လါဖ့းဘြူၤအါရံၤ တၢ်ဂ့ၢ်အခိၣ်တီ | ကစၢ်ခရံာ်အရူၢ်အသဲး သကဲာ်ပဝး
ပှၤလၢနာ်ခရံာ်လၢအဆိတဖၣ် နၢ်ပၢၢ်ထါစံးထီၣ်ပတြၢၤ ၂၃ ဒ်မ့ၢ်ထါလၢ ဒုးနဲၣ် ယ့ၣ်ရှူးမ့ၢ် ပှၤကွၢ်သိအမ့ၢ်အတီလီၤ. လၢတၢ်မၤဘၣ်ထွဲ တၢ်ဂ့ၢ်အံၤန့ၣ် တလိၣ်လၢပဖးပှၤကွဲးတၢ်လၢညါတဖၣ်န့ၣ်ဘၣ်. ယ့ၣ်ရှူးမၤဘၣ်ထွဲက့ၤ တၢ်ပနီၣ် တဖၣ်အံၤ လၢအနီၢ်ကစၢ်လီၤ. ယမ့ၢ်ပှၤကွၢ်သိလၢအဂ့ၤတဂၤလီၤ အဝဲစံးဝဲ(ယိၤ ၁၀:၁၁). ဒ်ပှၤကွၢ်သိအတၢ်မ့ၢ်တၢ်ခဲလၢာ် လၢစံးထီၣ်ပတြၢၤ ၂၃ အပူၤန့ၣ် ယ့ၣ်ရှူးမ့ၢ်တၢ်လၢပဂီၢ် အခဲအံၤလီၤ. မ့ၢ်လၢအဝဲမ့ၢ် ပပှၤကွၢ်သိ လၢအဂ့ၤတဂၤအဃိ ပအိၣ်ဒီးတၢ်ခဲလၢာ် လၢပလိၣ်ဘၣ်အီၤလီၤ. ယ့ၣ်ရှူးကိး ပှၤဆူ တၢ်အိၣ်ဘှံးအလီၢ်လီၤ. အဝဲမၤဆူၣ်ထီၣ်က့ၤပသးလၢ အသဘှံးတဖၣ်လီၤ. အဝဲစိာ် ခီဖျိပှၤလၢ တၢ်သံအကဒုကစၢၢ် ကဆူးပူၤ (တမ့ၢ်လဲၤတရံးတၢ်ဘၣ်, လဲၤလိၤလိၤလီၤ).
ဖဲပလဲၤကမၣ်ကျဲန့ၣ် ယ့ၣ်ရှူး သးအိၣ်ပှၤ, သးကညီၤပှၤဒီး ကဟုကယာ်ပှၤလီၤ. ဖဲဒုၣ်ဒါဝး တရံးပှၤ, ကညီၤပှၤ, သါကအီၣ်ယူၢ်ပှၤန့ၣ် ပပှၤကွၢ်သိ အစိကမီၤ ဆူၣ်ဒီး ဒူစဃဲးလီၤ.
ယ့ၣ်ရှူးလီၤဂာ်ဒီးမနုၤလဲၣ်န့ၣ် ပသ့ၣ်ညါအီၤဖဲ ပဃုထံၣ်နၢ်ပၢၢ်ပှၤကွၢ်သိ လၢစံးထီၣ်ပတြၢၤ ၂၃ မ့ၢ်ပှၤဒ်လဲၣ်န့ၣ်လီၤ. ယ့ၣ်ရှူး အသးတီဝဲဒီးတညိကွံာ်ပှၤ နီတဘျီဘၣ်. အဝဲမ့ၢ် ပှၤဟ့ၣ်ညီတၢ်လၢ ထီဘိမၤပှဲၤန့ၢ်ပှၤ ပတၢ်လိၣ်လီၤ. အဝဲကူၣ်သ့ဝဲဒီး ထီဘိ သ့ၣ်ညါတၢ်လၢပလိၣ်ဘၣ်နီၢ်နီၢ်တဖၣ်လီၤ. အဝဲသူၣ်အိၣ်သးအိၣ်တၢ်ဒီး ကဟုကယာ် ပသးလၢ ကနိးကစုာ်တဖၣ်လီၤ. အဝဲအစိကမီၤဒိၣ်ဒီး ထီဘိထီဒါတၢ်လၢဟဲမၤပျံၤမၤဖုးပှၤ,(တၢ်လၢပပူၤ လၢမၤပျံၤပှၤ ဒ်သိးပမၤတၢ်သုတသ့တဂ့ၤ) လၢကမၤဆါပှၤတဖၣ်လီၤ. ယ့ၣ်ရှူးဆူၣ်ဝဲ ကိၤဝဲဒီး လူၤပိာ်ပခံ ပှဲၤဒီးတၢ်အဲၣ် တုၤလၢပတၢ်သါလၢ ခံကတၢၢ်လီၤ.
