ဖဲပှၤတ့တၢ်စဲၣ်နီၤဖးဒိၣ်မဲးကၢၣ်အဲကၠလိၣ် စူးကွံာ်အသးအခါန့ၣ် ပာ်လီၤတဲာ်တ့ၢ် အတၢ်တိာ်ကျဲၤ လၢအတမၤ၀ံၤဘၣ်အိၣ်၀ဲအါအါဂီၢ်ဂီၢ်လီၤႉ ဘၣ်ဆၣ်ဒီး လၢအကျါန့ၣ် တၢ်စိးပျၤ လၢတမ့ၢ်တၢ်ကဘၣ်မၤ၀ံၤအီၤ နီတစုဘၣ်န့ၣ် အိၣ်၀ဲလွံၢ်ခါလီၤႉ ကုၢ်လၢ အအိၣ်ဒီးနိးဆူၣ်ခၣ်ဆူၣ်‚ ကုၢ်လၢအလံာ်ဟီၣ်ခိၣ်ဂီၤ‚ ကုၢ်လၢအအိၣ်ဒီးကုၢ်သးစၢ်ဖိ အဂီၤ စိးပျၤအသးတဖၣ်န့ၣ်လီၤႉ မ့ၢ်ဖျါလၢ တၢ်စိးပျၤအီၤ တ၀ံၤဘၣ်ဆၣ်‚ မ့ၢ်ဒၣ်တၢ်လၢ မဲးကၢၣ်အဲကၠလိၣ်အဲၣ်ဒိး ပာ်၀ဲဒၣ်ဒ်န့ၣ်အသိးလီၤႉ ပှၤတ့တၢ်အံၤ အဲၣ်ဒိးပာ်ဖျါ၀ဲ တၢ်ကဲဘၣ် ပှၤအကုၢ်လီၤထူလီၤယိာ်န့ၣ် မ့ၢ်အကမၤအသး ဒ်လဲၣ်အဂ့ၢ်လီၤႉ
ကစိးပျၤ၀ဲတၢ်ဂီၤစၢဃာ်အသးလၢ ထးသွဲအလီၢ်န့ၣ်‚ မဲးကဲၣ်အဲကၠလိၣ် မၤအိၣ်ထီတံၢ်ဃး တၢ်ဂီၤတဖၣ်လၢ လၢၢ်စိးပျၤအီၤအပူၤန့ၣ်လီၤႉ ပှၤအနီၢ်ခိဟဲထီၣ်လၢလၢၢ်ပူၤ ဘၣ်ဆၣ်ဒီး အ၀ဲသ့ၣ်မၤထူၣ်ဖျဲးထီၣ်အသးတန့ၢ်နီတစုဘၣ်ႉ တၢ်ဒိသူၣ်ဒိသးဘၣ်‚ ကုၢ်တဖၣ် ဂဲၤထီၣ်လၢယသးပူၤ သတူၢ် ကလာ်လီၤႉ အ၀ဲသ့ၣ် အတၢ်ကီတၢ်ခဲတၢ်ကိၢ်တၢ်ဂီၤန့ၣ်‚ တလီၤဆီန့ၣ်ယတၢ်ဂဲၤလိာ်ဒီး တၢ်ဒဲးဘးန့ၣ်ဘၣ်ႉ
ယမၤထူၣ်ဖျဲးထီၣ်ကွံာ်ယသး လၢတၢ်ဒဲးဘးန့ၣ်တန့ၢ်ဘၣ်ႉ လီၤဂာ်ဒ်ကုၢ်တဖၣ် အသိးန့ၣ်‚ ယအိၣ်စဲတံၢ်စဲထီဃးန့ၣ်လီၤႉ ယသးအတၢ်သိၣ်တၢ်သီ မၢကဲကုၢ်ယၤ လၢတၢ်ဒဲးဘး အတၢ်သိၣ်တၢ်သီလၢယဂီၤတဖၣ်အပူၤလီၤ (ရၠာစးိမ့ၤ ၇း၂၃) ႉ ယကျဲးစၢး ဆူၣ်ဆူၣ် ထဲလဲၣ်ထဲလဲၣ်ဘၣ်ဆၣ်‚ ယဆီတလဲယနီၢ်ကစၢ်ဒၣ်ယဲတန့ၢ်ဘၣ်ႉ ဘၣ်ဆၣ်ဒီး မ့ၢ်ယွၤအဘျုးအဖှိၣ်လီၤႉ နၤဒီးယၤအံၤ တမ့ၢ်ပကအိၣ်ထီဒ်တၢ်ဂီၤစိးပျၤအသးလၢ အတ၀ံၤန့ၣ်အသိးဘၣ်ႉ တချုးပတုၤဆူ မူခိၣ်န့ၣ်‚ ပတလၢတပှဲၤဒံးဘၣ်ႉ ဘၣ်ဆၣ်ဒီး အကတီၢ်ခဲအံၤ‚ ဒ်ပပျဲ ယွၤအသးမုၢ်စီဆှံ အတၢ်ဆီတလဲပှၤန့ၣ်‚ ကစၢ်ယွၤ ကလဲလိာ် က့ၤပှၤလီၤႉ ကစၢ်ယွၤအၢၣ်လီၤလၢ ကမၤ၀ံၤတၢ်မၤအဂ့ၤ လၢအစးထီၣ်တ့ၢ်၀ဲ လၢပပူၤန့ၣ်လီၤႉ