ဖဲအပူၤကွံာ်တယံာ်ဒံးလၢ ပတၢ်လဲၤဟးကသုၣ်ကသီအခါ‚ ယပာ်ထီ ယခၣ်ဆူၣ် လၢတၢ်အိၣ်ဘှံးတဘျးဖိအကတီၢ်လီၤႉ ယတံၤသကိးဒီး ပှၤမၤသကိးတၢ်ဒီးယၤတဖၣ် တဲဖျါထီၣ် အတၢ်ထံၣ် အိၣ်အကလုာ်ကလုာ်လၢယလိၤ‚ ဒီးအ၀ဲသ့ၣ်ထံၣ် အအါကတၢၢ် မ့ၢ်တၢ်လၢအဂ့ၤတခီန့ၣ်လီၤႉ တနံၤ‚ ဒ်လဲၣ်ဂ့ၤဒ်လဲၣ်ဂ့ၤ‚ ယကွၢ်က့ၤယခၣ်ဆူၣ်ဒီး စံးလီၤယသး ‘‘တၢ်အံၤတမ့ၢ်ယၤဘၣ်’’ လီၤႉ အဃိဒီး ယထုးထီၣ်ဒီ ဒီးယလူၤကွံာ်ယခၣ်ဆူၣ်လီၤႉ
ယဆိကမိၣ်ကွၢ် တၢ်ပာ်သးဘၣ်ဃးလၢ မ့ၢ်ပ၀ဲတဖၣ် ပမ့ၢ်မတၤလဲၣ်‚ ဒီးမ့ၢ်အဘၣ်မနုၤလၢ ပတၢ်မ့ၢ်တၢ်တဖၣ် တလီၤဂာ်လိာ်သး မ့တမ့ၢ်လီၤဆီလၢအံၤတမံၤဒီး လၢန့ၣ် တမံၤလဲၣ်ႉ အဆိကတၢၢ်န့ၣ်‚ မ့ၢ်လၢ ယွၤအတၢ်ဟ့ၣ်သါ ဃာ်ပှၤ လၢတၢ်လီၤဆီလိာ်သး‚ ဒီးတၢ်လၢ ပဘၣ်ပသး တဂၤတမံၤစုာ်စုာ်အဃိလီၤႉ ပ၀ဲကိးဂၤ ပသးတစဲတၢ်ဒ်သိးသိး‚ အီၣ်တၢ်အီၣ်တဒ်သိးလိာ်သး‚ တဘါသကိးတၢ်လၢသရၠာစးိာ်တဖျၢၣ်ဃီပူၤ ဒ်သိးသိးန့ၣ်လီၤႉ ပ၀ဲသ့ၣ်တဖၣ် ပလီၤဆီလိာ်သးဒီး ‘‘ပဘၣ်တၢ်တ့လီၤပှၤ အိၣ်ဒီးကမၢကမၣ်တၢ်အလီၢ်လီၤ’’ (စံး ၁၃၉း၁၄) ႉ စီၤပ့းတ့ှူးစံး၀ဲ လၢပ၀ဲတဖၣ် ပဒိးန့ၢ် ယွၤအတၢ်ဟ့ၣ် လၢအလီၤဆီလိာ်သး န့ၣ် မ့ၢ်ဒ်သိး ပကမၤစၢၤလိာ်သကိးပသးန့ၣ်လီၤ ( ၁ ပ့း ၄း၁၀-၁၁) ႉ
ခရၠာစးံာ်အပျဲၢ်အဘီၣ်တဖၣ် တခံကွၢ်စီၤကွၢ်က့ၤ အသကဲာ်ပ၀းက့ၢ်ဂီၤ‚ တချုးလၢအနုာ်လီၤဆူ ကစၢ်အတၢ်မၤအပူၤန့ၣ်ဘၣ်ႉ စီၤပ့းတ့ှူး မ့ၢ်ပှၤလူၤဘၣ်အသး ခ@သဒံးတဂၤ‚ ဒီးအနၤဖဲကစၢ်ခရၠာစးံာ် ဘၣ်တၢ်ဖီၣ်အီၤန့ၣ် အ၀ဲကူးတဲာ်ဘၣ် ကုၢ်တဂၤအနၢ် န့ၣ်လီၤႉ စီၤသိၤမါ ဃ့သပှၢ်ပှၢ်ဒၣ်တၢ်မူၤလီၢ်အလီၢ် ဖဲတချုးအနာ်၀ဲလၢ ခရၠာစးံာ်ဂဲၤထၢၣ် လၢတၢ်သံန့ၣ်လီၤႉ အ၀ဲသ့ၣ်ကဘၣ်မၤဂ့ၤအါထီၣ်အသးအဃိ ကစၢ်တသမၢအ၀ဲသ့ၣ် လၢအကပိာ်အခံဘၣ်ႉ ကစၢ်ဘှီဂ့ၤထီၣ် ကတဲာ်ကတီၤအ၀ဲသ့ၣ်လၢအတၢ်မၤအဂီၢ်လီၤႉ
ဖဲပသ့ၣ်ညါလီၤက့ၤပသး လၢပ့ကၢးမၤယွၤတၢ် အဂ့ၤကတၢၢ်လီၤန့ၣ်‚ ပကဘၣ် ဆိကမိၣ်ထံက့ၤပတၤလၣ်တဖၣ်‚ ဒီးစံးလီၤက့ၤပသးတဘျီတခီၣ် လၢ ‘တၢ်အံၤတမ့ၢ် ယၤဘၣ်’ န့ၣ်လီၤႉ ယွၤကကိးထုးထီၣ်ပှၤ လၢတၢ်လီၢ်လၢပအိၣ်မုာ်အိၣ်ပၢၤအလီၢ်‚ ဒ်သိးကမၤဂ့ၤထီၣ် တၢ်ဟ့ၣ်လီၤဆီလၢပပူၤတဖၣ် ဒီးပတၢ်မ့ၢ်တၢ်တဖၣ် ဒ်သိးပကမၤ အတၢ်မၤ လၢအအိၣ်ဒီးတၢ်ပညိၣ်အဂ့ၤန့ၣ်လီၤႉ ဖဲပပျဲယွၤကသူပှၤ ဒ်ပတၢ်မ့ၢ်တၢ်န့ၣ် မ့ၢ်ပဟ့ၣ်ထီၣ်တၢ်လၤကပီၤ ဆူယွၤအတၢ်သ့တ့လီၤတၢ်အစိကမီၤန့ၣ်လီၤႉ