မုၢ်မဆါတနံၤအံၤ လၢကီၢ်အံၣ်စရ့လးန့ၣ် ပှၤကွၢ်သိတဖၣ် အါဘျီမံဝဲ ဖဲအသိကပၤ ဒီးကွၢ်ထွဲအသိ ဒီတနၤလီၤ. အါဘျီ ပှၤကွၢ်သိတဖၣ် စိာ်အနီၣ်ထိးဘိ ဒ်သိးကနီၣ်ကွံာ်ဒုၣ်ဒါလၢ ကဟဲမၤဟးဂီၤတၢ်တဖၣ်လီၤ. ပှၤကွၢ်သိတဖၣ် အတၢ်ကိးတဖၣ် လီၤဆီဒီး အတၢ်ပနီၣ် လၢညီနုၢ်သိတဖၣ်သ့ၣ်ညါဝဲလၢ အဝဲသ့ၣ်အိၣ်ဘူးဒီးအီၤလီၤ. တဘျီ ဖဲကီၢ်အံၣ်စရ့လးန့ၣ် ယကွၢ် ပှၤကွၢ်သိတဖၣ် လၢတၢ်ကမၢကမၣ်လီၤ. အဝဲသ့ၣ် အတၢ်သ့တၢ်ဘၣ်, အတၢ်ပ့ၢ်တၢ်ဆှါ, အတၢ်သ့ၣ်ညါနၢ်ပၢၢ် သိအဂ့ၢ်, ဒီးတၢ်လီၢ်တၢ်ကျဲ အတၢ်အိၣ်အသးတဖၣ် ဒုးဆူၣ်ထီၣ်ယသးလီၤ. အတၢ်သူၣ်အိၣ် သးအိၣ် အသိတဖၣ် ဒီးအဝဲသ့ၣ် အိၣ်ကတီၤ အသးထီဘိ လၢကမၤဆၢက့ၤတၢ်တဖၣ်န့ၣ်လီၤ. ဒ်သိတဖၣ် အိၣ်မုာ်အိၣ်ခုၣ် အိၣ်ဘံၣ်အိၣ်ဘၢ လၢတၢ်ကဟုကယာ်ဖီလာ် လၢအကစၢ်အသိး ပဝဲစ့ၢ်ကီး ပအိၣ်ဘှံးလၢပပှၤကွၢ်သိ အပူၤန့ၣ်လီၤ.
Winn Collier| ကိၣ်လၢတနံၤဘၣ်တနံၤ ပှၤကွဲးလံာ်
ဘၣ်မနုၤယ့ၣ်ရှူးမၤတၢ်တဲတၢ် ဒ်အမၤတၢ်, တဲတၢ်အသိးန့ၣ်လဲၣ်. တလါအံၤ ပကဃုသ့ၣ်ညါ ကျဲတနီၤ လၢယ့ၣ်ရှူး လီၣ်ဖျါအနီၢ်ကစၢ်ဒၣ်ဝဲ ဆူဟီၣ်ခိၣ်ဒီး ကွဲပှၤဒ်သိး ပကမၤဒိးက့ၤအရူၢ်အသဲးသကဲာ်ပဝးတဖၣ် လၢပတၢ်အိၣ်မူပူၤလီၤ