ဖဲယအီၣ်ဟါတၢ်အီၣ်ဒီး ယတံၤသကိးတဂၤအခါ အ၀ဲတဲဖျါထီၣ် အတၢ်သးဟးဂီၤ အဟံၣ်ဖိဃီဖိတဂၤအဂ့ၢ်လီၤႉ ဘၣ်ဆၣ် အ၀ဲအသးဃၢလၢ ကတဲဆၢကဒါက့ၤတၢ် ဘၣ်ဃး ပှၤ၀ဲအံၤ အတၢ်မၤအ့န့ပှၤသးလုၢ်လၢ် လၢအမ့ၢ်တၢ်တပးကဲဒီး တၢ်နံၤဘၣ် ဖၣ်လဲအီၤ တဖၣ်န့ၣ်လီၤႉ ဖဲအ၀ဲကျဲးစၢး ဒ်သိးကတဲဆၢအီၤအခါန့ၣ် ပှၤအံၤစံးဆၢအီၤ လၢတၢ်ကတိၤဆဲးအဲးတဖၣ်လီၤႉ အ၀ဲ အသးဒိၣ်ဆူၣ်ဆူၣ် ကလဲာ်လီၤႉ ဖဲပဟံးန့ၢ်ပၢၤဃာ် တၢ်ခိၣ်ကိၤန့ၣ် ပှၤခံခီ ခံကပၤလိာ် ဘၣ်ဒိဆါလီၤႉ ဒီးဟံၣ်ဒူၣ် အတၢ်လီၤမုၢ် လီၤဖးစ့ၢ်ကီး ဒိၣ်ထီၣ်အါထီၣ်လီၤႉ
ယတဲကဒါတၢ်အံၤသ့၀ဲ မ့ၢ်လၢယဲစ့ၢ်ကီး ယလဲၤ ခီဖျိ ဘၣ်လံ လၢတၢ်သူၣ်ဒိၣ်သးဖျိးဒ်အံၤအဃိလီၤႉ ယအိၣ်စ့ၢ်ကီး ဒီးတၢ်ဆၢကတီၢ်ကီခဲ လၢတၢ်ဘၣ်ကတိၤဆၢပှၤဂၤလီၤႉ တံၤသကိးတဂၤဂၤ မ့တမ့ၢ် ဟံၣ်ဖိဃီဖိတဂၤဂၤ မ့ၢ်ကတိၤ တၢ်ကတိၤက့ၣ်ကျူတမံၤမံၤန့ၣ် ယအိၣ်ဆၢထၢၣ်ဖဲယလီၢ်ဖးယံာ် တုၤပှၤအ၀ဲန့ၣ် ဟဲဆူယအိၣ် ဒီးတဲတၢ်တမံၤမံၤ မ့တမ့ၢ် မၤတၢ်တမံၤမံၤတစုလီၤႉ တစိၢ်ဖိ၀ံၤ ယတၢ် သူၣ်ဒိၣ်သးဖျိးတဖၣ် ပိၢ်ဖးထီၣ်လီၤႉ
ကမ့ၢ်တၢ်ဒ်န့ၣ်အဃိ ပှၤတၢ်မၢဖိစီၤပီလူးစံး၀ဲ ဖဲအ့းဖ့းစူး ၄း၂၆ လၢ ‘‘သးဒိၣ်ထီၣ်ဒီး မၤကမၣ်တၢ်တဂ့ၤႉ လၢသုတၢ်သးဒိၣ်ထီၣ်န့ၣ် သုတဒုးလီၤနုာ်မုၢ်တဂ့ၤ’’ န့ၣ်လီၤႉ တၢ်ပာ်ပနီၣ် တၢ်ဆၢကတီၢ်အဆၢအကွာ် လၢတၢ်ဂ့ၢ်တ၀ံၤဒံးတဖၣ်အဖီခိၣ်န့ၣ် မ့ၢ်တၢ်ကီၤဃာ် ပတၢ်သူၣ်ဒိၣ်သးဖျိးတဖၣ်လီၤႉ လၢပကဖီၣ်ကျၢၤဃာ် တၢ်ဘၣ်ကမၣ်တမံၤအံၤ လၢအမ့ၢ်တၢ်ခၣ်တဖၣ် အတၢ်သါထီၣ်သါလီၤခီၣ်ထံးန့ၣ်‚ ပဃ့တၢ်မၤစၢၤ လၢကစၢ်ယွၤအအိၣ် ဒ်သိးပကကတိၤ တၢ်မ့ၢ်တၢ်တီလၢ တၢ်အဲၣ်အပူၤသ့၀ဲလီၤ (အ့း ၄း၁၅) ႉ
နအိၣ်ဒီး တၢ်တမုာ်တလၤတမံၤမံၤဒီး ပှၤတဂၤဂၤဧါႉ လၢနကဖီၣ်ကျၢၤဃာ် တၢ်တမုာ်အံၤလၢနပူၤအလီၢ်‚ ဆှၢထီၣ်အီၤအဆိ ဆူယွၤအအိၣ်တက့ၢ်ႉ အ၀ဲကဒုးနၢၤ ကွံာ် နတၢ်သူၣ်ဒိၣ်သးဖျိး အမ့ၣ်အူတဖၣ်ခီဖျိ အတၢ်ပျၢ်တၢ်ကမၣ်ဒီး အတၢ်အဲၣ် အစိကမီၤန့ၣ်လီၤႉ