ပတၢ်အိၣ်ဖှိၣ် ဘၣ်တူၢ်လိာ်ကွၢ်ထွဲ ပှၤဘၣ်ကီဘၣ်ခဲတဖၣ်, မ့ၢ်လၢထံကီၢ်ခိၣ်နၢ် ဆီတလဲအဃိ, ဘၣ်ဃ့ၢ်ဟးထီၣ်လၢအထံကီၢ်န့ၣ်လီၤ. ဟံၣ်ဖိဃီဖိတဖၣ် ဟဲစိာ်ဝဲဒၣ် အတၢ်ပိးတၢ်လီဖိတဖၣ် န့ၢ်ဝဲဒၣ်ထဲ ထၢၣ်အဆံးဖိတဖျၢၣ်န့ၣ်လီၤ. ပတၢ်အိၣ်ဖှိၣ်ဖိအကျါတနီၤန့ၣ် ဘၣ်အိၣ်ဆိးဝဲလၢဟံၣ်အဆံးဖိဒၣ်လဲာ်, ပတၢ်အိၣ်ဖှိၣ်ဖိအါဒံအါဂၤတူၢ်လိာ်မုာ် ပှၤဘၣ်ကီဘၣ်ခဲတဖၣ်န့ၣ်လီၤ.

တၢ်အဲၣ်တူၢ်တံၤတူၢ်သမှံၤဒ်သိးအံၤန့ၣ်, ဒုးထံၣ်သ့ၣ်ညါက့ၤပှၤ ကစၢ်ယွၤ မၤလိာ် ပှၤအံၣ်စရ့လးဖိတဖၣ် တချုးနုာ်လီၤအိၣ်ဆိးဝဲ ဖဲကီၢ်တၢ်စံးပာ်အပူၤန့ၣ်လီၤ. ဒ်အမ့ၢ် ပှၤတဝၢဖိတဖၣ်လၢ အသူၣ်အီၣ်ဖျးအီၣ်တၢ်အသိး, တၢ်ကူးဘု မ့ၢ်တၢ်လၢအကါဒိၣ်တမံၤန့ၣ် အဝဲသ့ၣ်သ့ၣ်ညါနၢ်ပၢၢ်ဝဲဒၣ်န့ၣ်လီၤ. ဒ်သိးကအီၣ်ဘၣ်အီဘၣ် တုၤနံၣ်လၢအကဟဲ တၢ်ကူးဘုအကတီၢ်, ကလိၣ်ဘၣ်ဝဲ တၢ်အီၣ်တၢ်အီလၢလၢလီၢ်လီၢ်န့ၣ်လီၤ. ဘၣ်ဆၣ်, ကစၢ်ယွၤ မၤလိာ် ပှၤအံၤစရ့လးဖိတဖၣ်လၢ “တုၤနကူးဘုလၢနစံာ်ပူၤ, ဒီးနသးပ့ၤနီၣ်ဘုတကဒိၣ်ဒီး, နတဘၣ်က့ၤကဒါက့ၤဟံးန့ၢ်အီၤဘၣ်. ကအိၣ်ဝဲလၢပှၤတခီဘီမုၢ်ဖိအဂီၢ်, လၢပှၤဖိၣ်ဃဲဖိအဂီၢ်, ဒီးလၢပှၤမုၣ်ကမဲအဂီၢ်,….” (၅ မိၤ ၂၄:၁၉) န့ၣ်လီၤ. တမ့ၢ်ဘၣ်အသ့ၣ်ညါဝဲလၢ အတၢ်အိၣ်လၢလၢလီၢ်လီၢ်အဃိ, ဟ့ၣ်ဝဲဒၣ်န့ၣ်ဘၣ်. ကဘၣ်သးအိၣ်ဟ့ၣ်ဝဲ ခီဖျိလၢအနာ်သန့ၤ ကစၢ်ယွၤ အတၢ်ကတဲာ်ကတီၤန့ၢ်တၢ်လၢအဝဲသ့ၣ် “ဒ်သိးယွၤနကစၢ်ကဆိၣ်ဂ့ၤနၤလၢ ကယဲၢ်နမၤတၢ်လၢနစု” အဂီၢ်န့ၣ်လီၤ.

တၢ်အဲၣ်တူၢ်တံၤတူၢ်သမှံၤ အလုၢ်အလၢ်အံၤ ဒုးသ့ၣ်နီၣ်ထီၣ်က့ၤ ပှၤအံၣ်စရ့လးဖိတဖၣ်လၢ “နမ့ၢ်ပှၤကုၢ်ဖိလၢ ကီၢ်အဲၤကူပတူးအပူၤ” (:၂၂) အဂ့ၢ်န့ၣ်လီၤ. ပတလဲၤခီဖျိကွၢ်ဆၢၣ်မဲာ် တၢ်မၤအၢမၤနးပှၤဒ်သိးအံၤဘၣ်ဆၣ်, ဒ်ပှၤဘၣ်အိၣ်လၢ ပပှၤတဝၢအချၢတဖၣ်အသိး, (မ့) ဒ်ပှၤလၢအလိၣ်ဘၣ်တၢ်မၤစၢၤတဖၣ်အသိးန့ၣ် ပဝဲခဲလၢာ် ပဘၣ်လဲၤခီဖျိကွၢ်ဆၢၣ်မဲာ်ဝဲဒၣ်န့ၣ်လီၤ. ဖဲပဟ့ၣ်မၤဂ့ၢ်မၤစၢၤ ပှၤဂုၤပှၤဂၤအကတီၢ်, ပကဘၣ်သ့ၣ်နီၣ်ထီၣ်က့ၤ တၢ်လၢပလိၣ်ဘၣ်သပှၢ်တၢၢ်, ပကပူၤဖျဲးလၢပတၢ်ဒဲးဘးအဂီၢ်န့ၣ်လီၤ. အဂ့ၢ်ဒ်အံၤ, “ဖဲပမ့ၢ်ပှၤတၢ်ဒဲးဘးဖိအဖၢမုၢ်ဒီး, ခရံာ်ဒိးသံအသးလၢပဂီၢ်” (ရော ၅:၈) အဃိန့ၣ်လီၤ.

ပအဲၣ်တူၢ်တံၤတူၢ်သမှံၤစံးတၢ်န့ၣ် “တမ့ၣ်ဘၣ်လၢ တၢ်သးအုးဒီးတၢ်မၤဆူၣ်ဘၣ်” (၂ ကရံၣ် ၉:၇) အဃိ, မ့ၢ်ဒၣ်ပမၤလၤကပီၤ ပကစၢ်ပယွၤလၢ အသူၣ်အိၣ်သးအိၣ်တၢ်တဂၤန့ၣ်လီၤ.