ဖဲယဟးလၢကျဲ ဒီးယထံၣ် ဖီဖိတမုၢ်လၢအမဲထီၣ်၀ဲဒၣ် လၢကျီၢ်အီၣ်ဆၣ်အလီၢ် အပျီမုၢ်လါဟ့အပူၤလီၤႉ ဖီဖိအံၤ အဖီအလွဲၢ်လါအဲး‚ ဒီးဟ့ၣ်ထီၣ်အတၢ်နၢမူလၢ ပျီလါဟ့ အကလံၤကျါလီၤႉ လၢအပူၤကွံာ်န့ၣ် ဖီဖိအံၤ မတၤတဂၤမးတထံၣ်ဘၣ် အီၤဘၣ်‚ ဆူညါစ့ၢ်ကီး မတၤတဂၤမး ထံၣ်ဘၣ်အီၤတသ့ လ့ၤတက့ၤဘၣ်ႉ အဃိ လၢယတၢ်ဆိကမိၣ်အပူၤ ယဆိကမိၣ်ယဲလၢ ဖီဖိလၢ အဃံလၤတမုၢ်အံၤ ဘၣ်မနုၤလၢ အမဲထီၣ်၀ဲလၢ တၢ်လီၢ် သယုၢ်အံၤအပူၤလဲၣ်န့ၣ်လီၤႉ
န့ဆၢၣ်တသူကလီကွံာ် တၢ်ဆၢကတီၢ်ဘၣ်ႉ ထီဘိန့ၣ် ဒုးဖျါထီၣ်၀ဲ ပှၤလၢအတ့လီၤတၢ်တဂၤ အတၢ်မ့ၢ်တၢ်တီ‚ အတၢ်ဂ့ၤတၢ်ဘၣ်‚ ဒီးဟ့ၣ်ထီၣ်၀ဲဒၣ် ပှၤတ့လီၤတၢ်တဂၤ အလၤကပီၤလီၤႉ ကိးမုၢ်နံၤဒဲးန့ၣ် န့ဆၢၣ် ဟ့ၣ်ထီၣ်တၢ်အသီဒီးသီသံၣ်ဘှဲ လၢကဘိးဘၣ်သ့ၣ်ညါက့ၤ ယွၤအတၢ်လၤတၢ်ကပီၤန့ၣ်လီၤႉ မ့ၢ်ပထံၣ်ဘၣ်ကစၢ်ယွၤ ခီဖျိလၢန့ဆၢၣ် အတၢ်ဃံတၢ်လၤ လၢအဟ့ၣ်ထီၣ်၀ဲ (မ့တမ့ၢ်) မ့ၢ်ပကွၢ်သကွ့ၤဃီၤ‚ ဒီးသံးထီၣ်သံးလီၤ ပဖံဘၣ်ခိၣ် လၢန့ဆၢၣ်အတၢ်ဖျါထီၣ်အံၤ လၢကျဲတမံၤမံၤစ့ၢ်ကီးဧါႉ
ဒ်ပဃုထံၣ်ဘၣ်ထဲဒၣ် ပှၤတဂၤ လၢအတ့လီၤတၢ်‚ ခီဖျိ န့ဆၢၣ်အတၢ်ပာ်ဖျါ သ့ၣ်တဖၣ်အသိးန့ၣ် ပကဘၣ်ဘူၣ်ထီၣ်ဘါထီၣ်အီၤ‚ ယူးယီၣ်ပးကဲဒီး စံးဘျုးက့ၤ တၢ်ဘၣ်တ့ခဲလၢာ်အကစၢ် လၢအမ့ၢ်ကစၢ်ယွၤ လၢဖီဖိတမုၢ်အတၢ်ဃံတၢ်လၤ‚ ဂီၤထၢၣ်သၢ မုၢ်အတၢ်ကြပုၢ်ကပြီၤ‚ သ့ၣ်တထူၣ်လၢအထုးန့ၢ်ပှၤအသးအဂီၢ်န့ၣ်လီၤႉ
ပှၤကွဲးလံာ် သရၠာစးၣ် စံၣ်အဲးလူး၀ံး တဲ၀ဲ‚ အတၢ်ဟးအဂ့ၢ်အကျိၤ လၢပှၢ်လၢ်ကျါအပူၤ ဖဲတၢ်ကိၢ်ခါအဆၢကတီၢ်လီၤႉ ဖဲအဆၢကတီၢ်န့ၣ် အ၀ဲသံကွၢ်အသကိးလၢ အလဲၤတၢ်တပူၤဃီဒီးအီၤ ဒီးစံး၀ဲ‚ ‘‘ဖဲဆၢကတီၢ်အံၤ ပမ့ၢ်သူၣ်လီၤသးလၢ အစံးဘျုးတၢ် ဆူယွၤအအိၣ်န့ၣ် မ့ၢ်ဂ့ၤ၀ဲဒိၣ်ကစီဒီဧါ’’ န့ၣ်လီၤႉ အသကိးန့ၣ်စံးဘၣ်အီၤ‚ ဘၣ်မနုၤလၢ နတမၤတၢ်အံၤတဘျီဃီလဲၣ်ႉ လူး၀ံး စံးဆၢ၀ဲ‚ သါမၤလိတၢ်န့ၣ်တဘျီဃီဒီး ကိးထီၣ် ‘ဖဲနအိၣ်တပူၢ်လၢ်လၢ် စံးထီၣ်ပ့တၢၤယွၤတက့ၢ်’လီၤႉ
ဖဲနထံၣ်ဘၣ်‚ ထံလီၤဆူလၢ အယွၤလီၤ၀ဲ‚ ဒီးန့ၢ်ဘၣ် ကလံၤခုၣ်လၢပံၣ်သလီ အမုၢ်ကျါ‚ ထိၣ်ရၠာစးီးဘ့ၣ်ဖိဒီး ဖီဃံလၤန့ၣ် မ်နကစံးထီၣ်ပ့တၢၤ ယွၤတဘျီဃီတက့ၢ်ႉ