ယဒိၣ်ထီၣ်လၢကီၢ်မဲၣ်နံၣ်စိထၣ်‚ လၢအမ့ၢ်၀ဲတၢ်လီၢ်တတီၤ အိၣ်ဒီးကမါဃံလၤတဖၣ် လီၤႉ ယအဲၣ်လဲၤသူၣ်ဒဲလၢ ယကကွၢ် ယွၤအတၢ်ဘၣ်တ့ လီၤလိၢ်လီၤလးတဖၣ် ဖဲန့ၣ်လီၤႉ ဘၣ်ဆၣ်ဒီး တၢ်မံလၢဒဲတကျၢၤအပူၤန့ၣ် ယသးတခုကဲၣ်ဆိးဘၣ်ႉ လီၤဆီဒၣ်တၢ် ဖဲတၢ်စူၤလီၤအနၤဒီး တၢ်စူၤထံနုာ်လီၤ မၤဘၣ်စီၣ်လီၢ်မံထၢၣ်အခါ န့ၣ်လီၤႉ
ယပ့တၢၤဘၣ် တၢ်စူၢ်တၢ်နာ် အပှၤဒူပှၤဃိၤတဂၤ လၢအမံ၀ဲလၢဒဲပူၤ အနံၣ်တကယၤ ဒ်န့ၣ်အသိးလီၤႉ ဖဲအ၀ဲဒၣ်အသးအိၣ် နွံဆံယဲၢ်နံၣ်န့ၣ် စီၤအၤ့ဘၣ် နၢ်ဟူ ကစၢ်ယွၤအတၢ်ကိးထီၣ်အီၤ လၢကပာ်တ့ၢ် အထံအကီၢ် ဒီးကဒုးကဲထီၣ်အီၤ ပှၤကလုာ်ဖးဒိၣ်တကလုာ်န့ၣ်လီၤ (၁ မိၤ ၁၂း၁-၂) ႉ စီၤအၤ့ဘၤဟၣ် စူၢ်ယွၤအကလုၢ် ဒီးနာ်အီၤ အဃိ မၤ၀ဲဒ်ယွၤအၢၣ်လီၤအီၤအသိးန့ၣ်လီၤႉ ဒီးအတၢ်အိၣ်မူတစိၤအသး တုၤလၢအသးပှၢ် ၁၇၅ နံၣ် (၁ မိၤ ၂၅း၇) န့ၣ် အိၣ်မူ၀ဲယံၤဒီးအဟံၣ် ဒီးအိၣ်၀ဲလၢဒဲပူၤန့ၣ်လီၤႉ
တမ့ၢ်လၢ ပကဘၣ်တၢ်ကိးထီၣ်ပှၤ ဒ်စီၤအၤ့ဘၤဟၣ်အသိး လၢပကအိၣ်မူ ဟး၀့ၤ၀ီၤ ဃုတၢ်လီၢ်လၢ ဆၣ်ဖိကီၢ်ဖိတဖၣ် ကန့ၢ်တၢ်အီၣ်အဂီၢ်ဘၣ်ႉ ဘၣ်ဆၣ်ဒီး ဖဲပအဲၣ်ဒိးမၤစၢၤမၤဘျုး ဟီၣ်ခိၣ်ချၢ ဒီးပှၤအိၣ်လၢအပူၤတဖၣ်အခါန့ၣ်‚ ပဆၢန့ၢ်အိၣ် ဘၣ် လၢပဟံၣ်ဒီးသူၣ်ထီၣ်ဆီလီၤပသး လၢဟီၣ်ခိၣ်ချၢန့ၣ်လီၤႉ ဒ်ပၢ် စီၤအၤ့ဘၤဟၣ်အသိး ဖဲကလံၤဆူၣ်အူဘၣ် ပဒဲတဂၢၢ်တကျၢၤဒီး မၤဘၣ်စီၣ်ဘၣ်သ့အီၤန့ၣ်‚ ပကွၢ်ထီၣ် လၢတၢ်နာ်ဆူ၀့ၢ်တ၀့ၢ်‚ လၢအကဟဲ ၀့ၢ်လၢဘၣ်တၢ်ဘှီအီၤ လၢကစၢ်ယွၤန့ၣ် သ့၀ဲလီၤ (ဧ့ၤ့ဘံၤ ၁၁း၁၀) ႉ ဒီးဒ်စီၤအၤ့ဘၤဟၣ်အသိး ပဃုထံၣ်တၢ်မုၢ်လၢ် လၢကစၢ်ယွၤ လၢမၤသီထီၣ်က့ၤ အတၢ်ဘၣ်တ့‚ ကတဲာ်ကတီၤထံကီၢ်တကီၢ် လၢအဂ့ၤဒိၣ်တက့ၢ်‚ ဒ်ပစံးတၢ်အသိး‚ မ့ၢ်၀့ၢ်လၢမူခိၣ်န့ၣ်လီၤ ( ၁မိၤ ၁၂း၁၆) ႉ