လါအီကူာ်အခိၣ်တီ | ကစၢ်ယွၤအဒူၣ်ဖိထၢဖိ (ဟံၣ်ဖိဃီဖိ)

မ့ၢ်လၢ ကိဘ့းတၢ်ဆါအဂီၢ် တၢ်ဘျၢလၢပၥ်ပနီၣ် ၦၤသမှံၤကဘၣ်ဟဲဒၣ်ထဲ ၦၤအဂၤသၢဆံ အဃိ ယတလဲၤဘၣ်တၢ်သ့ၣ်နီၣ်ထီၣ်က့ၤ တၢ်ဘါတၢ်ရဲၣ်တၢ်ကျဲၤလၢ ပၣ်မဲၣ်လၣ်အဂီၢ်န့ၣ် ဘၣ်. ဘၣ်ဆၣ် ကကွၢ်ဘၣ်တၢ်ရဲၣ်တၢ်ကျဲၤလၢ အ့ထၣ်နဲးအပူၤ ဒီးယဆိကမိၣ်ယဲလၢ ဟီၣ်ခိၣ်ဒီဘ့ၣ်ၦၤအါဂၤဃုၥ်ဒီးအဟံၣ်ဖိဃီဖိတဖၣ် လၢမၣ်လၣ်ဝံၣ် (ထံကီၢ် တၢ်လီၢ်လၢ ၦၤပၥ်လီၤအီၤအသွၣ်ခိၣ်လီၢ်) တဖၣ် ကစံးဘျုးစံးဖှိၣ်ဝဲ ဒ်အမ့ၢ် ပိၥ်မုၣ်တဂၤလၢ သူၣ်ဆူၣ်သးဆူၣ်, ဘၣ်တၢ်အဲၣ်အီၤ ဒီးမၤသူၣ်ဖှံသးညီၦၤဂၤတဂၤန့ၣ်လီၤ.

ပတၢ်ဘါယွၤသရိၥ်လၢဝ့ၢ်လိဒိၣ်ကလံၤစိးန့ၣ် ပၣ်မဲၣ်လၣ်န့ၣ် မ့ၢ်ပိၥ်မုၣ်တဂၤလၢ အဟဲဝဲဒၣ်လၢထံကီၢ်အဂၤ ဒ်သိးယၤ ဒီးယပၥ်ဂံၢ်ပၥ်ဘါအီၤ ဒ်အမ့ၢ် ဒီပုၢ်ဝဲၢ်မုၣ်တဂၤလၢ ခရံၥ်အပူၤန့ၣ်လီၤ. ကစၢ်ယွၤအဒူၣ်ဖိထၢဖိစံးတၢ်န့ၣ် တၢ်လၢအလဲၤ တလၢကွံၥ်ကလုၥ်ဒူၣ် အကရၢကရိဒီး ကယဲၢ်တၢ်လၢမၤလီၤဖးတၢ်န့ၣ်လီၤ. အဂ့ၢ်ဒ်အံၤ ပဝဲကိးဂၤဒဲး ပပၢ်မ့ၢ် ကစၢ်ယွၤတဂၤဃီလၢ မူခိၣ်ဘီမုၢ်အပူၤန့ၣ်လီၤ. လၢခရံၥ်အပူၤ ကစၢ်ယွၤဒုးကဲထီၣ်ၦၤတၢ်တသွံၣ်ဃီတညၣ်ဃီန့ၣ်လီၤ.

