လါအီကူာ် တၢ်ဂ့ၢ်အခိၣ်တီ | ဟံၣ်ဖိဃီဖိ
ကိးမုၢ်နံၤဒဲး, ဟါလီၤခီ ၇ နံၣ်ရံၣ်န့ၣ်, ကၠိၣ်(Jo) တဂၤ, အကအိၣ်ဒၣ်ဝဲဖဲလဲၣ်ဂ့ၤ,ဖဲလဲၣ်ဂ့ၤ, ဒီးကလီၤဘှံးလီၤတီၤဝဲ ထဲလဲၣ်ဂ့ၤထဲလဲၣ်ဂ့ၤ (မ့) အတၢ်မၤကအါဒၣ်ဝဲန့ၣ်, ကၠိၣ် ကိးဝဲဒၣ် အမိၢ်သးပှၢ် လၢကွဲၤဒီနၢ်, ဒီးစံးကတိၤတၢ်န့ၣ်လီၤ. လၢတၢ်ဂ့ၢ်တမံၤမံၤအဃိ, မ့ၢ်တစံးကတိၤဘၣ်တၢ်လၢအမိၢ်အကတီၢ်န့ၣ်ဒီး, ကွဲးဆှၢလီၤတၢ်ကစီၣ်လီၤတံၢ်လီၤဆဲးဆူ အမိၢ်အအိၣ် ထီဘိန့ၣ်လီၤ. ကၠိၣ် ကမၤဝဲဒၣ် ဆူညါတနံၤဘၣ်တနံၤန့ၣ် ကဲထီၣ် တၢ်တၤတမံၤလၢအဂီၢ် သ့ဝဲဘၣ်ဆၣ်, မ့ၢ်လၢအဲၣ်ဘၣ်အမိၢ်, ဒီးတအဲၣ်ဒိးဝဲဒၣ်လၢ အမိၢ်ကဘၣ်ကိၢ်ဘၣ်ဂီၤတၢ်လၢအဂီၢ်အဃိ, ကၠိၣ် မၤဝဲဒၣ်လၢ တၢ်သူၣ်ဖှံသးညီအပူၤန့ၣ်လီၤ.
ဖဲပဖိတဖၣ်အသးစၢ်ဒံးအကတီၢ်, ယဝၤဒီးယၤ ပပှ့ၤန့ၢ် ဟံၣ်ဖိတဖျၢၣ်လၢ တၢ်ဒ့ၣ်စၢၤအိၣ်စီၤစုၤတစဲးန့ၣ်လီၤ. ဘၣ်ဆၣ်, ပကသုးဆူဟံၣ်သီအဂီၢ်, ပကဘၣ် အိၣ်ခိးတစိၤဖိ, ဒီးကၠိစ့ၢ်ကီး ကစးထီၣ်ကဒါဝဲဒၣ်န့ၣ်လီၤ. ယသ့ၣ်ညါဝဲလၢ ကကဲထီၣ် တၢ်ဂ့ၢ်ကီတၢ်ဃၢတၢ်စံာ် လၢပဖိသ့ၣ်တဖၣ်အဂီၢ်, လၢတၢ်ဆီတလဲ လဲၤထီၣ်ကၠိခံဖျၢၣ်န့ၣ်လီၤ. လၢခံနွံအတီၢ်ပူၤန့ၣ်, ယဘၣ်လဲၤက့ၤ တၢ်ဒ့ၣ်စၢၤအယံၤ စးထီၣ်လၢဟံၣ်တုၤဆူ ယဖိတဖၣ်အကၠိအသီ, ဒီးဆူယတၢ်မၤလီၢ်, ဒီးဘၣ်ဟဲက့ၤဆူဟံၣ် မ့ၢ်လၢ ယအဲၣ်ဒိးမၤစှၤလီၤ ယဖိတဖၣ် အတၢ်ဂ့ၢ်ကီတၢ်ဃၢတၢ်စံၣ်တဖၣ်အဃိန့ၣ်လီၤ.
