တၢ်ဂ့ၢ်ခိၣ်တီလၢ လါယူၤလံၤ | တၢ်ထုကဖၣ်

တၢ်ထုကဖၣ်မ့ၢ် တၢ်ဘူၣ်ထီၣ်ဘါထီၣ်ယွၤန့ၣ်လီၤ. ကစၢ်ယွၤအတၢ်မ့ၢ်တၢ် – “ယမ့ၢ် တၢ်လၢ ယမ့ၢ်လီၤ”, အတၢ်တ့လီၤပှၤ ဒ်ပှၤတဖၣ်လၢ အကဒုးနဲၣ် အတၢ်အဲၣ်, အတၢ်တူၢ်သံအသးလၢပဂီၢ် လၢထူစုညါအလိၤ, အဝဲအိၣ်ဒီးအတၢ်တိာ် လီၤတံၢ်လီၤဆဲး ဒ်သိးကဒုးကဲထီၣ် ပိာ်မုၣ်ပိာ်ခွါတဖၣ်လၢအလၢအပှဲၤ အဃိ ပတၢ်ထုကဖၣ် ကြၢးအိၣ်လၢပှဲၤဒီး တၢ်ပာ်ဒိၣ်ပာ်ကဲယွၤ, တၢ်အဲၣ်ယွၤ လၢသးဒီဖျၢၣ်န့ၣ်လီၤ. ဒ် တၢ်ကတိၤ ကြၢးဝဲဘၣ်ဝဲ (worth-ship) အသိး ဖဲပဘူၣ်ထီၣ်ဘါထီၣ်ယွၤအဆၢကတီၢ်န့ၣ် ပဘိးဘၣ် သ့ၣ်ညါ တၢ်လၢ ပပာ်လုၢ်ပာ်ပှ့ၤ အဒိၣ်ကတၢၢ် န့ၣ်လီၤ. တၢ်အံၤ မ့ၢ်ကျဲအဂ့ၤကတၢၢ်တဘိလၢ ပကပာ်ဖျါထီၣ် ပတၢ်အဲၣ်ယွၤ န့ၣ်လီၤ.

တၢ်ထုကဖၣ်မ့ၢ် ပတၢ်ပာ်ဖျါအဂ့ၤကတၢၢ် လၢ ပဒိးသန့ၤပသးလၢအီၤန့ၣ်လီၤ. မ့ၢ်ပဃ့တၢ်လၢ ပမိၣ်န့ၢ်သးလီၤတဖၣ်န့ၣ်လီၤ. လၢတၢ်ဂ့ၢ်တမံၤဂ့ၤတမံၤဂ့ၤအဂီၢ်မ့ၢ်ဂ့ၤ, တုၤတၢ်ဂ့ၢ်အကီကတၢၢ်အဂီၢ်ဒၣ်လဲာ်မ့ၢ်ဂ့ၤ ပဃ့ထုကဖၣ်သ့ န့ၣ်လီၤ. “သုတဘၣ်ယိၣ်တၢ် နီတမံၤ တဂ့ၤ. မ့မ့ၢ်လၢတၢ်ကိးမံၤဒဲးန့ၣ် လၢတၢ်ထုကဖၣ်, ဒီးလၢတၢ်ဃ့ကညးအိၣ်ဒီး တၢ်စံးထီၣ်ပတြၢၤ တၢ်အဘျုးအဖှိၣ် အပူၤန့ၣ် ဘိးဘၣ်သ့ၣ်ညါယွၤလၢ သုတၢ်အဲၣ်ဒိး တဖၣ်န့ၣ်တက့ၢ်”(ဖံ ၄:၆). တၢ်ဂ့ၢ်တမံၤဂ့ၤ တမံၤဂ့ၤ လၢအကီခဲဒိၣ်မး တုၤအလုၣ်ဘၢ ပသးန့ၣ် မ့ၢ်တၢ်ဂ့ၢ်လၢ ပကြၢးဃ့ထုကဖၣ်တၢ် န့ၣ်လီၤ.
တၢ်ဃ့ထုကဖၣ်အန့ဆၢၣ်မ့ၢ်ဒၣ် တၢ်ဃ့သကွံၢ်ကညးတၢ်န့ၣ်လီၤ. တမ့ၢ်တၢ်ဃ့ဆူၣ်တၢ် တုၤပှၤအနၢ်ပှဲာ်န့ၣ်ဘၣ်. ပကဃ့ဆူၣ်တၢ် လၢယွၤအအိၣ်တသ့ဘၣ်အသိး ပကထိၣ်လိၤမၤဃူလိာ်သးလၢယွၤစ့ၢ်ကီး တသ့ဘၣ်. လၢပတံၤသကိး အကျါစ့ၢ်ကီး ပမၤ ပသး ဒ်န့ၣ်တသ့ဘၣ်. တၢ်လၢတံၤသကိးန့ၣ် ဃ့တၢ်မ့ၢ်ဝံၤဒီး ဘၣ်အိၣ်ခိးဝဲဒၣ်န့ၣ်လီၤ. ဒ်သိး ပကဒိးန့ၢ် တၢ်လၢပဃ့အဂီၢ် ပဘၣ်အိၣ်ခိးကွၢ်လၢ် တုၤလီၤလၢကစၢ် ဟ့ၣ်ပှၤ မ့တမ့ၢ် တုၤလီၤ လၢ ကစၢ်ဟ့ၣ် တၢ်စံးဆၢအဂၤတမံၤ လၢတၢ်သးစူၤဒီး တၢ်အၢၣ်လီၤသးန့ၣ်လီၤ.

