‘‘ယပျံၤတၢ်အနီၢ်ကီၢ်လီၤ’’မ့ၢ်သးစၢ်မုၣ်ဖိတဂၤအတၢ်ကွဲးဒုးသ့ၣ်ညါအတံၤသကိး တဖၣ်လၢ ဖ့းဘိး အဖီခိၣ်‚ လၢအစံးဘၣ် အ၀ဲသ့ၣ်ညါ အ၀ဲကဘၣ်လဲၤခီဖျိ ကသံၣ်သရၠာစးၣ် အတၢ်သမံသမိး တၢ်ဆူးတၢ်ဆါန့ၣ်လီၤႉ အ၀ဲဘၣ် ကွၢ်ဆၢၣ်မဲာ် တၢ်ကတီၣ်ထီၣ်အီၤလၢတၢ်ဆါဟံၣ်ဒီးတၢ်ကသမံသမိးအီၤ တပတီၢ်ဘၣ်တပတီၢ်လၢ ၀့ၢ်လၢ အစီၤစုၤဒီး အဟံၣ်သၢနၣ်ရၠာစးံၣ်ကျဲဒီး လၢတၢ်ဘၣ်ယိၣ်ဘၣ်ဘီအပူၤ‚ အ၀ဲအိၣ်ခိး ဖဲကသံၣ်သရၠာစးၣ်တဖၣ် ဃုထံၣ်သ့ၣ်ညါ တၢ်ဆူးတၢ်ဆါ လၢအမၤတံာ်တာ်အီၤတဖၣ်အခါန့ၣ်လီၤႉ
ပ၀ဲမတၤတဂၤ‚ လၢသးစၢ်အကတီၢ် မ့တမ့ၢ် သးပှၢ်ထီၣ်တစဲး‚ လၢအတအိၣ်ဒီး တၢ်ဘၣ်ယိၣ်ဘၣ်ဘီ ဒ်သိးအံၤ ဖဲပဘၣ်ကွၢ်ဆၢၣ်မဲာ်တၢ်မၤအသးဒီးပှၤ လၢ ပတလိၣ်ဘၣ်အီၤ လၢအလီၤပျံၤန့ၣ်လဲၣ်‚ ဒီးပထံၣ်န့ၢ် တၢ်မၤစၢၤသ့ဖဲလဲၣ်‚ လၢတၢ်မၤအသးဒ်အံၤအကတီၢ်‚ ပထံၣ်န့ၢ် တၢ်မၤမုာ်ပသး လၢလံာ်စီဆှံပူၤလၢအဟ့ၣ် ဆူၣ်ထီၣ် ပဂံၢ်ပဘါဒ်လဲၣ်ႉ
တၢ်မ့ၢ်တၢ်တီ လၢအမ့ၢ်ယွၤကလဲၤဃုာ်ဒီးပှၤ လၢ ပတၢ်ကွၢ်ဆၢၣ်မဲာ်အပူၤ ကဟ့ၣ်ပှၤတၢ်မုၢ်လၢ်န့ၣ်လီၤႉ ၀ံယ့ှှါယၤ ၄၁း၁၃‚ စံးဘၣ်ပှၤ ‘‘အဂ့ၢ်ဒ်အံၤ‚ ယဲဒၣ်ယွၤ နကစၢ်အံၤ ယဟံးဃာ်နစုထွဲ‚ ဒီးစံးလၢနၤပျံၤတၢ်တဂ့ၤ‚ ယမၤစၢၤလံနၤလံ’’/
အါန့ၢ်အန့ၣ်‚ ကစၢ်ယွၤအၢၣ်လီၤ လၢကဟ့ၣ်ပှၤတၢ်သူၣ်မံသးမုာ် လၢအဒီသဒၢပသး လၢတၢ်တဲဖျါအီၤ လၢအဂ့ၢ်တသ့‚ ဖဲပတဲဖျါထီၣ် ပတၢ်ကီတၢ်ခဲတဖၣ် လၢပတၢ်ထုကဖၣ်အပူၤန့ၣ်လီၤ (ဖံ ၄း၆-၇) ႉ
ခီဖျိယွၤအိၣ်ဒီးပှၤထီဘိဒီး အတၢ်ဃူတၢ်ဖိးလၢ အပၢၤပသူၣ်ပသးဒီး ပဆိကမိၣ် တၢ်န့ၣ် (း၇) ‚ ပကထံၣ်န့ၢ်တၢ်မုၢ်လၢ် ဒီးတၢ်မၤစၢၤ လၢပလိၣ်ဘၣ် ဒ်သိးပကကွၢ် ဆၢၣ်မဲာ်ဒီးတူၢ်တၢ် လၢပပျံၤအီၤတဖၣ်ကသ့အဂီၢ်န့ၣ်လီၤႉ