စီၤပၤခဲနံး မ့ၢ်စီၤပၤတဂၤလၢ အစိကမီၤဒိၣ်ကတၢၢ်လၢ ဟီၣ်ခိၣ်ချၢအကျါတဂၤ ဖဲနံၣ်ကယၤ ၁၁ အပူၤန့ၣ်လီၤႉ တၢ်ဃဲၤတယုၢ်လၢ အမံၤဟူသၣ်ဖျါလၢ မုၢ်မဆါ တနံၤညါအံၤအပူၤ‚ တၢ်စံး၀ဲလၢ အ၀ဲဟ့ၣ်လီၤအကလုၢ်လၢ ပှၤကပာ်အလီၢ်ဆ့ၣ်နီၤ လၢပီၣ်လဲၣ်ကၢၢ်နံၤ ဖဲထံဟဲထီၣ်အဆၢကတီၢ်န့ၣ်လီၤႉ အ၀ဲစံးဘၣ် ပီၣ်လဲၣ် ဒ်အံၤ‚ ‘‘နအိၣ်လၢ ယတၢ်ပၢအဖီလာ်လီၤႉ မၤသးဒ်န့ၣ်ဒီး ယမၤလိာ်နၤ လၢနတဘၣ်ဟဲထီၣ်ဆူ ယခိခိၣ်ဘၣ်‚ နတဘၣ်မၤဘၣ်စီၣ် နကစၢ်စီၤပၤအဆ့ကၤမ့ၢ်ဂ့ၤ‚ အစု အခီၣ် မ့ၢ်ဂ့ၤဘၣ်’’ႉ နာ်သက့ ပီၣ်လဲၣ်ထံထီၣ်ဒၣ်အတၢ် ဆူညါဒီး မၤဘၣ်စီၣ် စီၤပၤအခီၣ်န့ၣ်လီၤႉ
တၢ်ဃဲၤပူအံၤ ညီနုၢ်ဘၣ် တၢ်ဃဲၤအီၤ ဒ်သိး အကထုးန့ၢ် ပှၤအသး ဆူ စီၤပၤခဲနံး အတၢ်ပာ်ထီၣ်ထီ အသးအဂီၢ်န့ၣ်လီၤႉ နီၢ်နီၢ်တခီ‚ အအံၤမ့ၢ် ပူတယုၢ်လၢ အဘၣ်ဃးဒီး တၢ်ဆီၣ်လီၤသးအဂ့ၢ်လီၤႉ စီၤပၤခဲနံး အတၢ်ကတိၤဆူညါ မ့ၢ်၀ဲ ‘‘မ်ဟီၣ်ခိၣ်ဒီဘ့ၣ်သ့ၣ်ညါလၢ မ့တမ့ၢ်ဘၣ်လၢ ယွၤလၢ မူခိၣ်‚ ဟီၣ်ခိၣ်‚ ဒီးပီၣ်လဲၣ်တဖၣ် ဒိကနၣ်အီၤတဂၤန့ၣ်‚ စီၤပၤတဖၣ်အစိကမီၤန့ၣ် မ့ၢ်တၢ်ကလီကလီလီၤန့ၣ်တက့ၢ်’’ႉ စီၤပၤခဲနံး အတၢ်ဃဲၤပူ အိၣ်ဒီး တၢ်ဂ့ၢ်တဘီလၢ အမ့ၢ်ထဲယွၤတဂၤဧိၤ မ့ၢ်ပှၤလၢ အစိကမီၤ ဒိၣ်တုာ်န့ၣ်လီၤႉ
စီၤယိၤဘးထံၣ်န့ၢ် တၢ်တမံၤဃီလီၤႉ ပမ့ၢ်ထိၣ်သBတီၤပသးဒီး ကစၢ်လၢ အပာ်လီၤ ဟီၣ်ခိၣ်အခီၣ်ထံး (ယိၤဘး ၃၈း၃-၇) ‚ လၢအမၤလိာ် မုၢ်ဂီၤလၢ အကဟဲထီၣ်ဒီး မုၢ်နၤလၢကကတၢၢ် (း၁၂-၁၃) ‚ လၢအပာ်ဖှိၣ်မူခိၣ်ဖီဒီး နဲၣ် ဆၣ်တဖၣ်အကျဲန့ၣ် (း၂၂‚၃၁-၃၃) ‚ ပမ့ၢ်ဒၣ် တၢ်ဆံးကိာ်န့ၣ်လီၤႉ ပှၤပၢလပီတဖၣ် အိၣ်ထဲတဂၤဧိၤ‚ ဒီးအ၀ဲန့ၣ် တမ့ၢ်ပှၤဘၣ် (ယိၤဘး ၃၈း၁၁‚ မး ၈း၂၃-၂၇) ႉ
ဖဲပစးထီၣ် ဆိကမိၣ်လီၤပသးလၢ ပကူၣ်သ့ဒိၣ်မးလံ မ့တမ့ၢ် ပပာ်ကဖၢ လၢက့ၤပသးဒိၣ်ကဲၣ်ဆိးလံအခါန့ၣ်‚ ဂ့ၤလၢ ပဒုးမူက့ၤ စီၤပၤခဲနံး အတၢ်ဃဲၤပူ န့ၣ်လီၤႉ လဲၤဟးဆူ ပီၣ်လဲၣ်ကၢၢ်နံၤဒီး တဲဘၣ်ပီၣ်လဲၣ်အထံထီၣ် ထံလီၤ လၢကဆိကတီၢ်ပာ်‚ မ့တမ့ၢ် မၤလိာ်ကွၢ်မုၢ် လၢအကဟးထီၣ်ကွံာ် လၢအလီၢ်တက့ၢ်ႉ တယံာ်ဘၣ်ဒီး ပကသ့ၣ်နီၣ်လၢ မတၤမ့ၢ် ပှၤလၢအစိအကမီၤဒိၣ်နီၢ်နီၢ် တဂၤ‚ ဒီးပကစံးဘျုးအီၤလၢ အပၢပတၢ်အိၣ်မူအဃိ န့ၣ်လီၤႉ