ဖိသၣ်ဖိတဂၤ ဖဲအမၤဒိးတၢ် ဒ်သိးမိၢ်ပၢ်တဖၣ်မၤ၀ဲန့ၣ်ဒီး‚ တဖျါလီၤအဲၣ်လီၤကွံဘၣ် န့ၣ်ဧါႉ အါစုအါဘျီ‚ ပထံၣ်ဘၣ် ဖိသၣ်ဖိ ပိာ်အပၢ်အခံလၢ သိလ့ၣ်ပူၤ‚ မၤ၀ဲဒ်အပၢ် နီၣ်သိလ့ၣ်အသိး ဒီးကွၢ်၀ဲထံးထံးဆးဆး တၢ်လၢအပၢ်ကမၤကဒီးတၢ်ဆူညါမနုၤ ဒ်လဲၣ်န့ၣ်လီၤႉ
ယတၢ်သ့ၣ်နီၣ် ဆှၢက့ၤယၤလၢ ဖဲယမ့ၢ်ဒံး ဖိသၣ်ဆံးအခါ ယမၤစ့ၢ်ကီးယဲဒ်န့ၣ်အသိးန့ၣ်လီၤႉ တၢ်ဂုၤဂၤမနုၤ တမံၤမး တမၤမုာ်ယသးထဲသိး ယမၤဒိးဘၣ်ယပၢ်‚ ဒီးယသ့ၣ်ညါလီၤတံၢ် လၢအ၀ဲသးခုဒိၣ်န့ၣ်ဒံးယၤ ဖဲလၢ အထံၣ်ဘၣ် ယမၤဒိးအီၤန့ၣ်လီၤႉ
ယဆိကမိၣ်လၢ ကစၢ်ယွၤကသးခုစ့ၢ်ကီး ဖဲအ၀ဲ ထံၣ်ဘၣ် ဖိခွါလၢအအဲၣ်ဘၣ်၀ဲဒိၣ်ကတၢၢ်တဂၤ မၤလီၤတံၢ် လီၤဆဲး ဒ်အ၀ဲမၤအသိး‚ လဲၤဆူပှၤလၢအတၢ်မုၢ်လၢ်လီၤမၢ် တဖၣ်အအိၣ်‚ မၤစၢၤပှၤလၢအလိၣ်ဘၣ် တၢ်မၤစၢၤတဖၣ် ဒီးမၤဘျါက့ၤပှၤဆူးပှၤဆါတဖၣ်န့ၣ်လီၤႉ ကစၢ်ယ့ၣ်။းစံး‚ ‘‘ဖိခွါမၤဒၣ်တၢ်တသ့ဘၣ်နီတမံၤဘၣ်‚ မၤ၀ဲသ့ထဲတၢ်လၢ အထံၣ်လၢပၢ်မၤန့ၣ်လီၤႉ အဂ့ၢ်ဒ်အံၤ‚ ဖဲဒၣ်ပၢ်မၤတၢ်တမံၤ လၢ်လၢ်န့ၣ်‚ ဖိခွါမၤစ့ၢ်ကီး၀ဲလီၤ’’ (ယိၤ ၅း၁၉) /
ပ၀ဲဒၣ်စ့ၢ်ကီး ပဘၣ်တၢ်ကိးပှၤ လၢပကမၤတၢ် တမံၤဃီ‚ ‘‘မၤသးဒ်န့ၣ်ဒီး‚ ကဲထီၣ်ပှၤကွၢ်လိယွၤ ဒ်ဖိသးဘိအသိးန့ၣ်တက့ၢ်‚ လဲၤသု၀ဲ လၢတၢ်အဲၣ်တၢ်ကွံအပူၤ’’ (အ့း၅း၁-၂) /ဖဲပဒိၣ်ထီၣ်လၢနီၢ်သး ဒ်သိးပကလီၤဂာ် အါထီၣ်ဒီးခရၠာစးံာ်န့ၣ်‚ မ်ပကအဲၣ်ပှၤဂၤ ဒ်ယွၤအဲၣ်ပှၤအသိး‚ ပျၢ်ပှၤဂၤ ဒ်ယွၤပျၢ်ပှၤအသိး‚ ကဟုကယာ်ပှၤဂၤ ဒ်ယွၤကဟုကယာ်ပှၤအသိး ဒီးအိၣ်မူဒ်အ၀ဲဒၣ်ဘၣ်အသးတက့ၢ် / မ့ၢ်မးတၢ် လၢအမၤမုာ်ပသး ဒ်သိးပကမၤ ဒ်အ၀ဲဒၣ်မၤအသိး‚ လၢသးစီဆှံ အစိကမီၤအပူၤ‚ လၢပအိၣ်ဒီးတၢ်သ့ၣ်ညါ လၢပကန့ၢ်ဘၣ်တၢ်ဘျူးတၢ်ဖှိၣ် လၢအမ့ၢ်‚ ပၢ်အတၢ်နံၤကမှံဒီး အတၢ်အဲၣ်န့ၣ်လီၤႉ