ဖဲယထုးကွံာ်လံာ်က့ လၢအပာ်ဖျါတၢ်အပရၤ လၢတၢ်ဂိၢ်ခါအဆ့ကၤလၢယပရၤအီၤနှၣ် ယနံၤကမှံထီၣ် လၢယထံၣ်ဘၣ်တၢ်ကတိၤ လၢဆ့ကၤအချၢ‚ တၢ်စံး၀ဲ ‘ပလီၢ်သး‚-တၢ်ထုးထီၣ်တၢ်ကူတၢ်သိးအသီအံၤ ကမၢဆူၣ်နၤ ဒ်သိးနကလဲၤဟးထီၣ် ဆူတၢ်ချၢ န့ၣ်လီၤႉ’ တုၤတၢ်သိးထီၣ်အီၤလၢ မူခိၣ်မူလိၤအကတီၢ်အဘၣ်န့ၣ်‚ ပှၤတဂၤ မူ၀ဲဂဲၤ၀ဲ အိၣ်ဒီး အဂံၢ်အဘါဆူၣ်ထီၣ် ဖဲမူခိၣ်မူလိၤ အတၢ်ကီတၢ်ခဲ‚ တၢ်ဆီတလဲမၤအသး‚ အိၣ်အသးတဖၣ်အပူၤသ့၀ဲလီၤႉ
တၢ်ပာ်သူၣ်ပာ်သး အနီၢ်ထိၣ်တမံၤဃီအံၤ‚ တီစ့ၢ်ကီး၀ဲလၢ သူၣ်ဂ့ၢ်သးကျိၤ အတၢ်အိၣ်မူအကျဲပူၤန့ၣ်လီၤႉ ဒ်ကစၢ်ယ့ၣ်။းအပျဲၢ်အဘီၣ်တဖၣ်အသိး ပသူၣ်ဂ့ၢ်သးကျိၤ အမူခိၣ်မူလိၤ တၢ်ကူတၢ်သိးတဖၣ်န့ၣ် ဘၣ်တၢ်ဟ့ၣ်လီၤ မၤလိာ်ပှၤလၢ ကစၢ်အကလုၢ်ကထါ လံာ်စီဆှံအပူၤန့ၣ်လီၤႉ ‘မၤသးဒ်န့ၣ်ဒီး ဒ်ပှၤလၢယွၤဃုထၢအီၤ‚ ပှၤစီဆှံဒီး ပှၤလၢတၢ်အဲၣ်အီၤ သ့ၣ်တဖၣ်အသိးန့ၣ်‚ မၤသု၀ဲဒ်န့ၣ်အသိး စ့ၢ်ကီးတက့ၢ်’ (ကလီး ၃း၁၂-၁၃) ႉ
တၢ်ကူတၢ်သိးတဖၣ်အံၤ မ့ၢ်ယွၤကတဲာ်ကတီၤ ဟ့ၣ်လီၤ၀ဲအဃိ‚ တၢ်သးကညီၤ‚ တၢ်ဆီၣ်လီၤသးဒီး တၢ်သးစူၤန့ၣ် ဟ့ၣ်ပှၤဂံၢ်ဘါလၢ ပကကွၢ်ဆၢၣ်မဲာ်
တၢ်သူၣ်ဒိၣ်သးအၢ‚ ဒီးတၢ်ဒုၣ်ဒွဲၣ်စံးအၢ အိၣ်ဒီးပတၢ်သူၣ်စူၤသးစူၤ‚ တၢ်ပျၢ်တၢ်သ့ှူး ကမၣ်ဒီး တၢ်အဲၣ်တၢ်ကွံလီၤႉ တၢ်ပာ်သူၣ်ပာ်သးတဖၣ်အံၤ ပၢၤပသးဒီးတၢ်စိ
တၢ်ကမီၤ ဖဲတၢ်အိၣ်မူ လပီစံၣ်စုာ်အကတီၢ်န့ၣ်လီၤႉ
ဖဲပဘၣ်ကွၢ်ဆၢၣ်မဲာ် တၢ်တမုာ်တလၤလၢဟံၣ်ပူၤ‚ လၢကၠိပူၤ‚ လၢတၢ်မၤလီၢ် အပူၤအခါ‚ တၢ်ကူတၢ်သိးလၢ ကစၢ်ယွၤမၢပကူထီၣ်သိးထီၣ်အီၤန့ၣ်‚ ကဒီဒၣ်အိၣ်ပှိၤပှၤ ဒီးမၤဆူၣ်ထီၣ်ပသးလၢ ပကမၤတၢ်အဂ့ၤလီၤဆီတမံၤန့ၣ်လီၤႉ ဒီးလၢတၢ်န့ၣ်တဖၣ် ခဲလၢာ်အဖီခိၣ်‚ ကူထီၣ်သိးထီၣ် တၢ်အဲၣ်တၢ်ကွံ လၢအမ့ၢ် တၢ်လၢတၢ်ပှဲၤအပျံၤစၢဃာ် တၢ်န့ၣ်တက့ၢ် (ကလီး ၃း၁၄) ႉ
တၢ်ကူထီၣ်သိးထီၣ် ဒ်ကစၢ်ယွၤအတၢ်ဟံးစုနဲၣ်ကျဲန့ၣ်‚ တဆီတလဲ မူခိၣ်မူလိၤ အတၢ်အိၣ်အသးဘၣ်ႉ မ့မ့ၢ် မၤလၢထီၣ်ပှဲၤထီၣ် ပှၤအကူထီၣ်သိးထီၣ် နီၢ်သးအတၢ်ကူတၢ်သိးတဖၣ်တခီ န့ၣ်လီၤႉ