တၢ်ဂ့ၢ်ခိၣ်တီလၢ လါယနူၤအါရံၤအဂီၢ် | ယ့ၣ်ရှူး- အနီၢ်ကစၢ်ဒီး အတၢ်မၤ

တၢ်ဂ့ၢ်အံၤ အကါဒိၣ်ဝဲလၢ ပှၤတဂၤစုာ်စုာ်အဂီၢ် လၢကဆိကမိၣ်ထီၣ် လၢယ့ၣ်ရှူးမ့ၢ်မတၤလဲၣ်, ဒီးအဝဲမၤတၢ် မနုၤလဲၣ်လီၤ. ခီဖျိလၢအဝဲအသးသမူ, အတၢ်သံ, အတၢ်ဂဲၤဆၢထၢၣ်သမူထီၣ်က့ၤ ဒီးအတၢ်က့ၤထီၣ်ဆူမူခိၣ်န့ၣ် ကစၢ်ခရံာ်မၤလၢပှဲၤတ့ၢ် တၢ်မနုၤတဖၣ်လဲၣ်. တလါအံၤ ပကကွၢ်မၤလိသကိး ယ့ၣ်ရှူးအနီၢ်ကစၢ်ဒီး အတၢ်ဖံးတၢ်မၤ, ဒီးအတၢ်လုၢ်ထီၣ်အသးလၢပဂီၢ် တဖၣ်န့ၣ်လီၤ.

ဘၣ်ထွဲဒီး ယ့ၣ်ရှူးအတၢ်တဲဖျါထီၣ်အသး, “ယဲဒၣ်အံၤ ယမ့ၢ်ကျဲ, ဒီးတၢ်မ့ၢ်တၢ်တီ, ဒီးတၢ်မူလီၤ. မ့တမ့ၢ်ဘၣ်ယၤဒီး ပှၤတဟဲ ဘၣ်ဆူ ပၢ်အအိၣ်နီတဂၤဘၣ်“ (ယိၤ ၁၄:၆)အံၤန့ၣ် ပကဆိကမိၣ်ကွၢ်ထံဒ်လဲၣ်. ယ့ၣ်ရှူးစံး “ပှၤလၢ အတအိၣ်ဘၣ်ဒီး ယၤဘၣ် မ့ၢ်အထီဒါ ယၤလီၤ“(မး ၁၂:၃၀). ပမ့ၢ်တဲလၢ ကျဲအဂၤတဘိန့ၣ် ပအိၣ်ဖဲ တၢ်အဘၢၣ်စၢၤန့ၣ် တသ့ဘၣ် န့ၣ်လီၤ. Shelton Vanauken (ရှဲလတၢၣ် ပနီကၢၣ်) ဘၣ်ကွၢ်ဆၢၣ်မဲာ်ဒီး တၢ်ဂ့ၢ်ဖိတမံၤ ဖဲအဝဲကတိၤဆဲးကျိးလိာ် အသးဒီး Oxford (အီးကစဖီး) အဖၠၣ်စိမိၤသရၣ်ဒိၣ်စိ C. S. Lewis (စံၣ်. အဲး(စ). လူဝံး(စ)) ဘၣ်ထွဲဒီး ခရံာ်ဖိ အတၢ်ဘူၣ်တၢ်ဘါအဂ့ၢ် လၢဆၢကတီၢ် အါဘျီဝံၤ အလီၢ်ခံလီၤ.

လၢလံာ်အမံၤ (A Severe Mercy)“တၢ်သးကညီၤဒိၣ်ဒိၣ်မုၢ်မုၢ်“အပူၤန့ၣ် ပနီကၢၣ်ကွဲးဝဲလၢ လၢတၢ်ပျံၤတၢ်ဖုးအပူၤ အဝဲနၢ်ပၢၢ်ဝဲလၢ အဝဲ “က့ၤကဒါက့ၤ တသ့လၢၤဘၣ်လီၤ“.

