တယံာ်ဒံးဘၣ် လၢတၢ်တမုၢ်လၢ်အပူၤ ယထံၣ်က့ၤ ယတၢ်ကွဲးနီၣ်တဖၣ် လၢခီလ့ၣ်ကၠိ အခါန့ၣ်လီၤႉ တၢ်ထုးန့ၢ်ယသးလၢယကဟံးန့ၢ်တၢ်ဆၢကတီၢ် ဒီးဖးက့ၤကဒီးအီၤ လီၤႉ ဖဲယဖးက့ၤယတၢ်ကွဲးတဖၣ်န့ၣ်‚ ယထံၣ်လီၤက့ၤယသး လၢမုၢ်မဆါတနံၤအံၤ ယတမ့ၢ်ပှၤ ဒ်သိးလၢညါလၢၤဘၣ်န့ၣ်လီၤႉ ဖဲန့ၣ်အခါ ယဘၣ်ဂဲၤလိာ်သးဒီး တၢ်သယုၢ်သညိ ဒီးတၢ်သးဒ့ဒီ ဘၣ်ဃးဒီးယတၢ်စူၢ်တၢ်နာ်နးနးကျံၤကျံၤ လီၤႉ ဘၣ်ဆၣ် အခဲအံၤ ယကွၢ်လီၤက့ၤဒီး ထံၣ်ယဲထံထံဆးဆးသ့ လၢယွၤစိာ်ခီတ့ၢ်ယၤ ဆူလီၢ်လၢဂ့ၤန့ၢ်အန့ၣ်ဒ်လဲၣ်ဒ်လဲၣ် န့ၣ်လီၤႉ တၢ်အံၤဒုးသ့ၣ်နီၣ်ထီၣ်က့ၤယၤ လၢတၢ်လၢ အဖျါဒိၣ်နးမး လၢမုၢ်မဆါတနံၤအံၤန့ၣ် မုၢ်တနံၤကမ့ၢ်၀ဲပူဖးဒိၣ်တယုၢ် ဘၣ်ဃးဒီးယွၤအတၢ်အဲၣ် လၢအမၤဘျါက့ၤတၢ် န့ၣ်လီၤႉ
ထါစံးထီၣ်ပ့တၢၤ ၃၀‚ မ့ၢ်ထါသ့ၣ်နီၣ်မၤလၤကပီၤ တယုၢ် လၢအကွၢ်က့ၤဆူလီၢ်ခံ‚ လၢတၢ်ကမၢကမၣ်ဒီးတၢ်စံးဘျုးအပူၤ လၢယွၤအတၢ်အုၣ်က့ၤခီၣ်က့ၤ အစိကမီၤလီၤလးအဂ့ၢ်‚ လၢတၢ်ဆူးတၢ်ဆါ ဘၣ်တၢ် မၤဘျါက့ၤ‚ လၢတၢ်သံဆူတၢ်မူ‚ လၢတၢ်စံၣ်ညီၣ်ဆူအတၢ်အဲၣ်‚ လၢတၢ်ဟီၣ်တၢ်ယၢၤ ဆူတၢ်သးခု န့ၣ်လီၤ (း၂-၃‚ ၁၁) ႉ
ပှၤကွဲးထါအံၤမ့ၢ် စီၤဒၤ၀ံးလီၤႉ တၢ်သူၣ်အုးသးအုးအထါတနီၤ လၢလံာ်စီဆှံ အပူၤတဖၣ် ဘၣ်တၢ်ကွဲးလၢအီၤန့ၣ်လီၤႉ ဘၣ်ဆၣ်ဒီး စီၤဒၤ၀ံးလဲၤခီဖျိဘၣ်စ့ၢ်ကီး တၢ်မၤမုာ်မၤဘျါက့ၤတၢ် တုၤဒၣ်လဲာ် အ၀ဲအၢၣ်လီၤ၀ဲလၢ ‘‘မဲာ်ထံမဲာ်နိ ကအိၣ်ကဆိး တနၤ‚ မ့မ့ၢ်လၢမုၢ်ဆ့ၣ်ထီၣ်န့ၣ် တၢ်သူၣ်ဖံှသးညီအိၣ်ထီၣ်၀ဲလီၤ’’ (း၅) ႉ စီၤဒၤ၀ံး တူၢ်ဘၣ်တၢ်ထဲလဲၣ် နာ်သက့‚ အ၀ဲထံၣ်န့ၢ် တၢ်တမံၤ လၢအဒိၣ်န့ၢ်အန့ၣ်လၢအမ့ၢ် ယွၤအစု လၢအစိကမီၤဒိၣ်ဒီးမၤဘျါက့ၤတၢ်န့ၣ်လီၤႉ
တနံၤအံၤ နမ့ၢ်ဘၣ်ဒိဆါဒီး လိၣ်ဘၣ်တၢ်ဟ့ၣ်ဂံၢ်ဟ့ၣ်ဘါန့ၣ်‚ သ့ၣ်နီၣ်ထီၣ်က့ၤ ဆၢကတီၢ်လၢအပူၤကွံာ်တဖၣ် ဖဲယွၤစိာ်ခီနၤ ဆူတၢ်မၤဘျါက့ၤတၢ်န့ၣ်တက့ၢ်ႉ ထုကဖၣ် လၢနကအိၣ်ဒီးတၢ်နာ် လၢယွၤကမၤကဒီးဒ်န့ၣ်အသိးန့ၣ်တက့ၢ်ႉ