နီၢ်ခိနီၢ်သးဒီး သးအတၢ်ဟူးဂဲၤလီၤဘှံးလီၤတီၤလီၤႉ ယဆ့ၣ်နီၤလၢ လီၢ်ဆ့ၣ်နီၤဒီး မၤပ၀ံာ် မၤပကံးယသးလီၤႉ လၢကစၢ်ယွၤ အတၢ်ဆှၢတၢ်တွၤပှၤအဃိဒီး ပဟံၣ်ဖိဃီဖိသုးပသး လၢ ခဲလံဖိနံယါဆူ ၀ံးကိၣ်စ့ၣ်လီၤႉ ဖဲပတုၤဆူတၢ်လီၢ်အံၤ၀ံၤ‚ ပသိလ့ၣ်ဟးဂီၤဒီး ပတအိၣ်ဒီးသိလ့ၣ် လၢခံလါအတီၢ်ပူၤန့ၣ်လီၤႉ ဖဲအကတီၢ်အံၤန့ၣ်‚ ယ၀ၤ ဘၣ်အိၣ်ဒီး တၢ်ကွဲးအပျိၢ်ဒီး အိၣ်ဒီးတၢ်ကီတၢ်ခဲလၢ အဟးထီၣ်က့ၤလီၤ အဂီၢ်‚ ဒီးယနီၢ်ကစၢ် ယတၢ်ဆူးတၢ်ဆါလၢ ယတူၢ်ဘၣ် ယံာ်ယံာ်ထၢထၢ မၤသဘံၣ်ဘုၣ်ယၤလီၤႉ ဒီးပအိၣ်ဒီး တၢ်ဂ့ၢ်ကီလၢ အကၢပရၤကၢကလံၤလၢကဘီှက့ၤ ပဟံၣ်အလီၢ်လံၤ န့ၣ်လီၤႉ ပထံွၣ်ဖးဒိၣ်တဒု တူၢ်ဘၣ်တၢ်ဆူးတၢ်ဆါလီၤႉ ဖဲလၢပထွံၣ်ဖိတဒု မ့ၢ်သူၣ်ဖှံသးဖှံဘၣ်ဆၣ်‚ ပတဲဆိထံၣ်ဆိ အဂ့ၢ်အကျိၤတသ့၀ဲဘၣ်လီၤႉ ယတၢ်ပာ်သူၣ်ပာ်သးတဂ့ၤတ၀ါ ကဲၣ်ဆိးလၢၤဘၣ်ႉ ဆူတၢ်ကအိၣ်ဒီး တၢ်စူၢ်တၢ်နာ်လၢ အတဟူး၀း‚ ဖဲတၢ်ကွၢ်ဆၢၣ်မဲာ်တၢ်ကီတၢ်ခဲ ဒ်သိးအံၤန့ၣ် မ့ၢ်ယကဘၣ်အိၣ်မူယဲဒ်လဲၣ်ႉ
ယဃ့ထုကဖၣ်ဒီး ကစၢ်ယွၤဒုးသ့ၣ်နီၣ်ထီၣ်ယၤလၢ ပှၤကွဲးထါစံးထီၣ်ပ့တၢၤ‚ အတၢ်စံးထီၣ်ပ့တၢၤကစၢ်ယွၤလၢ တသန့ၤထီၣ်သးလၢတၢ်အိၣ်သး လၢအကွၢ် ဆၢၣ်မဲာ်ဘၣ်၀ဲအဖီခိၣ်န့ၣ်ဘၣ်ႉ စီၤဒၤ၀ံး လူလီၤဂၢ်လီၤ အတၢ်သးဂဲၤတဖၣ်‚ အတၢ်ဂံၢ်စၢ် ဘါစၢ်ဒီး ဃုထံၣ်တၢ်အိၣ်တဒၢလၢ ယွၤအမဲာ်ညါ (စံး ၁၆း၁) န့ၣ်လီၤႉ စီၤဒၤ၀ံး အၢၣ်လီၤအီၤလီၤလၢ ကစၢ်ယွၤမ့ၢ် ပှၤလၢအမၤပှဲၤအတၢ်လိၣ်ဒီး ပှၤလၢအဒီတဒၢအီၤ (း၅-၆) န့ၣ်လီၤႉ အ၀ဲစံးထီၣ်ပ့တၢၤယွၤဒီး ပိာ်ထွဲယွၤ အတၢ်ကူၣ်လိာ် အခံ (း၇) လီၤႉစီၤဒၤ၀ံး မၤဂၢၢ်မၤကျၢၤအသးလၢ‚ အ၀ဲ ‘‘တဟူးတ၀း၀ဲ’’ မ့ၢ်လၢအ၀ဲပာ် ကစၢ်ယွၤ လၢအမဲာ်ညါ ‘‘တထံၣ်ဃီ’’ (း၈) လီၤႉ လၢတၢ်အံၤအဃိ‚ အ၀ဲသးခု၀ဲဒီး အိၣ်ဘံၣ်အိၣ်ဘၢဘၣ်လၢ တၢ်သးခုအပူၤ လၢကစၢ်ယွၤအမဲာ်ညါ (း၉-၁၁) န့ၣ်လီၤႉ
ပ၀ဲစ့ၢ်ကီး ပသူၣ်ဖှံသးညီသ့‚ ခီဖျိတၢ်သ့ၣ်ညါ ပတၢ်ဃူတၢ်မုာ်အံၤ‚ တသန့ၤထီၣ်သးလၢ ပတၢ်အိၣ်သးလၢအခဲအံၤအဖီခိၣ်န့ၣ်ဘၣ်ႉ ဒ်ပစံးထီၣ်ပ့တၢၤ ပကစၢ်ယွၤလၢ အတဆီတလဲသးနီတစုလၢ အအိၣ်ဒီးပှၤထီဘိဒီး အ၀ဲအတၢ်အိၣ်ဒီးပှၤ ကမၤဆူၣ်ထီၣ် ပတၢ်စူၢ်တၢ်နာ် ဂၢၢ်ဂၢၢ်ကျၢၤကျၢၤန့ၣ်လီၤႉ