တၢ်ထုကဖၣ်မ့ၢ် တၢ်ဃ့ကညး, တၢ်နၢ်ပၢၢ်န့ၣ်လီၤ.တၢ်ထုကဖၣ် မ့ၢ်ကျိၤကျဲလၢ ပကသ့ၣ်ညါနၢ်ပၢၢ်ဘၣ် ခီဖျိ အကလုၢ်ကထါန့ၣ် ကစၢ်စံးဆၢတၢ်မနုၤလဲၣ်န့ၣ်လီၤ. တၢ်ထုကဖၣ်န့ၣ် မၤဂၢၢ်ပာ်ဖှိၣ်ပသးလၢ အဘၣ်ဒိဒီး လီၤကလဲ န့ၣ်လီၤ. ဖဲတၢ်လီၢ်လၢ အဘှ့ၣ်အဘှီၣ်ဒီး မုာ်ခုၣ်ဝဲန့ၣ် ကစၢ်ယွၤ မၤမုာ်မၤမံပသး, သိၣ်လိနဲၣ်လိပှၤ, ဒီး ဒိကနၣ်ပှၤ လီၤ. ဖဲန့ၣ် ပမၤလိသ့ၣ်ညါဘၣ် တၢ်အဲၣ်ယွၤဒီးတၢ်ဘူၣ်ထီၣ်ဘါထီၣ်ယွၤ မ့ၢ်တၢ်ဒ်လဲၣ်န့ၣ်လီၤ.

(ဘၣ်တၢ်ထုးထီၣ်လၢ David Roper အတၢ်ကွဲး Seeing God, © 2006 Our Daily Bread Publishing အပူၤ)

တၢ်ထုကဖၣ် ကဲထီၣ်တၢ်မၤလၢအကီခဲတမံၤန့ၣ်လီၤ. ကစၢ်ယ့ၣ်ရှူးအပျဲၢ်အဘီၣ်တဖၣ်ဒၣ်လဲာ် ဃ့ကညး ကစၢ်လၢ
အကသိၣ်လိ အဝဲသ့ၣ် လၢကဘၣ်ထုကဖၣ်တၢ်ဒ်လဲၣ်န့ၣ်လီၤ. တလါညါအံၤ ပကမၤလိသကိး ဘၣ်မနုၤလၢ ပဘၣ်ဃ့
ထုကဖၣ်တၢ်လဲၣ်, မ့ၢ်ပကဒုးအိၣ်ထီၣ် တၢ်ထုကဖၣ်တၢ် လၢအိၣ်ဒီးအခီပညီလၢတၢ်အိၣ်မူအပူၤဒ်လဲၣ်အဂ့ၢ် န့ၣ်လီၤ.
ဒီးပကထံၣ်ဘၣ်စ့ၢ်ကီး တၢ်ဟ့ၣ်ကူၣ် လၢပမၤလိထံသးသ့တဖၣ်န့ၣ်လီၤ.