ပှၤကွဲးတၢ်သး၀ံၣ်ဒီး ပှၤသး၀ံၣ်တၢ်ဖိ ရၠာစးီဘၢးဟဲမလဲး ကွဲးကတိၤဒိၣ် အမိၢ်အဂ့ၢ် လၢ တၢ်သး၀ံၣ်ဖိ‚ ‘‘ပိာ်မုၣ်တဂၤ လၢအဃ့ထုကဖၣ်တၢ်လၢယဂီၢ်’’န့ၣ်လီၤႉ ဖဲလၢ အ၀ဲသ့ၣ် အနီၢ်ဆံးဆံးအခါ အမိၢ်ဃ့ဘါထုကဖၣ်တၢ်လီၤလီၤဆီဆီ လၢအဖိခွါတဖၣ်အဂီၢ် ကိးမုၢ်ဂီၤဒဲး‚ ဖဲတချုးလၢအဟးထီၣ်ဒီး လဲၤ၀ဲ ဆူတၢ်ဒိးထီၣ်သိလ့ၣ်အလီၢ်န့ၣ်လီၤႉ ဖဲမိၢ်သးစၢ်တဂၤအံၤ နၢ်ဟူဘၣ်၀ဲ ဟဲမလဲး သး၀ံၣ်ထီၣ် တၢ်သး၀ံၣ်န့ၣ်‚ ဘျုးလီၤအသး လၢကဃ့တၢ်ထုကဖၣ် လၢအဖိခွါဖိအဂီၢ်န့ၣ်လီၤႉ တၢ်ဘျုးအိၣ်ထီၣ်တခီ မ့ၢ်တၢ်မၤဆူၣ်ထီၣ်သးန့ၣ်လီၤႉ ဘူးလၢအဖိခွါ ကဟးထီၣ်ဆူခိန့ၣ်‚ မိၢ်တဂၤအံၤ ဘါထုကဖၣ် တၢ်လၢအဂီၢ်န့ၣ်လီၤႉ ယဲၢ်မံးနံးအလီၢ်ခံ ဖိခွါဖိ ဟဲက့ၤကဒါက့ၤ ဃုာ်ဒီးဖိသၣ်တဖၣ် လၢအခိးဒိး သိလ့ၣ်ဃုာ်ဒီးအီၤ န့ၣ်လီၤႉ အမိၢ်ကမၢကမၣ် ဒီးသံကွၢ်၀ဲ မ့ၢ်အဘၣ်မနုၤအဃိလဲၣ် အဂ့ၢ်န့ၣ်‚ ဖိခွါဖိ စံးဆၢက့ၤ၀ဲ လၢဖိသၣ်သ့ၣ်တဖၣ်အံၤ မ့ၢ်လၢအမိၢ် တဖၣ် တဘါထုကဖၣ်န့ၣ်အီၤ လၢအဂီၢ်အဃိန့ၣ်လီၤႉ
လၢလံာ်အ့းဖ့းစူးအပူၤ‚ စီၤပီလူးဟ့ၣ်ဂံၢ်ဟ့ၣ်ဘါပှၤ လၢပကဘါထုကဖၣ် ကိးအကတီၢ်ဒဲး လၢကယဲၢ်တၢ်ဘါထုကဖၣ်တဖၣ် (အ့း ၆း၁၈) န့ၣ်လီၤႉ မ့ၢ်တၢ်နဲၣ်လိ ပှၤ လၢတၢ်သန့ၤပသး လၢယွၤကိးမုၢ်နံၤဒဲးန့ၣ် အလီၢ်အိၣ်၀ဲဒၣ်လၢဒူၣ်ဖိထၢဖိတဖၣ် ကမၤ၀ဲလီၤႉ ဖိသၣ်အါဂၤ မၤလိမၤန့ၢ်ဆိတၢ်လၢယွၤ‚ ဖဲအ၀ဲသ့ၣ်ထံၣ်ပှၤအဘူး ကတၢၢ် ဒီးအ၀ဲသ့ၣ်တဖၣ် အတၢ်စူၢ်တၢ်နာ်နီၢ်နီၢ်အဃိန့ၣ်လီၤ (၂ တံၤ ၁း၅) ႉ တၢ်သိၣ်လိပဖိလံၤ လၢတၢ်ထုကဖၣ်မ့ၢ်တၢ်အကါဒိၣ်၀ဲ‚ ခီဖိျ ထုကဖၣ်လၢအ၀ဲသ့ၣ်အဂီၢ် ဒီးတၢ်ထုကဖၣ်သကိးဒီးအ၀ဲသ့ၣ်န့ၣ်‚ ကျဲကဂ့ၤဒိၣ်န့ၢ် အ၀ဲအံၤတအိၣ်ဘၣ်ႉ အ၀ဲအံၤ မ့ၢ်ကျဲအခီၣ်ထံးတဘိစ့ၢ်ကီး လၢအ၀ဲသ့ၣ်ကသ့ၣ်ညါ လိၣ်ဘၣ်တၢ်ဘၣ်ထွဲ တုၤအိၣ်ယွၤ လၢတၢ်စူၢ်တၢ်နာ် လၢအနီၢ်ကစၢ်ဒၣ်၀ဲန့ၣ်လီၤႉ
ဖဲပစးထီၣ်မၤယုၤ ပဖိလံၤသ့ၣ်လၢ ကထုကဖၣ်ဆူယွၤလၢ တၢ်သူၣ်တီသးလိၤ (ကတိၤ ၂၂း၆‚ ၂ တံၤ ၁း၅) န့ၣ် မ့ၢ်ပဟ့ၣ်အ၀ဲသ့ၣ် တၢ်ဟ့ၣ်ဂ့ၤလီၤဆီလၢအ၀ဲသ့ၣ်အဂီၢ်‚ ဒ်အမ့ၢ်တၢ်မၤလီၤတံၢ်ယွၤအတၢ်အိၣ်ဒီးပှၤ‚ ပမူလၢယွၤအပူၤဒီး ယွၤန့ၣ်အဲၣ်ပှၤ‚ ကွၢ်ပှၤ ဒီးဒီဒၣ်အိၣ်ပှိၤပှၤ တဘိယူၢ်ဃီအဂ့ၢ်န့ၣ်လီၤႉ