ဖဲပဖိခွါဖိစ့ၤဘံယၢၣ်ဟးခါတီၤတၢ်အတီၢ်န့ၣ်‚ ပဒူၣ်ဖိထၢဖိလဲၤဟးဆူ မီထၢၣ်ရၠာစး့ ပီၣ်လဲၣ်က့ၣ်ကျီၤ တၢ်ကွၢ်ကီညၣ်အလီၢ်န့ၣ်လီၤႉ ဖဲပနုာ်လီၤဆူ တၢ်သူၣ်ထီၣ်အပူၤဒီး ယယူာ်ဃီၤယစုဆူညၣ်အဂီၤ အိၣ်ဘျးလီၤစဲၤသးလၢဃီးခိၣ်ဒါ ဒီးစံး ‘‘ကွၢ်လၢန့ၣ်ႉႉႉ ပီၣ်လဲၣ်ညၣ်တီသွှလၢအပျိၢ်ကပီာ်တဘ့ၣ်’’ န့ၣ်လီၤႉ
စ့ၢ်ဘံယၢၣ် အမဲာ်ကျိၣ်ထီၣ်ဒီး စံး၀ဲ‚ ‘ဒိၣ်နးလဲၣ်’ န့ၣ်လီၤႉ ယကမၢကမၣ်တစဲးဒီး ဆိကမိၣ် လၢကမ့ၢ်ဒၣ် အနၢ်ဟူ ပတဲတၢ်ဒ်န့ၣ်အဃိန့ၣ်လီၤႉ ပကမၢကမၣ်လၢ ပဖိဟးခါတီၤတၢ်တဂၤအံၤ ပတပာ်သူၣ်ပာ်သးသိၣ်လိအီၤ တၢ်ကတိၤတဖျၢၣ်အံၤ နီတဘျီဒံးဘၣ်ဆၣ် အ၀ဲတိၢ်နီၣ်မး တၢ်ကတိၤအဖျၢၣ်တဖၣ်န့ၣ်လီၤႉ
လၢ ၅ မိၤဒီး ၆ အပူၤန့ၣ်‚ ကစၢ်ယွၤမၢန့ၢ်ဆီၣ်ခံ အပှၤဂီၢ်မုၢ်လၢ ကပာ်သူၣ်ပာ်သးသပှၢ်ကတၢၢ်ဒီး သိၣ်လိစၢၤ မူသီသးစၢ်ဖိတဖၣ်လၢ ကသ့ၣ်ညါစူၢ် ကစၢ်ယွၤ အကလုၢ်အိၣ်ကွဲးအသးတဖၣ်န့ၣ်လီၤႉ တုၤပှၤအံၣ်စရၠာစး့လးဖိတဖၣ် အတၢ်သ့ၣ်ညါယွၤအါထီၣ်န့ၣ်‚ အ၀ဲသ့ၣ်ဒီး အဖိတဖၣ် အသးကဆူၣ်ထီၣ်အါထီၣ်လၢ တၢ်ယူးယီၣ်ပာ်ဒိၣ်ကစၢ်ယွၤ လၢယွၤအတၢ်ဟ့ၣ်‚ အဟဲခီဖျိတၢ်သ့ၣ်ညါအီၤ ဘူးဘူး တံၢ်တံၢ်‚ အဲၣ်အီၤလၢသူၣ်လၢသးဒီး ပိာ်အခံ‚ စူၢ်အကလုၢ်န့ၣ်လီၤ ( ၅ မိၤ ၆း၂-၅) ႉ
တၢ်ပာ်သူၣ်ပာ်သး‚ စုၣ်လီၤဘျၢလီၤ ပသးပတၢ်ဆိကမိၣ်လၢ ကစၢ်ယွၤ အကလုၢ်ကထါ (၅ မိၤ ၆း၆) န့ၣ် ပကန့ၢ် ကတဲာ်ကတီၤသး ဂ့ၤအါထီၣ် လၢပကဟ့ၣ်နီၤ ကစၢ်ယွၤအတၢ်အဲၣ် ဒီးတၢ်မ့ၢ်တၢ်တီ ဆူဖိသၣ်တဖၣ်အအိၣ် လၢတနံၤဘၣ်တနံၤ အတၢ်ဖံးတၢ်မၤ‚ တၢ်ဟူးတၢ်ဂဲၤအပူၤန့ၣ်လီၤ (၅ မိၤ ၆း၇) ႉ တၢ်လဲၤလၢညါလၢ ဒိဂ့ၤတဲာ်ဘၣ်န့ၣ်‚ ပမၤလၢထီၣ်ပှဲၤထီၣ်‚ မၤဆူၣ်ထီၣ် ပှၤသးစၢ်တဖၣ် ဒ်သိးကသ့ၣ်ညါဒီး ပာ်ကဲကစၢ်ယွၤအကလုၢ်ကထါ‚ အစိကမီၤ‚ တၢ်မ့ၢ်တၢ်တီလၢ တဆီတလဲအသးဘၣ်‚ လီၤပလိာ်ဒီး စိၤခ့ခါလီၤ (၅ မိၤ ၆း၈-၉) ႉ
ကစၢ်ယွၤအကလုၢ်ကထါ မ့ၢ်ဟဲထီၣ်လဲၤဘ@ဒၣ်၀ဲလၢပသး ဒီးပထးခိၣ် အတၢ်ကတိၤန့ၣ်‚ ပပာ်လီၤတဲာ်ပတၢ်စူၢ်တၢ်နာ်အတၢ်န့ၢ်သါ ဒီးတၢ်ဟ့ၣ်ခီလီၤဆူ ပှၤတစိၤဘၣ်တစိၤအဂီၢ်ကသ့၀ဲဒၣ်န့ၣ်လီၤ (၅ မိၤ ၄း၉) ႉ