လါအီကူာ် တၢ်ဂ့ၢ်အခိၣ်တီ | ပတၢ်မ့ၢ်တၢ်နီၢ်နီၢ်
ပဝဲကိးဂၤပအဲၣ်ဒိးလၢပှၤကထံၣ်ပှၤ ဒ်ပတၢ်မ့ၢ်တၢ်နီၢ်နီၢ်အသိးန့ၣ်လီၤ. ဒ်ပမ့ၢ်ပှၤစူၢ်က့ၤနာ်က့ၤကစၢ်ယ့ၣ်ရှူးတဖၣ်, ဘၣ်တဘျီဘျီ ပကလၢၢ်ဘၣ်တၢ်ဆီၣ်သနံးပှၤလၢ ပကဘၣ်ပာ်မၤပသး မ့တမ့ၢ် ပကဘၣ်ပာ်ခူသူၣ် တၢ်တနီၤနီၤ လၢပတၢ်အိၣ်မူအပူၤ ဒ်အမ့ၢ်ပတၢ် တလၢတပှဲၤ, ပတၢ်ဂံၢ်စၢ်ဘါစၢ်တဖၣ်န့ၣ်လီၤ. တၢ်မၤညီနုၢ်တၢ်အိၣ်မူအိၣ်ဂဲၤ ဒ်ပတၢ်မ့ၢ်တၢ်နီၢ်နီၢ်လၢပတၢ်စံးတၢ်ကတိၤ, ဒီးလၢပတၢ်ဖံး တၢ်မၤတဖၣ်အပူၤအဂီၢ်န့ၣ် ပကဘၣ်သ့ၣ်ညါပာ်ပနီၣ်တၢ်လၢ ပလိၣ်လၣ်တၢ်ပျၢ်ပတၢ်ကမၣ်, တၢ်ဒဲးဘးအဂီၢ်န့ၣ်လီၤ. ပမ့ၢ်ဟံးဃာ်ဂၢၢ်ကျၢၤ ပတၢ်မ့ၢ်တၢ်နီၢ်နီၢ်တုၤအကတၢၢ်န့ၣ်ဒီး ပတၢ်ဂံၢ်စၢ်တဖၣ်န့ၣ် ကဲထီၣ်တၢ်မၤလၤပပီၤကစၢ်ယွၤအဘျုးအဖှိၣ် လၢအလီၤကမၢကမၣ်ဒိၣ်ဒိၣ်ကလဲာ်သ့ဝဲဒၣ် န့ၣ်လီၤ.
ဒ်သိးပကမၤညီနုၢ်အိၣ်မူအိၣ်ဂဲၤဒ်ပတၢ်မ့ၢ်တၢ်နီၢ်နီၢ်အဂီၢ် မ့ၢ်ပမၤတၢ်တမံၤမံၤကသ့ဧၣ်.
ဃ့ကစၢ်ယွၤဒ်သိးကအိးထီၣ်နမဲာ်အတၢ်ထံၣ်. ဃ့ထုကဖၣ်ဒ်သိး ပှၤကွဲးထါစံးထီၣ်ပတြၢၤ ၁၃၉:၂၃-၂၄ အပူၤ ထုကဖၣ်ဝဲအသိး,“ကစၢ်ဧၢ, ဃုကွၢ်ယၤ, ဒီးသ့ၣ်ညါယသးတက့ၢ်,… ဒီးကျဲအအၢ လၢယပူၤမ့ၢ်အအိၣ်, တအိၣ်လဲၣ်န့ၣ် ကွၢ်,..”နသးပူၤကစၢ်ယွၤအဲၣ်ဒိး နဆိကမိၣ်တၢ်မနုလဲၣ်န့ၣ်, လၢနတၢ်ထုကဖၣ်အပူၤကွၢ်ထံဆိကမိၣ်အီၤတက့ၢ်.
