ဒ်သးစၢ်လိၣ်ဘိတဂၤအသိး‚ ဖဲတၢ်တၤဖးဒိၣ်တဖၣ် မ့တမ့ၢ် တၢ်ပာ်လီၤသးလၢ အလီၤဘၣ်ယိၣ်ကီခဲတဖၣ် မ့ၢ်လုၢ်ဘၢယၤအခါ‚ ယမိမိၢ် သိၣ်လိန့ၣ်ယၤ လုၢ်လၢ် အဂ့ၤအ၀ါဖိ လၢအမ့ၢ်တၢ်ကွဲးလီၤဒီးထိၣ်ဒံးဘိလၢစးခိအလိၤ‚ ဒ်သိး ကမၤန့ၢ် တၢ်ထံၣ်အဂီၢ်လီၤႉ ဖဲယသးဒ့ဒီတၢ် ဘၣ်ဃးဒီး တၢ်မၤလိလၢ ယကထီၣ်‚ တၢ်မၤ လၢယကဘၣ်ဃုထၢမၤ‚ မ့တမ့ၢ် သးပှၢ်အကတီၢ် အတၢ်မၤအသးသ့ၣ်တဖၣ် လၢအလီၤပျံၤလီၤဖုးအခါ‚ ယမၤလိန့ၢ် ယမိၢ်အလုၢ်အလၢ်ဖိ လၢအကွဲးလီၤ တၢ်ဂ့ၢ် အခီၣ်ထံးတဖၣ်‚ ဒီးတၢ်လၢပမၤအီၤသ့‚ ဒီးတၢ်လၢ ကပိာ်ထွဲထီၣ်အခံသ့ သ့ၣ်တဖၣ်လီၤႉ ယလူၤလီၤဂၢ်လီၤ ယသးလၢစးခိလံာ်ကဘျံးပၤအလိၤ၀ံၤန့ၣ်‚ ယသုးဆူ တၢ်ဂ့ၢ်ကီခဲအလီၢ်ခံတစဲး ဒီးကွၢ်အီၤ‚ တမ့ၢ် ဒ်ယတၢ်သးကလၢၢ်ဆှၤယၤ အသိးဘၣ်‚ မ့မ့ၢ်လၢတၢ်သ့ထံၣ်တၢ် တီတီအပူၤန့ၣ်လီၤႉ
ဒ်တၢ်ကွဲးနီၢ်ယတၢ်ဆိကမိၣ်တဖၣ် လၢလံာ်ခီအလိၤ ဟ့ၣ်တ့ၢ်ယၤ တၢ်ထံၣ်အသီအသိးန့ၣ်‚ တၢ်ဂၢ်လီၤပသးဆူယွၤအအိၣ် လၢတၢ်ထုကဖၣ်န့ၣ် မၤစၢၤပှၤ ဒ်သိးပကန့ၢ်ဘၣ် ယွၤအတၢ်ထံၣ်ဒီး ဒုးသ့ၣ်နီၣ်ထီၣ်ပှၤ ယွၤအစိအကမီၤ န့ၣ်လီၤႉ စီၤပၤစီၤဃံးစကံယၤ မၤတၢ်ဒ်သိးအံၤ‚ ဖဲအ၀ဲဒိးန့ၢ်လံာ်ပရၠာစးၢ လၢဒုၣ်ဒါ လၢအကဟဲမၤအၢတၢ်တဖၣ်အအိၣ်အခါန့ၣ်လီၤႉ ပှၤအၤ။ၢ်ဖိတဖၣ် စံးပျံၤစံးဖုး လၢအကဟဲမၤဟးဂီၤ ၀့ၢ်ယ့ှူၤ့ှှလ့ၣ်‚ ဒ်အ၀ဲသ့ၣ် မၤဟးဂီၤတ့ၢ် ကီၢ်အဂုၤအဂၤ အါဘ့ၣ်လံအသိးန့ၣ်လီၤႉ စီၤပၤစီၤဃံးစကံယၤ သလၣ်ထီၣ်လံာ် လၢကစၢ်ယွၤ အမဲာ်ညါ‚ ဃ့ဘါထုကဖၣ် လၢယွၤကအုၣ်က့ၤခီၣ်က့ၤ ပှၤဂီၢ်မုၢ်တဖၣ်‚ ဒ်သိးဟီၣ်ခိၣ်ကသ့ၣ်ညါ လၢယွၤမ့ၢ် ‘‘ကစၢ်ယွၤထဲနၤတဂၤဧိၤလီၤ’’ ( ၂ စီၤ ၁၉း၁၉) ႉ
ဖဲပဘၣ်ကွၢ်ဆၢၣ်မဲာ်ဒီး တၢ်မၤအသး လၢအဟဲစိာ်န့ၣ် တၢ်သူၣ်ကိၢ်သးဂီၤ‚ တၢ်ပျံၤတၢ်ဖုး‚ မ့တမ့ၢ်တၢ်သ့ၣ်ညါ လၢပကလဲၤခီဖျိတၢ်အံၤအဂီၢ် ပကလိၣ်ဘၣ် တၢ် အါန့ၢ်တၢ်လၢအအိၣ်ဒီးပှၤလီၤန့ၣ်‚ မ်ပပိာ်စီၤပၤစီၤဃံးစကံယၤအခီၣ်လီၢ် ဒီးဃ့ၢ်လိၤလိၤ ဆူယွၤအအိၣ်တက့ၢ်ႉ ဒ်အ၀ဲဒၣ်အသိး‚ ပ၀ဲစ့ၢ်ကီး ပပာ်လီၤပတၢ်ကီတၢ်ခဲ လၢယွၤအမဲာ်ညါ ဒီးနာ်လၢအ၀ဲကဆှၢပခီၣ်ခါ ဒီးမၤမုာ်မၤခုၣ်လီၤ ပသူၣ်ပသးသ့၀ဲလီၤႉ