ယဖိခွါဒီး ယဒဲၣ်မုၣ်ခံဂၤ ဒိးန့ၢ်ဘၣ် တၢ်ကဲထီၣ်သတူၢ်ကလာ်တမံၤလီၤႉ ယလံၤဖိတဂၤ ဒိးန့ၢ်ဘၣ် တၢ်ခုၣ်ဒီး အိၣ်တမုာ်အဃိ‚ လိၣ်ဘၣ်၀ဲလၢ တၢ်ကလဲၤဆှၢအီၤဆူ တၢ်ဆါဟံၣ်လီၤႉ ယဖိခွါဒီး ယဒဲၣ်မုၣ်ခံဂၤ မၢယၤလၢ ကလဲၤကိးက့ၤ အဖိခွါ နၣ်သၣ် လၢကၠိဒီး ဆှၢက့ၤအီၤဆူဟံၣ်လီၤႉ ယမါ မၤလ့ၤဒီးယၤ ပသးခုလၢ ပကလဲၤကိးဖိသၣ် ဒီးဆှၢက့ၤအီၤဆူဟံၣ်လီၤႉ
ဖဲ နၣ်သၣ် ဟဲနုာ်ဆူ သိလ့ၣ်အပူၤအကတီၢ် မၤလ့ၤ သံကွၢ်အီၤလၢ‚ ‘ပဟဲအိၣ်နၤလၢကၠိအဃိ မ့ၢ်နအိၣ်ဒီး တၢ်ကမၢကမၣ်တမံၤဧါႉ’ နၣ်သၣ်စံးဆၢ ‘ယတကမၢကမၣ် ဘၣ်ႉ’ အ၀ဲသံကွၢ်ကဒီး ‘ဘၣ်မနုၤအဃိ နတကမၢကမၣ် ဘၣ်လဲၣ်ႉ’ နၣ်သၣ် စံးဆၢက့ၤအီၤ ‘ယသ့ၣ်ညါတၢ်ခဲလၢာ် အဃိလီၤ’ႉ
ဖိသၣ်လၢ အသးအိၣ် ၅ နံၣ်တဂၤ စံး၀ဲလၢ အသ့ၣ်ညါတၢ်ခဲလၢာ်လီၤႉ ဘၣ်ဆၣ် ပ၀ဲလၢအသးပှၢ်န့ၢ်အီၤတဖၣ် ပသ့ၣ်ညါတၢ်ဂ့ၢ်န့ၣ် အါန့ၢ် ဒံးအီၤလီၤႉ ပ၀ဲသ့ၣ် ပသးအိၣ်သ့ၣ်ညါ တၢ်ကတိၤ‚ ‘ဘၣ်မနုၤအဃိလဲၣ်’‚ ‘ဆၢကတီၢ်ဆံးယံာ်လဲၣ်’‚ ဒ်သိးလဲၣ် လၢပသးသမူအပူၤလီၤႉ တဘျီဘျီန့ၣ် ပသးပ့ၤနီၣ်ကွံာ် တၢ်ကတိၤ ‘လၢပသ့ၣ်ညါတၢ်ခဲလၢာ်လီၤ’ႉ ဒီးပသ့ၣ်ညါလၢ ကစၢ်ယွၤ သ့ၣ်ညါတၢ် ခဲလၢာ်လီၤႉ
ထါစံးထီၣ်ပ့တၢၤအဆၢဒိၣ် ၁၃၉ အဆၢဖိ ၁ ဒီး ၃ စံး၀ဲ ပတၢ်သ့ၣ်ညါခဲလၢာ်‚ ကစၢ်ယွၤ အတၢ်လုၣ်ဘၢခဲလၢာ်န့ၣ် မ့ၢ်တၢ်ကတိၤလၢ အရၠာစး့လိာ်ဘၣ်ထွဲလိာ်သးဒီးပှၤ ဘူးဘူးတံၢ်တံၢ်လီၤႉ စီၤဒၤ၀ံးစံး၀ဲ ‘ယွၤဧၢ‚ ဃုထံၣ်ယၤ‚ ဒီး နသ့ၣ်ညါယၤလီၤ ႉႉႉ ယကျဲ‚ ဒီး ယမံလီၤအလီၢ်န့ၣ် နကွၢ်နီၣ်‚ ဒီး နသ့ၣ်ညါ ယကျဲဧိၤကပူၤဧိၤလီၤ’‚ မုာ်သးဒိၣ်မး လၢပသ့ၣ်ညါဘၣ် ကစၢ်ယွၤအတၢ်အဲၣ်လၢလၢပှဲၤပှဲၤ‚ လၢအသ့ၣ်ညါထံဆး တၢ်လၢ ပလဲၤခီဖျိဘၣ် လၢမုၢ်တနံၤအံၤဒီး ကစၢ်ယွၤ သ့ၣ်ညါ၀ဲ လၢကမၤစၢၤပှၤ လၢတၢ်လၢ ပလဲၤခီဖျိဘၣ် လၢပသးသမူအပူၤန့ၣ်လီၤႉ
ပတၢ်သ့ၣ်ညါန့ၣ် အိၣ်၀ဲဒီးအကတၢၢ်အဆၢလီၤႉ ဘၣ်ဆၣ် တၢ်သ့ၣ်ညါယွၤ မ့ၢ် တၢ်အကါဒိၣ်ကတၢၢ်လီၤႉ ပနာ်န့ၢ်ကစၢ်ယွၤသ့၀ဲလီၤႉ