ဖဲနလဲၤတၢ်လၢကဘီယူၤန့ၣ် တချုးကဘီယူၤ ယူၤထီၣ်န့ၣ်‚ ပှၤမၤတၢ်ဖိလၢကဘီယူၤ အလိၤတဂၤ ဒုးနဲၣ်တၢ်ဘံၣ်တၢ်ဘၢအတၢ်နဲၣ်ကျဲလၢကလံၤ လၢကဘီယူၤအဒၢးပူၤ မ့ၢ်တအိၣ်၀ဲလၢၤအကတီၢ် နကဘၣ်မၤတၢ်ဒ်လဲၣ်အဂ့ၢ်န့ၣ်လီၤႉ ပှၤလဲၤတၢ်ဖိတဖၣ်အဂီၢ် အီးကစံၣ်ကၠ့ၣ် (ၣ်၂) အတၢ်သါမဲာ်ကျၢၣ်ဘၢဖိ ကအိၣ်ဟဲလီၤလၢအဖီခိၣ်ဒီး အ၀ဲသ့ၣ်ကဘၣ်သိးထီၣ် တၢ်ကျၢၢ်ဘၢမဲာ်ဖိန့ၣ်တခါအဆိ တချုးအ၀ဲသ့ၣ် မၤစၢၤပှၤအဂၤဘၣ်အခါန့ၣ်လီၤႉ ဘၣ်မနုၤ အဃိလဲၣ်န့ၣ် တချုး နကမၤစၢၤ ပှၤတဂၤဂၤဒံးဘၣ်န့ၣ် လိၣ်ဘၣ်နနီၢ်ခိကဘၣ်တၢ်မၤဂ့ၤ နသးသဒ့ၣ်န့ၣ်လီၤႉ
ဖဲစီၤပီလူးကွဲးန့ၢ် စီၤတံၤမသ့းအလံာ်န့ၣ်‚ အ၀ဲ မၤသ့ၣ်နီၣ်လီၤတ့ၢ် ဘၣ်ဃး တၢ်ပၢၤဃာ်ပနီၢ်သး အတၢ်အိၣ်ဆူၣ်အိၣ်ခ@ မ့ၢ်တၢ်အကါဒိၣ်၀ဲ တချုးပမၤစၢၤပှၤဂၤ အတၢ်မၤအခါဘၣ်န့ၣ်လီၤႉ အ၀ဲမၤသ့ၣ်နီၣ် စီၤတံၤမသ့း လၢတၢ်အိၣ်ဖှိၣ်သရၠာစးၣ်တဂၤ အမူဒါတဖၣ် အ၀ဲကပလီၢ်သး လၢတၢ်သိၣ်ကမၣ်သီကမၣ်တဖၣ် (၁ တံၤ ၄း၁-၅) ဒီးတၢ်စူၢ်တၢ်နာ် အတၢ်သိၣ်သီကမၣ်တဖၣ်လီၤ (း၆-၈) ႉ ဘၣ်ဆၣ်‚ လၢတၢ်ကမၤ ထီၣ်ဘးမူဒါဂ့ၤဂ့ၤအဂီၢ်‚ တၢ်လၢအကါဒိၣ်ကတၢၢ်န့ၣ် မ့ၢ်ကဘၣ် ‘‘ပလီၢ်အသး လၢအကစၢ်ဒၣ်၀ဲအဂ့ၢ်‚ ဒီးလၢတၢ်သိၣ်တၢ်သီအဂ့ၢ်‚ ဒီးကဘၣ်အိၣ်ဆိး လၢအပူၤ’’ အဂ့ၢ်လီၤ (း၁၆) ႉ တချုးအ၀ဲကမၤတၢ်လၢ ပှၤဂၤအဂီၢ်န့ၣ် အ၀ဲကဘၣ်အံးထွဲကွၢ်ထွဲလီၤက့ၤ အသးဂ့ၤဂ့ၤ လၢအနီၢ်ကစၢ်အတၢ်ဘၣ်ထွဲလိာ်သး ဒီးကစၢ်လၢအဆိန့ၣ်လီၤႉ
တၢ်လၢစီၤပီလူး စံးဘၣ် စီၤတံၤမသ့းန့ၣ် တဲစ့ၢ်ကီးပှၤန့ၣ်လီၤႉ ပထံၣ် သဂၢၢ်လိာ်ဘၣ်သးဒီးပှၤတဖၣ် လၢတသ့ၣ်ညါကစၢ်တဖၣ် ကိးနံၤန့ၣ်လီၤႉ ဖဲပမၤပှဲၤ ထီၣ် ပနီၢ်သးအအီးကစံၣ်ကၠှၣ်အဆိကတၢၢ်‚ ခီဖျိတၢ်ဟံးန့ၢ် တၢ်ဆၢကတီၢ် လၢတၢ်ဖး ယွၤကလုၢ်ကထါ‚ တၢ်ထုကဖၣ်‚ ဒီးသးစီဆှံကစၢ်လၢ အမၤစၢၤပှၤန့ၣ်‚ ပအိၣ်ဒီး တၢ်ရၠာစး့လိာ်ဘၣ်ထွဲလၢအဂ့ၤဒီးယွၤန့ၣ်လီၤႉ ဖဲန့ၣ်ပကအိၣ်ဒီးတၢ်သးသဒ့ၣ် လၢအဂ့ၤ ဒ်သိးပကမၤစၢၤပှၤဂၤန့ၣ်လီၤႉ