လါမၢ်ရှး တၢ်ဂ့ၢ်အခိၣ်တီ | ကစၢ်ယွၤအပှၤပၢၤတၢ်လၢအဂ့ၤ

ယတံၤသကိးအဂၤတဂၤန့ၣ်, ထၢနုာ်ယၤလၢ လီလံာ်ပရၢကမၤသကိးတၢ်တကရူၢ်အပူၤ, ဖဲလၢအဒုးအိၣ်ထီၣ် တၢ်ရဲၣ် တၢ်ကျဲၤ လၢကမၤဝဲဒၣ်ယံာ်ယံာ် ဒ်အမ့ၢ် တၢ်ထၢပာ်ဖှိၣ်တၢ်မၤစၢၤ (တၢ်အီၣ်တၢ်အီ, တၢ်ဆှၢထီၣ်ဆှၢလီၤ အတၢ်လဲၤက့ၤ ဟံၣ်ဒီးတၢ်ဆါဟံၣ်, ကျိၣ်စ့တၢ်မၤဘူၣ်) လၢတီၤကၠိဖိမုၣ်တဂၤလၢအဘၣ်ကွၢ်ဆၢၣ်မဲာ်ဒီး ခဲစၢၣ်တၢ်ဆါအဂီၢ်န့ၣ်လီၤ. ယတံၤသကိးလၢ အတဂၤစ့ၢ်ကီး နုာ်လီၤဃုသ့ၣ်ညါ ထံထံဆးဆးဘၣ်ထွဲဒီး ကနဲဖိတဖၣ်သံဂီၢ်မုၢ်ဂီၢ်ပၤဒီး တၢ်ဘၣ်ယိၣ် အလီၢ်အိၣ်လၢကနဲတဖၣ် ကလီၤမၢ်ကွံာ်အတၢ်ဂ့ၢ်ကီ ဒီးတၢ်ကီတၢ်ခဲနးနးဒိၣ်ဒိၣ်လၢအဟဲဘၣ်ဒိဘၣ်ထံး တၢ်ဒိးန့ၢ်ဘၣ် တၢ်အီၣ်တၢ်အီတဖၣ်န့ၣ်လီၤ. အဝဲရၤလီၤဝဲတၢ်အိၣ်သးအတၢ်ကစီၣ်နီၢ်နီၢ် ဘၣ်ထွဲဒီးတၢ်လၢ ပကဘၣ်မၤတၢ် လၢကနဲဖိ တဖၣ်အဂီၢ်- ဒ်အမ့ၢ်ပကမၤစၢၤ, မၤဂ့ၤထီၣ်ခိၣ်ဃၢၤန့ဆၢၣ် လၢပှၤကိးဂၤဒဲးအဂီၢ်န့ၣ်လီၤ.

ပှၤကညီသၢဂၤလၢအတဒ်သိးလိာ်သး, အိၣ်ဆိးလၢတၢ်လီၢ်တဂၤတပူၤ, အိၣ်မူအိၣ်ဂဲၤဂၤမံၤဂၤမၠိ, အိၣ်ဒီး တၢ်သ့တၢ်ဘၣ်လီၤလီၤဆီဆီ, ဃုာ်ဒီးကံၢ်စီဂံၢ်ခီၣ်ထံး (ပှၤကညီ, တၢ်ကူၣ်သ့, ကျိၣ်စ့ စုလီၢ်ခီၣ်ခိၣ်), ပှၤသ့ၣ်တဖၣ်အံၤန့ၣ် ဟ့ၣ်ထီၣ်ဝဲ ဒ်အတၢ်မ့ၢ်တၢ်ဒီး တၢ်လၢအိၣ်ဒီး အဝဲသ့ၣ်တဖၣ်န့ၣ် ဆူ တၢ်ဖံးတၢ်မၤတၢ်လၢပှၤဂုၤပှၤဂၤအဂီၢ် န့ၣ်လီၤ. တၢ်မၤအံၤမ့ၢ် စီၤပ့းတရူးအတၢ်တၤပှၤလီၤတံာ်လီၤဆဲး လၢပကဘၣ် အိၣ်မူအိၣ်ဂဲၤတၢ်အဂီၢ်န့ၣ် ဖျါဖဲ ၁ ပ့း ၄:၁၀ အပူၤ “ပှၤတဂၤဒီးတဂၤ, ဒ်ကစၢ်ယွၤ အပှၤပၢၤတၢ်လၢအဂ့ၤ, လၢအပၢၤ ကစၢ်ယွၤ အတၢ်ဟ့ၣ် လၢအလီၤဆီတဖၣ်အသိး, ကဘၣ်သူ အတၢ်ဟ့ၣ်လီၤဆီလၢအဒိးန့ၢ်ဝဲလၢကစၢ်ယွၤအအိၣ် လၢပှၤဂၤတဖၣ်အတၢ်ဂ့ၤအဂီၢ်န့ၣ်လီၤ. (ခ့ခါ)”

ပတၢ်လုၣ်ဘၢစိကမီၤဒိၣ်တၢ်အဂ့ၢ်, ပတၢ်သ့မၤတၢ်ကံၢ်စီစဲၣ်နီၤတဖၣ်အဂ့ၢ်, ဒီးကျိၣ်စ့အဂ့ၢ်, တၢ်သ့ၣ်တဖၣ် အဂ့ၢ်အါဂ့ၤစှၤဂ့ၤ စီၤပ့းတရူး တစံးကတိၤပာ်ဖျါဝဲဒၣ်ဘၣ်. တၢ်ဖံးတၢ်မၤအကါဒိၣ်မ့ၢ်ဂ့ၤဆံးမ့ၢ်ဂ့ၤ, တၢ်ကဲဘျုးအိၣ် အါမ့ၢ်ဂ့ၤစှၤမ့ၢ်ဂ့ၤန့ၣ် တထုးန့ၢ်စီၤပ့းတရူးအသးဘၣ်. တၢ်လၢ စီၤပ့းတရူးမၤဂၢၢ်မၤကျၢၤပှၤန့ၣ် တၢ်လၢကစၢ်ယွၤ နာ်န့ၢ်ပှၤအဃိ ဟ့ၣ်လီၤပှၤအတၢ်ဟ့ၣ်တဖၣ်န့ၣ် ပကဘၣ်စူးကါအီၤဒီးမၤတၢ်လၢ ပှၤဂုၤပှၤဂၤအဂီၢ်န့ၣ်လီၤ.

.