤလး၀ဲန့ၣ် ယသ့ၣ်ညါသပှၢ်ပှၢ်လီၤ (စံး ၁၃၉း၁၄) ႉ ဖဲလၢ ပှၤကူပှၤကညီအတၢ်သ့ တၢ်ဘၣ်တဖၣ်ဂ့ၤ မ့တမ့ၢ် တၢ်ဘၣ်တ့ အတၢ်လီၤကမၢကမၣ်ဂ့ၤ‚ တၢ်လီၤလးလၢ တၢ်ဘၣ်တ့ ဒုးနဲၣ်ပှၤလၢ‚ ပတၢ်ဘၣ်တ့ကစၢ် အစိဒိၣ် ကမီၤထီ၀ဲန့ၣ်လီၤႉ
တနံၤ‚ ဖဲပမ့ၢ်တုၤလၢကစၢ်ယွၤအဂီၤထံး‚ ပှၤကိးကလုာ်ကိးမၠိ‚ ကဘူၣ်ထီၣ် ဘါထီၣ်အီၤ ဃုာ်ဒီးတၢ်ကတိၤအဖျၢၣ်လၢ ‘‘ယွၤပကစၢ်ဧၢ‚ နဂ့ၤဒိးန့ၢ် တၢ်လၤကပီၤ‚ ဒီးတၢ်ယူးယီၣ် ဒီးတၢ်စိတၢ်ကမီၤလီၤႉ အဂ့ၢ်ဒ်အံၤ‚ နတ့လီၤတၢ်ခဲလၢာ် ဒီးမ့ၢ်နသး အိၣ်ဒီး‚ ကဲထီၣ်၀ဲ‚ ဒီးဘၣ်တၢ်တ့လီၤအီၤလီၤ’’ (လီၣ် ၄း၁၁) ႉ တၢ်သ့တၢ်ဘၣ်လၢ အလီၤကမၢကမၣ်လၢ ကစၢ်ယွၤတ့လီၤ၀ဲမ့ၢ်တၢ်ဂ့ၢ်လၢ အထီကတၢၢ်လၢ တၢ်ကဘူၣ်ထီၣ်ဘါထီၣ်က့ၤအီၤန့ၣ်လီၤႉ