လၢတၢ်မၤလၤကပီၤ ၀့စတၢၣ်ခၠၢးခၠ့‚ အတၢ်အိၣ်ဖျဲၣ်ဆၢက့ၤ ၈၀ ၀ီတ၀ီန့ၣ် ကီၢ်အဲကလံး အမီဘျီၣ်ဒိၣ် ဟ့ၣ်မူဟ့ၣ်ဒါ ့ကှဟဲမ် စူထၢၣ်လဲလၢ အကတ့န့ၢ် ထံကီၢ်ခိၣ်နၢ်ယူးယီၣ်ဒိၣ် တဂၤအံၤအဂီၤန့ၣ်လီၤႉ ခၠၢးခၠှ သံကွၢ် ပှၤတ့တၢ်တဂၤအံၤ‚ နကတ့ယဂီၤဒ်လဲၣ်ႉ နကတ့လီၤဂာ် ဒ်ဖိသၣ်ဖိအသိးဧါ‚ မ့တမ့ၢ် ထွံၣ်လာ်အၢဂံၢ်ဆူၣ်ဧါန့ၣ်လီၤႉ ခၠၢးခၠှန့ၣ်ဘၣ်သး၀ဲဒိၣ်မး လၢအမံၤခံဖျၢၣ်အံၤ လၢပှၤကိးအီၤန့ၣ်လီၤႉ ဘၣ်ဆၣ်ဒီး စူထၢၣ်လဲ စံး၀ဲ‚ ယကတ့တၢ် ဒ်ယထံၣ်နၤ အသိးလီၤႉ
တုၤအတ့၀ဲ၀ံၤဒီး ခၠၢးခၠှ တဘၣ်အသးဘၣ်ႉ တၢ်ဂီၤ လၢ စူထၢၣ်လဲ တ့န့ၣ် ဒ်ခၠၢးခၠ မ့ၢ်တၢ်အသိး အ၀ဲဆ့ၣ်နီၤ ဘီၣ်အုးထုးလၢလီၢ်ဆ့ၣ်နီၤအပူၤ အိၣ်ဒီးအမဲာ်ပာ်ညီနုၢ်၀ဲ လာ်အၢသံဒီး ကွၢ်တၢ်လၢ အမဲာ်တူၢ်ကဒုလာ်အပူၤလီၤႉ ပှၤတ့တၢ် တတ့ဂ့ၤတ့ပ့တၢၤအီၤဘၣ်ႉ ဖဲတၢ်ပာ်ဖျါထီၣ်တၢ်ဂီၤအံၤ လၢကမျၢၢ်အမဲာ် ညါ၀ံၤန့ၣ်‚ ခၠၢးခၠှပာ်ခူသူၣ်တၢ်ဂီၤအံၤ‚ လၢခံဘၣ်တၢ်မၤဟးဂီၤကွံာ်အီၤ ကစုဒုန့ၣ်လီၤႉ
ဒ်ခၠၢးခၠှအသိး ပ၀ဲအါဂၤ ပအိၣ်ဒီးပဂီၤဒၣ်၀ဲ လၢပအဲၣ်ဒိးပှၤဂၤကထံၣ်ဖျါ ဒ်ပှၤမၤန့ၢ်မၤနၢၤတၢ်‚ ပှၤပျံၤယွၤပာ်ဒိၣ်ယွၤ‚ ပှၤအိၣ်ဒီး တၢ်ဃံတၢ်လၤ‚ ပှၤအဂံၢ်ဆူၣ်ဘါဆူၣ် တမံၤမံၤန့ၣ်လီၤႉ ပကအဲၣ်ဒိးပာ်ခူသူၣ်ပတၢ်အိၣ်မူ လၢအလာ်အၢတကပၤ န့ၣ်လီၤႉ ဘၣ်သ့ၣ်သ့ၣ် လၢပသးအကံၢ်အလဲပူၤ ကအိၣ်၀ဲဒီးတၢ်ပျံၤတၢ်ဖုးလၢ ပှၤမ့ၢ် သ့ၣ်ညါပှၤ ဒ်ပမ့ၢ်တၢ်နီၢ်နီၢ်အသိးန့ၣ် ပှၤတအဲၣ်ဘၣ်ဖုးပှၤဘၣ်န့ၣ်လီၤႉ
ဖဲပှၤအံၣ်စရၠာစး့လးဖိတဖၣ် ဘၣ်တၢ်စိာ်မၢကဲကုၢ်အီၤဆူ ကီၢ်ဘၤဘူၤလိၣ်န့ၣ် တၢ်ထံၣ်အီၤဒ်တၢ်အိၣ်မူ အနးအကျံၤအကတီၢ်လီၤႉ မ့ၢ်လၢ အ၀ဲသ့ၣ်အတၢ်ဒဲးဘး အဃိ ယွၤပျဲအဒုၣ်အဒါ ကမၤနၢၤကွံာ်အ၀ဲသ့ၣ်လီၤႉ ဘၣ်ဆၣ် ကစၢ်ယွၤစံးဘၣ် အ၀ဲသ့ၣ်လၢပျံၤတၢ်တဂ့ၤန့ၣ်လီၤႉ အ၀ဲသ့ၣ်ညါအပှၤဂီၢ်မုၢ်တဂၤဘၣ်တဂၤစုာ်စုာ် လၢအမံၤန့ၣ်လီၤႉ ဒီးအိၣ်၀ဲဒီးအီၤ ဖဲအဘၣ်တၢ်ဆီၣ်လီၤအီၤန့ၣ်လီၤ (ယရၠာစးှါ ၄၃း၁-၂) ႉ အ၀ဲသ့ၣ် အိၣ်ပူၤဖျဲး လၢကစၢ်အစုတီၤလိၤ (၄၃း၁၃) ႉ ဒီးမ့ၢ်တၢ်လုၢ်ဒိၣ်ပရၤဒိၣ်လၢယွၤအမဲာ်ညါလီၤ (၄၃း၄) ႉ အ၀ဲသ့ၣ်လာ်အၢဘၣ်ဆၣ် ယွၤအဲၣ်အီၤလီၤႉ ဖဲတၢ်မ့ၢ်တၢ်တီအံၤ မ့ၢ်အိၣ်လီၤဘျၢလၢပပူၤန့ၣ် ပကထံၣ်လီၤပသး လၢပတၢ်သူၣ်ဆူၣ်သးဂဲၤစှၤ လၢပကဃုပှၤဂၤ အတၢ်ဘၣ်သူၣ်ဘၣ်သးအဂီၢ်လီၤႉ ယွၤသ့ၣ်ညါပှၤဒ်ပမ့ၢ်တၢ်အသိး ဒီးအဲၣ်ဒံးဒၣ်ပှၤ လၢတၢ်အဲၣ်အထူအယိာ် လၢပထိၣ်အီၤတန့ၢ်ဘၣ်န့ၣ်လီၤ (အ့း ၃း၁၈) ႉ