တၢ်ပီၣ်ယၢ်လီၤက့ၤသးလၢတၢ်ဆီၣ်လီၤသးအပူၤစံးဆၢကစၢ်ယွၤတက့ၢ်. ဆိကမိၣ်ကွၢ် တၢ်တဲပူဟ့ၣ်ဒိ ပှၤဖၤရံၤရှဲဒီး ပှၤဃ့သွဲအဂ့ၢ် ဖျါဖဲ လံာ်လူၤကၣ် ၁၈:၁၃ အပူၤ ဖဲပှၤဖၤရံၤရှဲစံးပတြၢၤဂ့ၤက့ၤအတၢ်တီတၢ်လိၤ အဆၢကတီၢ်, ပှၤဃ့သွဲထုကဖၣ်ဝဲလၢတၢ်ပီၣ်ယၢ်လီၤက့ၤသး “ယွၤဧၢ, သူၣ်ကညီးသးကညီၤပှၤတၢ်ဒဲးဘးဖိယၤအံၤတက့ၢ်“ န့ၣ်လီၤ. အဆၢဖိ၁၄ အပူၤ ကစၢ်ယ့ၣ်ရှူး စံးဝဲ “အအံၤတဂၤဘၣ်တၢ်ပာ်တီပာ်လိၤအီၤဒီး, က့ၤလီၤက့ၤဝဲဆူအဟံၣ်လီၤ. အဂ့ၢ်ဒ်အံၤ, ကယၢ်ပှၤလၢအပာ်ထီၣ်ထီအသးန့ၣ် ကဘၣ်တၢ်ဆီၣ်လီၤအီၤလီၤ. ဒီးပှၤလၢအဆီၣ်လီၤအသးန့ၣ်, ကဘၣ် တၢ်ပာ်ထီၣ်ထီအီၤလီၤ”န့ၣ်လီၤ.
သးခုလၢယွၤအဘျုးအဖှိၣ်အပူၤန့ၣ်တက့ၢ်. ၂ကရံၣ် ၁၂:၉ အပူၤ စီၤပီလူးအုၣ်အသးလၢ ကစၢ်ယွၤ စံးဘၣ်အီၤ “ယဘျုးယဖှိၣ်အါလံ လၢနဂီၢ်လံ. အဂ့ၢ်ဒ်အံၤ, ယစိယကမီၤလၢထီၣ်ပှဲၤထီၣ်လၢ တၢ်အဂံၢ်စၢ် အဘါစၢ် အပူၤလီၤ. ပတၢ်သ့ၣ်ညါတူၢ်လိာ် ပတၢ်ဂံၢ်စၢ်ဘါစၢ်ဒီး ပတၢ်ဒဲးဘးန့ၣ် ပာ်ပှၤလၢတၢ်လီၢ် တၢ်ကျဲ အဘၣ်, ဒ်သိးပကဃုထံၣ်န့ၢ်ဘၣ် ကစၢ်ယွၤအတၢ်ပာ်တီပာ်လိၤက့ၤပှၤဒီး ခီဖျိလၢသးစီဆှံ အတၢ်မၤန့ၣ် ပကလဲလိာ်က့ၤပသး ဒ်သိး ပကလီၤဂာ်အါထီၣ်ဒီးကစၢ်ယ့ၣ်ရှူးခရံာ်အဂီၢ်န့ၣ်လီၤ.
ပာ်လီၤသးဒ်သိးကအိၣ်မူအိၣ်ဂဲၤလၢတၢ်သးတီသးလိၤ. ပှၤဂုၤပှၤဂၤအတၢ်ထံၣ်, အတၢ်ဆိကမိၣ် မ့ၢ်ဆီတလဲအသးလၢပလိၤဒၣ်လဲာ် အိၣ်မူအိၣ်ဂဲၤဒ်နတၢ်မ့ၢ်တၢ်နီၢ်နီၢ်အသိးန့ၣ်တက့ၢ်. ပကဘၣ်ဆၢတဲာ်ဆိတၢ်လၢ တၢ်ဘၣ်ကစၢ်ယွၤအသးအဂီၢ်န့ၣ် ၁ သ့း ၂:၄ ပာ်ဖျါဝဲ “မ့ၢ်ယွၤလၢအမၤကွၢ် ပသူၣ်ပသးတဂၤအသးလီၤ”.
ပအိၣ်မူအိၣ်ဂဲၤဒ်ပတၢ်မ့ၢ်တၢ်နီၢ်နီၢ် လၢကစၢ်ယ့ၣ်ရှူးအပူၤန့ၣ် ကမ့ၢ်တၢ်ဆီၣ်လီၤပှၤဒီး ကဲထီၣ်တၢ်ကီခဲသ့ဝဲဒၣ်လၢပဂီၢ် န့ၣ်လီၤ. ဘၣ်ဆၣ် ပကအိၣ်မူအိၣ်ဂဲၤဒ်သိးအံၤအဂီၢ် ကစၢ်ယ့ၣ်ရှူးဟ့ၣ်ဂံၢ်ဟ့ၣ်ဘါမၤစၢၤပှၤအဃိ, ကစၢ်ယွၤကမၤ လၤကပီၤအီၤဒီး ပှၤဂုၤပှၤဂၤကထံၣ် သ့ၣ်ညါပတၢ်စူၢ်တၢ်နာ်
အမ့ၢ်အတီန့ၣ်လီၤ.
Karen Pimpo | ကိၣ်လၢတနံၤဘၣ်တနံၤ ပှၤကွဲးလံာ်