ပမ့ၢ်ဆီဟံၣ်ဆီဃီ (မ့) ပမ့ၢ်အိၣ်သဘျ့မ့ၢ်ဂ့ၤ, ပမ့ၢ်အိၣ်ဒီးပဖိပလံၤ (မ့) တအိၣ်မ့ၢ်ဂ့ၢ်န့ၣ်, ပအိၣ်ဒီးခွဲးယာ်လၢ ပကဒုးနဲၣ်ပာ်ဖျါထီၣ် တၢ်အဲၣ်ဆူ ပဖံပဖု, ပမိၢ်ပပၢ်, ပဒီပုၢ်ဒီဝဲၢ်တဖၣ်, ဒီးပဖိဒိၣ်မုၣ်-ခွါတဖၣ်, ပှၤသ့ၣ်တဖၣ်လၢ ကစၢ်ယွၤပာ်လီၤန့ၢ်ပှၤ လၢပတၢ်အိၣ်မူအပူၤန့ၣ်လီၤ. မ့ၢ်လၢ ကစၢ်ယွၤအဲၣ်ဆိပှၤအဃိ, ဒ်သိးပကအဲၣ်ပဟံၣ်ဖိဃီဖိ, ဒီးပှၤဂုၤပှၤဂၤတဖၣ်အဂီၢ်, ဒ် ၁ ယိၤ ၄:၇-၂၁, ဒီး ၁ ကရံၣ်သူး ၁၃:၄-၇ ဒုးနဲၣ်ပာ်ဖျါဝဲအသိးန့ၣ်, ဟ့ၣ်စိဟ့ၣ်ကမီၤပှၤ ခီဖျိလၢအသးစီဆှံန့ၣ်လီၤ.
• တၢ်အဲၣ်တၢ်ကွံ ဝံသးစူၤတၢ်ဃဲးဃဲး
• တၢ်အဲၣ်တၢ်ကွံ တဃုဘၣ်အတၢ်ဘျုးဒၣ်ဝဲဘၣ်
• တၢ်အဲၣ်တၢ်ကွံ သူၣ်ကညီၤသးကညီတၢ်
• တၢ်အဲၣ်တၢ်ကွံ တသးတဒိၣ်ထီၣ် ညီညီဘၣ်
• တၢ်အဲၣ်တၢ်ကွံ တပာ်ဘၣ်အသး ကဖၢလၢဘၣ်
• တၢ်အဲၣ်တၢ်ကွံ တဆိကမိၣ်ဘၣ် တၢ်အၢတၢ်သီဘၣ်
ပအဲၣ်ပပှၤဟံၣ်ဖိဃီဖိ ခီဖျိလၢပကတဲာ်ကတီၤန့ၢ် တၢ်လၢအဝဲသ့ၣ်လိၣ်ဘၣ်တဖၣ်န့ၣ် မ့ၢ်စ့ၢ်ကီး ကစၢ်ယွၤ အတၢ်ဟ့ၣ် (၁ တံၤ ၅:၈), ဒီးပမူဒါတဖၣ်အံၤ ပာ်ဃုာ်ဒီး နီၢ်ခိ, နီၢ်သး, လၢသးအတၢ်တူၣ်ဘၣ်ခီၣ်ဘၣ်တၢ်, ဒီးလၢသူၣ်ဂ့ၢ်သးကျိၤကိးကပၤဒဲးအဂီၢ်န့ၣ်လီၤ.
တလါအံၤ, ဒ်ကစၢ်ခရံာ် အဲၣ်ပှၤအသိး, နကအဲၣ်ပှၤဂၤကသ့ဝဲဒ်လဲၣ်. မ့ၢ်နကဟ့ၣ်ဂံၢ်ဟ့ၣ်ဘါပှၤဂၤ ကသ့ဝဲဒၣ်ဒ်လဲၣ်န့ၣ်, ကွၢ်ထံဆိကမိၣ် ကျိၤကျဲတဖၣ်, ဒီးမၤနဲတက့ၢ်.
Alyson Kieda| ကိၣ်လၢတနံၤဘၣ်တနံၤ ပှၤကွဲးလံာ်
ဘၣ်မနုၤယ့ၣ်ရှူးမၤတၢ်တဲတၢ် ဒ်အမၤတၢ်, တဲတၢ်အသိးန့ၣ်လဲၣ်. တလါအံၤ ပကဃုသ့ၣ်ညါ ကျဲတနီၤ လၢယ့ၣ်ရှူး လီၣ်ဖျါအနီၢ်ကစၢ်ဒၣ်ဝဲ ဆူဟီၣ်ခိၣ်ဒီး ကွဲပှၤဒ်သိး ပကမၤဒိးက့ၤအရူၢ်အသဲးသကဲာ်ပဝးတဖၣ် လၢပတၢ်အိၣ်မူပူၤလီၤ