ကစၢ်ယွၤ အါစုအါဘျီဃုထၢပတၢ်ထုကဖၣ်တဖၣ် လၢအတၢ်မၤအပူၤ ဒ်သိးကမၤ ထီၣ်ဘးလၢပှဲၤ အတၢ်မၤန့ၣ်လီၤႉ တၢ်ဒ်အံၤ ပထံၣ်ဘၣ် ဖဲကစၢ်ယွၤစံးဘၣ် ၀ံအ့ၤလံယၤ လၢ‘‘ယကဒုးစူၤလီၤ တၢ်လၢဟီၣ်ခိၣ်အလိၤ’’‚ ဟ့ၣ်တၢ်အၢၣ်လီၤလၢ ကမၤကတၢၢ်ကွံာ် တၢ်ယီၤဃ့လၢ ယံာ်၀ဲဒၣ် သၢနံၣ်ဃုလါလၢ ကီၢ်အံၣ်စရၠာစး့လးအပူၤ (ယၤ ၅း၁၇) န့ၣ်လီၤႉ ကစၢ်ယွၤမ့ၢ်အၢၣ်လီၤ၀ဲလၢ အဒုးစူၤကဒါက့ၤတၢ်ဘၣ်ဆၣ်‚ တၢ်ဆၢကတီၢ်တစိၢ်ဖိပူၤကွံာ်ဒီး ‘‘၀ံအ့ၤလံယၤလဲၤထီၣ်ဘး ကၢ်မ့ၤလး ကစၢၢ်အဒီခိၣ်‚ ဒီးထိၣ်လီၤပှီၤအသးလၢ ဟီၣ်ခိၣ်‚ ဒီးပာ်အမဲာ်လၢ အခီၣ်လ့ၢ်ခိၣ်အကဆူး’’ ထုကဖၣ်တၢ်သပှၢ်ပှၢ်လၢ တၢ်ကဟဲစူၤလီၤ (၁ စီၤပၤ ၁၈း၄၂) ႉ တၢ်န့ၣ်၀ံၤ‚ ဖဲလၢအ၀ဲထုကဖၣ်တၢ်အဖၢမုၢ်န့ၣ်‚ ၀ံအ့ၤလံယၤ ဆှၢအပျဲၢ် ဒ်သိးကလဲၤကွၢ်တၢ်လၢပီၣ်လဲၣ် အပူၤ ‘‘နွံဘျီ’’ ကွၢ်တၢ်၀း၀း မ့ၢ်ကထံၣ်တၢ်ကဟဲစူၤအပနီၣ် အိၣ်ဖျါထီၣ်ဧါအဂ့ၢ်လီၤ (း၄၃) ႉ
၀ံအ့ၤလံယၤနၢ်ပၢၢ်၀ဲလၢ ကစၢ်ယွၤဘၣ်အသးလၢ ပကမၤသကိးတၢ်ဒီးအီၤလၢ အတၢ်မၤအပူၤ ခီဖျိ ပတၢ်ထုကဖၣ်သပှၢ်ပှၢ် အိၣ်ဒီးတၢ်ဆီၣ်လီၤပသးအပူၤလီၤႉ ယွၤတကွၢ် ပ၀ဲပှၤကညီ အတၢ်တလၢတပှဲၤဘၣ်‚ ကစၢ်ယွၤ ကဃုထၢ ပတၢ်ထုကဖၣ်တဖၣ် လၢ ကမၤတၢ်အဂီၢ် လၢကျဲပနၢ်တပၢၢ်အပူၤလီၤႉ လၢတၢ်န့ၣ်အဃိ လံာ်ယၤကိာ် တဲဘၣ်ပှၤလၢ ‘‘ပှၤတီ ပှၤလိၤ အတၢ်ထုကဖၣ်သပှၢ်ပှၢ်န့ၣ် မၤန့ၢ်တၢ်အါမး’’အသိး တဘျီဃီန့ၣ် ဟ့ၣ်သ့ၣ်နီၣ် စ့ၢ်ကီးပှၤလၢ ‘‘၀ံအ့ၤလံယၤန့ၣ် မ့ၢ်ပှၤကညီဒ်ပ၀ဲအသိးန့ၣ်လီၤ’’ (ယၤကိာ် ၅း၁၆-၁၇) ႉ
ဖဲပပာ်ပတၢ်မုၢ်လၢ်ကွၢ်စိလၢ ပကမၤယွၤအတၢ် ခီဖျိတၢ်ထုကဖၣ်သပှၢ်ပှၢ် ဒ်၀ံအ့ၤလံယၤအသိးန့ၣ် မ့ၢ်ပမၤသကိးတၢ်ဒီးယွၤ လၢကစၢ်ယွၤ မၤတၢ်လီၤလးအပူၤ လၢကျဲအဘိဘိန့ၣ်လီၤႉ ဲၠာန Bၠညုျ