တၢ်ဆဲးတၢ်လၤတနီၤနီၤအပူၤ ပှၤလၢအသးစၢ်တဂၤန့ၣ် အကဟ့ၣ် ပှၤလၢအဒိၣ်န့ၢ်အီၤ တဂၤ ကနုာ်လီၤဆူဒၢးပူၤ လၢအဆိန့ၣ်လီၤႉ မ့မ့ၢ်လၢအဂၤတခီ‚ ပှၤအကါဒိၣ်ကတၢၢ် (မ့) ပှၤလီၢ်လၤအဒိၣ်ကတၢၢ်တဂၤန့ၣ် နုာ်လီၤ၀ဲ အဆိကတၢၢ်လီၤႉ ပတၢ်လီၤစၢၤ ဖဲကမိၣ်မ့ၢ်သးမ့ၢ်‚ ဆၢကတီၢ်အိၣ်၀ဲဒၣ် လၢပကထံၣ်ဘၣ် တၢ်ကီတၢ်ခဲဘၣ်ပှၤ လၢပကပျဲပှၤတဂၤဂၤ ကဃုထၢတၢ်အဆိကတၢၢ် လၢ တၢ်ဂ့ၢ်အကါဒိၣ်န့ၣ်လီၤႉ လီၤဆီဒၣ်တၢ် ဖဲတၢ်ခွဲးတၢ်ယာ် လီၤဆီအံၤ မ့ၢ်ပတၢ်အခါန့ၣ်လီၤႉ
စီၤအၤ့ဘၣ် (လၢခံက့ၤဘၣ်တၢ်ကိး စီၤအၤ့ဘၤဟၣ်) ဒီးအဖိဒိၣ်ခွါစီၤလိာ်‚ အ၀ဲသ့ၣ်အိၣ်ဒီး အသိတဖၣ် အဂီၤဖံး တဖၣ်ဒီး အဒဲတဖၣ် လၢတၢ်လီၢ်တၢ်ကျဲတလၢ၀ဲ ဒ်သိး ကလဲၤဃုာ်တၢ်ဒ်သိးသိးဘၣ်လီၤႉ လၢတၢ်ကBတီ တၢ်အ့ၣ် လိာ်ဆိးက့ သုတအိၣ်ထီၣ်အဂီၢ်‚ စီၤအၤ့ဘၣ် ဟ့ၣ်ထီၣ် တၢ်ကူၣ် လၢကလီၤဖးသကိး‚ ဒီးဟ့ၣ်အခွဲး လၢအဖိဒိၣ်ခွါ လၢတၢ်သးအိၣ်ဖးဒိၣ်အပူၤ ဒ်သိးကဃုထၢ တၢ်လီၢ်တၢ်ကျဲ အဆိကတၢၢ်လီၤႉ အဖိဒိၣ်ဃုထၢ ဟီၣ်ခိၣ်ညၣ်ထ့ၣ်ဂ့ၤ၀ဲ အလီၢ် လၢအမ့ၢ်ယၢ်ဒ့ၣ်အပျီ‚ ပျဲစီၤအၤ့ဘၣ်ဟံးန့ၢ် တၢ်လီၢ်လၢ တလီၤဘၣ်သးကဲၣ်ဆိးဘၣ်န့ၣ်လီၤႉ
စီၤအၤ့ဘၣ် တဟံးန့ၢ်ဆူၣ် အတၢ်ခွဲးတၢ်ယာ် ဒ်အမ့ၢ်ပှၤအဒိၣ်တဂၤဘၣ်‚ မ့မ့ၢ် နာ်လီၤ အတၢ်အိၣ်မူခါဆူညါ လၢယွၤအစုပူၤန့ၣ်လီၤႉ ‘ဒီးစီၤအၤ့ဘၣ်စံးဘၣ် စီၤလိာ်‚ ယဃ့ကညးနၤ‚ မ်တၢ်အ့ၣ်လိာ်ဆိးက့လိာ်သု တအိၣ်ဒီးယၤဒီးနၤ ႉႉႉ ကီၢ်တဘ့ၣ်အံၤအိၣ်လၢ နမဲာ်ညါဒီဘ့ၣ်ညါတမ့ၢ်ဘၣ်ဧါႉ မၤလီၤဖးလၢ်နသးဒီးယၤတက့ၢ်ႉ မ့မ့ၢ်လၢ စုစ့ၣ်တခီဒီး‚ ယကလဲၤဆူစုထွဲတခီလီၤႉ မ့မ့ၢ်လၢစုထွဲတခီဒီး‚ ယကလဲၤဆူ စုစ့ၣ် တခီလီၤ’ (၁ မိၤ ၁၃း၈-၉) ႉ လၢခံကတၢၢ်‚ စီၤလိာ် အတၢ်ဃုထၢ ဆှၢအီၤဆူ တၢ်လီၤပျံၤလီၤဘၣ်ယိၣ် လၢအဟံၣ်ဃီဖိဒီဒူၣ်အဂီၢ်လီၤ (၁ မိၤ ၁၉) ႉ
တနံၤအံၤ‚ ဖဲပကွၢ်ဆၢၣ်မဲာ်ဘၣ်ဒီး တၢ်ဃုထၢအကလုာ်ကလုာ်န့ၣ် ပနာ်န့ၢ် ပပၢ်ယွၤ ဒ်သိးကမၤစၢၤပှၤ ဒ်အ၀ဲအကျိၤအကျဲအသိးသ့၀ဲလီၤႉ အ၀ဲအၢၣ်လီၤတ့ၢ်ပှၤ လၢကကဟုကယာ်ပှၤန့ၣ်လီၤႉ အ၀ဲကဟ့ၣ်ပှၤထီဘိ တၢ်လၢပလိၣ်ဘၣ်တဖၣ်လီၤႉ