ဖဲယမၤတိၢ်ဘၣ်ထံးဘၣ် ယတၢ်အီဆၢအလီခီလၢ တၢ်အီၣ်တၢ်အီကျးအစီၢ်နီၤခိၣ် အကပၤထံးန့ၣ်‚ တၢ်ကျဲထံဆၢလီၤလဲာ်လၢစီၢ်နီၤခိၣ်ဒီး ဆူသ့ၣ်ဘၣ်ခိၣ်လိၤလီၤႉ လၢတၢ် မဲာ်ကိၢ်နါကိၢ်အပူၤ‚ ယကျဲးစၢးလူၤဖီၣ်ထံ ဒီးထံယွၤလီၤလၢယစုလိၤလီၤႉ ယတၢ်ကျဲးစၢး တဖၣ် တကဲထီၣ် တၢ်ဘျုးနီတစဲးဘၣ်‚ တၢ်ကျဲထံဆၢတဖၣ်ယွၤလီၤ လၢယစုမုၢ်တဖၣ် အကဆူးလီၤႉ လၢခံကတၢၢ်တခီ‚ ယစုညါသး ဟံးန့ၢ်ဃာ် တၢ်ထံစှၤန့ၢ် နီၣ်တၢၤဆံးဖိတဘ့ၣ်‚ မ့မ့ၢ် ယခီၣ်န့ၣ် အိၣ်ဆၢထၢၣ်လၢ ထံကလီာ်ဖိအပူၤန့ၣ်လီၤႉ
ယတၢ်အိၣ်မူလၢ ယမုၢ်နံၤတဖၣ် မ့ၢ်တၢ်ဒ်န့ၣ် အသိးလီၤႉ ယထံၣ်လီၤက့ၤသး လၢယဂုာ်ကျဲးစၢးခီဖျိကွံာ် တၢ်ကီတၢ်ခဲတဖၣ်လၢ တၢ်ချုးခံနိးသးအပူၤ‚ တၢ်တခါ စုာ်စုာ်န့ၣ် ယသုးကျဲၤအီၤ လီၤတံၢ်‚ ဒီးဒီသူၣ်ဒီသးလၢ တၢ်အိၣ်သးမၤသးတဖၣ် အဖီခိၣ်လီၤႉ ဖဲယကကျဲးစၢးသပှၢ်ပှၢ်ဒၣ်၀ဲန့ၣ် ယစုလၢ အဂံၢ်ပှဲာ်၀ဲတဖၣ် မၤဒီဒၣ်တၢ်အဆံးအက့မ့ၢ်ဂ့ၤ‚ တၢ်အဒိၣ်ဒီခါမ့ၢ်ဂ့ၤ တန့ၢ်၀ဲဘၣ်န့ၣ်လီၤႉ တၢ်တမံၤမံၤန့ၣ် လီၤလဲာ်ယွၤပူၤကွံာ် လၢယစုမုၢ်တဖၣ်အကဆူး ဒီးကဲထီၣ်ထံဖှိၣ်လၢ ယခီၣ်လၢသ့ၣ်ဘၣ်ခိၣ်‚ ဒီးယအိၣ်တ့ၢ်ဒီးသး လၢအဘၣ်တံာ်တာ်နးမးန့ၣ်လီၤႉ ယစုဒီးယစုမုၢ်ဘိ တဖၣ် ဖီၣ်ဃာ်တၢ်တဖၣ်န့ၣ် တန့ၢ်ဘၣ်‚ ယမၤတၢ်တဖၣ် တဘၣ်ဘၣ်၀ဲဘၣ်ႉ
ဘၣ်ဆၣ် ကစၢ်ယွၤမၤ၀ဲသ့လီၤႉ ၀ံယရၠာစးှါယၤစံးဘၣ်ပှၤ လၢကစၢ်ယွၤဃီၣ်ထံ‚ ကယဲၢ်ပီၣ်လဲၣ်ဒီးထံကျိဒီး တၢ်စူၤထံတဖၣ်ခဲလၢာ်‚ လၢအစုညါပှၢ်အပူၤန့ၣ်လီၤ (၄၀း၁၂) ႉ ထဲဒၣ်ယွၤအစုအံၤ ဒိၣ်၀ဲလဲၢ်၀ဲလၢလၢလီၣ်လီၣ် လၢကဃီၣ်ထံတဖၣ်အံၤလၢအစုညါသးပူၤသ့၀ဲန့ၣ်လီၤႉ တလိၣ်လၢ ပကဘၣ်ကျဲးစၢး ဖီၣ်ဃာ်ထံအါန့ၢ်နီတၢၤ ဆံးဖိတဘ့ၣ် ဒ်အ၀ဲတ့လီၤပာ်လီၤန့ၢ်ပစု လၢပကဖီၣ်တၢ်အဂီၢ်န့ၣ်ဘၣ်ႉ ဖဲပသးပူၤ ပှဲၤဒီး တၢ်သးတံာ်တာ်န့ၣ်‚ ပနာ်န့ၢ်အးလီၤ ပတၢ်မိၣ်န့ၢ်သးလီဒီး တၢ်ဆၢန့ၢ်တဖၣ် ဆူယွၤအစုလၢ မၤတၢ်သ့အပူၤသ့၀ဲန့ၣ်လီၤႉ