“တၢ်အံၤ မ့ၢ်တၢ်သ့ၣ်ညါလၢ အလီၤပျံၤဖးဒိၣ်န့ၣ်လီၤ. ခရံာ်ဖိအတၢ်ဘူၣ်တၢ်ဘါ အံၤ လၢတဘျီန့ၣ် ယပာ်အီၤ ဒ်တၢ်တဲမုာ်နၢ်, ဒီးယတတူၢ်လိာ်အီၤအသိး, ယတထီဒါစ့ၢ်ကီးအီၤဘၣ်. မ့ၢ်လၢ ယတထံၣ် လိာ်သးဒီးယ့ၣ်ရှူး နီတဘျီဘၣ် အဃိလီၤ. အခဲအံၤ ယတၢ်အိၣ် အသး တမ့ၢ်လၢၤဘၣ် လၢယကဘၣ်စံးဆၢ တၢ်သံကွၢ်လၢ မ့ၢ်ယကဘၣ်တူၢ်လိာ် မ့းရှံအၤဧါ, တဘၣ်တူၢ်လိာ်အီၤ ဘၣ်ဧါလီၤ. မ့မ့ၢ်တၢ်သံကွၢ်နီၢ်နီၢ် လၢယကဘၣ် စံးဆၢန့ၣ် မ့ၢ်ယကဘၣ် တူၢ်လိာ်အီၤဧါ, မ့တမ့ၢ် ဂ့ၢ်လိာ်ထီဒါအီၤဧါလီၤ. အဝဲမ့ၢ် ယကစၢ်ဧါ. လၢယလီၢ်ခံ အိၣ်စ့ၢ်ကီးဒီး တၢ်ဘၢၣ်စၢၤလီၤဟိဖးဒိၣ်လီၤ. ဘၣ်သ့ၣ်သ့ၣ် တၢ်ကခီတၢ်လီၤဟိဖးဒိၣ် အတၢ်စံၣ်တဘီ ဘၣ်ထွဲတၢ်တူၢ်လိာ်အံၤ မ့ၢ်တၢ်တၤ တၢ်လီၤပျံၤလီၤဖုး တမံၤလီၤ. ဘၣ်ဆၣ် မ့မ့ၢ်တၢ်ဂ့ၢ်လိာ်ထီဒါ အတၢ်စံၣ်ဖိတဘီ ခီလဲၣ်. ယမ့ၢ်ဂ့ၢ်လိာ် ထီဒါတၢ်န့ၣ်, ယကဘၣ် ကွၢ်ဆၢၣ်မဲာ်သပှၢ်ကတၢၢ်ဒီး တၢ်မၤပျံၤယၤ လၢပိာ်ထွဲယခံန့ၣ်လီၤ. “တၢ်ကတိၤတဘီလၢ အစံး အဝဲမ့ၢ်ယကစၢ်လီၤန့ၣ် ဘၣ်တဘၣ် မ့မ့ၢ်ဝဲဘၣ်ဝဲ သပှၢ်ကတၢၢ်ဒီး, ယထီဒါဘၣ် ယယွၤလံလီၤ“. တၢ်ဆိမိၣ်အံၤ လီၤပျံၤဒိၣ်မးလီၤ.

ပနီကၢၣ်ဆၢတဲာ်ဝဲလၢ တၢ်လၢမၤဝဲသ့ အိၣ်ထဲတမံၤ, ဒီးအဝဲဃုထၢဝဲ အယွၤဒီးအကစၢ်- “ဒ်သိးကစူၢ်နာ် ပၢ်ကစၢ်, ဖိကစၢ်, ဒီးသးစီဆှံကစၢ်- လၢခရံာ်အပူၤလီၤ. ခရံာ်ဖိ အတၢ်ဘူၣ်တၢ်ဘါ (မၤဒုးကဲထီၣ်ပတၢ်အိၣ်မူ)- လၢတၢ်လီၤဟိ လီၤကအိအလီၢ် တၢ်ပှဲၤကွံာ်, လၢတၢ်အခီပညီတအိၣ်အလီၢ် တၢ်လၢပှဲၤဒီး တၢ်အခီပညီလီၤ”.

ယ့ၣ်ရှူးတၤပှၤဒီး အတၢ်တဲဖျါထီၣ်လၢ အဝဲမ့ၢ်ယွၤလၢအိၣ်ဒီး ပှၤကညီအက့ၢ်အဂီၤ, မ့ၢ်ပှၤအုၣ်က့ၤခီၣ်က့ၤဟီၣ်ခိၣ်, ဒီး မ့ၢ်တၢ်မူအဂံၢ်ထံး ခဲအံၤဒီး အစိၤစိၤဃၣ်ဃၣ်လီၤ. နကစံးဆၢမၤဆၢက့ၤအီၤဒ်လဲၣ်.

ဘၣ်တၢ်ထုးထီၣ်လၢ ယမ့ၢ်ကျဲ : Jack Kuhatschek အတၢ်ကွဲး I am the Way: The Amazing Claims of Jesus အပူၤ

<< ဖးက့ၤအပူၤကွံာ်လါ အတၢ်ကွဲး