တၢ်ဂိၢ်ထီၣ်သီကိးဘျီ ဖဲချံးဖိသ့ၣ်ညါလၢတၢ်ဂိၢ်ကတီၢ် ကဟဲတုၤ‚ အ၀ဲယူၤလီၤထံ တုၤရၠာစး့ၣ်ကီၣ်ဖိအခံဒး ဘျၢလီၤအသးလၢ ဟီၣ်ခိၣ်ကပံာ်အကျါလီၤႉ အ၀ဲနုာ်လီၤဆူ အကုပူၤဒီးအိၣ်ဃိ‚ အသးစံၣ်ဃၢထီၣ် တုၤဒၣ်လဲာ် လၢဘူးကဆိကတီၢ်ဘၣ်အသး န့ၣ်လီၤႉ အ၀ဲအနီၢ်ခိအတၢ်ကိၢ်စှၤလီၤ‚ ကၢကိၢ်လိၣ်အသးလီၤႉ အ၀ဲဆိကတီၢ် တၢ်သါဒီး အိၣ်ခိးတၢ်လီၤႉ အ၀ဲဘျၢလီၤအသးဃုလါ ဒီး အနီၢ်ခိ မၤကဆှၣ်လီၤ ခဲလ်စံၣ်ယၢၣ် လၢအဃံအကွဲတဖၣ် ဆူအသွံၣ်ကျိၤအဃိ‚ ကယီကယီ အ၀ဲအက့ၢ်အဂီၤဒၣ်လဲာ် ဖှံၣ်လီၤဃဲၤလီၤလီၤႉ
ဘၣ်ဆၣ်‚ ဖဲရၠာစး့ၣ်ကီၣ်ဖိအံၤ ပှံၢ်လီၤ‚ အ၀ဲ မၤထီၣ်ဖီအသးလၢ ထံဖံးခိၣ်‚ ဒီးသါထီၣ်ကဒီး တဘျီလီၤႉ အ၀ဲအဃံအကွဲတဖၣ် သီထီၣ်က့ၤဒီး ကလၢၢ်ဘၣ်မုၢ်အတၢ်ကိၢ်လၢ ချံးအကုခိၣ်အဖီခိၣ်လီၤႉ
ဖဲယဖး ပှၤကွဲးထါစံးထီၣ်ပ့တၢၤပာ်ဖျါထီၣ် အတၢ်အိၣ်ခိးယွၤအကျဲန့ၣ် ယဆိကမိၣ်ထီၣ်ယဲ ချံးဖိအံၤအဂ့ၢ်လီၤႉ ပှၤကွဲးထါစံးထီၣ်ပ့တၢၤအံၤ မ့ၢ်ပှၤလၢ အအိၣ်မူဘၣ်လၢ ‘‘တၢ်စဲဘူးစဲဃၤ’’ တမံၤ လၢ ‘‘ကပံာ်ဒီးကပံာ်ပှဲာ်’’‚ ဘၣ်ဆၣ်‚ ကစၢ်ယွၤ ဒိကနၣ် အတၢ်ဃ့ကညး (စံး ၄၀း၂) လီၤႉ ကစၢ်ယွၤစိာ်ထီၣ်ကွံာ်အီၤဒီး ဟ့ၣ်အီၤ တၢ်လီၢ်အဂၢၢ်အကျၢၤတခါလၢ ကဆၢထၢၣ်၀ဲလီၤႉ အ၀ဲသး၀ံၣ်ထီၣ်၀ဲ ကစၢ်ယွၤ မ့ၢ် ယတၢ်မၤစၢၤဒီး တၢ်မၤပူၤဖျဲးတၢ်လီၤ’’ (း၁၇) ႉ
ဘၣ်သ့ၣ်သ့ၣ် နကကလၢၢ်လၢ နဘၣ်အိၣ်ခိးတၢ်လီၤစိၤလီၤထီလၢ တၢ် တမံၤမံၤ ကဆီတလဲအသးအဂီၢ်လၢ အမ့ၢ်တၢ်နဲၣ်ကျဲအသီတမံၤလၢ နတၢ်ဖံးတၢ်မၤ အပူၤလၢ တၢ်ကသူၣ်ထီၣ်တၢ်ရၠာစး့လိာ်မုာ်လိာ်တမံၤအဂီၢ်လၢ သးအစိကမီၤလၢ တၢ်ကမၤဟးဂီၤကွံာ် လုၢ်လၢ်လၢ အအၢအသီတမံၤအဂီၢ်‚ မ့တမ့ၢ် လၢတၢ် ကထူၣ်ဖျဲးထီၣ်လၢ တၢ်အိၣ်သးကီခဲတမံၤအဂီၢ်န့ၣ်လီၤႉ ဖဲအံၤ‚ ချံးဖိတဘ့ၣ်ဒီး ပှၤကွဲး ထါစံးထီၣ်ပ့တၢၤတဖၣ် ကဒုးသ့ၣ်နီၣ်ထီၣ်နၤလၢ တၢ်နာ်န့ၢ်ယွၤ‚ အ၀ဲဒိကနၣ်နၤ ဒီးကမၤပူၤဖျဲးနၤန့ၣ်လီၤႉ