တၢ်မၢဖိစီၤပီလူးကွဲးအလံၥ်ပရၢဆူ ၦၤအ့ဖ့းစူးဖိတဖၣ်အအိၣ်န့ၣ် အဝဲမၤလဲၢ်ထီၣ်ဝဲ ဟံၣ်ဖိဃီဖိ အတၢ်ဘၣ်ထွဲလိၥ်သးန့ၣ်လီၤ. စီၤပီလူးစံးကတိၤ ဟ့ၣ်ပလီၢ်ဝဲဒၣ်လၢ လံၥ်အ့ဖ့းစူး ၂:၁၉-၂၀ အပူၤ “သုတမ့ၢ်လၢၤဘၣ် ၦၤတခီဘီမုၢ်ဖိ ဒီးၦၤတမှံၤဘၣ်. မ့မ့ၢ် ၦၤဝ့ၢ်ဖိသကိးၦၤဝ့ၢ်ဖိ ဒီးၦၤစီဆှံ, ဒီးယွၤအၦၤဟံၣ်ဖိဒီးတၢ်မၤထီၣ်သုလၢၦၤတၢ်မၢဖိ ဒီးဝံသ့ၣ်တဖၣ်အခီၣ်ထံးအဖီခိၣ်, ဒီးယ့ၣ်ၡူးခရံၥ်အကစၢ်ဒၣ်ဝဲ မ့ၢ်ဟံၣ်အသနၢၣ် အခီၣ်ထံးလီၤ”န့ၣ် တၢ်ဂ့ၢ်ဘၣ်ထွဲဒီး ၦၤယူဒၤ ဒီးၦၤတခီဘီမုၢ်ခရံၥ်ဖိတဖၣ် အဘၢၣ်စၢၤ တၢ်လီၤမုၢ်လီၤဖး, တၢ်အဒူၣ်အဆၢအိၣ်ဝဲအဃိန့ၣ်လီၤ. စီၤပီလူးသ့ၣ်ညါဝဲလၢ ယွၤအၦၤဂီၢ်မုၢ်တဖၣ် ဘၣ်တၢ်ပၥ်ဖှိၣ်အီၤတပူၤဃီ ဒ်အမ့ၢ် ဟံၣ်ဖိဃီဖိအသိးန့ၣ် ပကထံၣ် ဘၣ်ဖဲ ရိမ့ၤ ၂:၂၂ အပူၤ “ဒီးလၢအဝဲဒၣ်အပူၤ တၢ်သူၣ်ထီၣ်ဃုၥ်သုလၢယွၤအိၣ်ဝဲဆိးဝဲ အလီၢ်လၢသးအပူၤလီၤ”န့ၣ်လီၤ.

ၦၤစူၢ်က့ၤနၥ်က့ၤ ကစၢ်ယ့ၣ်ၡူးတဖၣ်အကျါ တၢ်တဒ်သိးလိၥ်အသးတဖၣ် မ့ၢ်အိၣ် ဘၣ်ဆၣ် ပကွၢ်ထီၣ်တၢ်ဆူ ကစၢ်ယွၤအအိၣ် ဒ်သိးကမၤစၢၤၦၤလၢ ပကအိၣ်ဃူအိၣ်ဖိး အဂီၢ်န့ၣ်လီၤ. ခီဖျိယွၤအသးစီဆှံန့ၣ် ကစၢ်ယွၤကမၤပၢၤမၤဘျ့ ပတၢ်ထံၣ်, ပတၢ်ပၥ်သူၣ် ပၥ်သး အဖုၣ်အထီတကးဒ်ဘၣ်န့ၣ် ကမၤစၢၤ ၦၤလၢပကမၤလီၤမၣ်ကွံၥ် ပတၢ်တဒ်သိး လိၥ်သးအဒိၣ်အယိာ်ကတၢၢ်တဖၣ်န့ၣ်လီၤ. တၢ်လၢအပၥ်ဖှိၣ်ၦၤလၢ အမ့ၢ်ပၢ်ကစၢ်, ဖိခွါကစၢ် ဒီးသးစီဆှံကစၢ်န့ၣ် ဂ့ၤန့ၢ်ဒိၣ်န့ၢ် တၢ်လၢအမၤလီၤဖးၦၤန့ၣ်လီၤ.

Amy Boucher Pye ၊ ကိၣ်လၢတနံၤဘၣ်တနံၤၦၤကွဲးလံၥ်