ဖဲ ၁၉၄၇ နံၣ်န့ၣ်, ကီၢ်အဲကလံး အ့ဒံယၢၣ် ဘီမုၢ် (British Indian Empire) လီၤပှီၢ်ကွံာ်ဝဲဒၣ်, ဒီးပှၤအါန့ၢ် ၁၅ ကကွဲၢ်တဖၣ် ဘၣ်သုးလီၢ်သုးကျဲ လၢတၢ်ဘူၣ်တၢ်ဘါအဂ့ၢ်အခၢးအဃိန့ၣ်လီၤ. ခီဖျိလၢတၢ်စူၤအကတီၢ်ထံဒိၣ်နိယွၤ, ဒီးတၢ်ဆူးတၢ်ဆါ အတၢ်ကူဘၣ်ဂာ်အဃိ, တၢ်လဲလိာ်သးဖးဒိၣ်လၢ အဒုးကဲထီၣ်တၢ်သဘံၣ်ဘုၣ်အံၤ နးဒိၣ်ထီၣ်ဝဲဒၣ်လၢ ထံကီၢ်အဂီၢ်န့ၣ်လီၤ. ပှၤဘၣ်ကီဘၣ်ခဲတဖၣ် အါန့ၢ် တကကွဲၢ်, ဘၣ်သံကွံၢ်ဝဲဒၣ်န့ၣ်လီၤ.
တၢ်စံၣ်စိၤတဲစိၤဒီတစိၤန့ၣ်, လၢတၢ်ဃုထံၣ်န့ၢ်တၢ်သဘျ့, တၢ်ဘံၣ်တၢ်ဘၢ, (မ့) တၢ်အိၣ်မူ ကဂ့ၤအါထီၣ်အဂီၢ်, ပှၤကညီတဖၣ် ဘၣ်သုးလီၢ်သုးကျဲၤ အိၣ်ဆိးတ့ၢ်ဝဲဒၣ်န့ၣ်လီၤ. တၢ်ထိၣ်ဂဲၤ တၢ်သုးလီၢ်သုးကျဲ ကအိၣ်ဆိးတၢ်အဂီၢ်န့ၣ်, အိၣ်ထီဃာ်အသးလၢ ပှၤကညီတဖၣ်အတၢ်လဲၤခီဖျိအပူၤန့ၣ်လီၤ. လံာ်စီဆှံအပူၤ, တၢ်အဒိတမံၤလၢ ပှၤသ့ၣ်ညါ အီၤအအါကတၢၢ်န့ၣ် မ့ၢ်ဝဲဒၣ် ပှၤဧ့ၤဘြံဖိတဖၣ် အတၢ်ဟးထီၣ်လၢ ကီၢ်အဲၤကူပတူး, ဒီးအတၢ်လဲၤဆူ ကီၢ်တၢ်စံးပာ်အဂ့ၢ်န့ၣ်လီၤ. တၢ်သုးလီၢ်သုးကျဲန့ၣ် တမ့ၢ်တၢ်လီၤဆီလၢ ကစၢ်ယ့ၣ်ရှူး အဂီၢ်စ့ၢ်ကီးဘၣ်. ဖဲလၢအမ့ၢ် ဖိသၣ်အီနုၢ်ဖိတဂၤအကတီၢ်, လၢတၢ်ဒီတဒၢအီၤလၢ စီၤပၤ ဟ့ၤရိာ်, လၢအယုမၤသံအသးသမူအဂီၢ်, အမိၢ်အပၢ်တဖၣ် ဘၣ်ဃ့ၢ်ဝဲဒၣ်ဆူ ကီၢ်အဲၤကူပတူးန့ၣ်လီၤ. တၢ်လၢအမၤအသးခိၣ်ခံန့ၣ်, ဒ်သိးပှၤဧ့ၤဘြံဖိတဖၣ် ကပူၤဖျဲး ဝဲဒၣ် စီၤပၤလၢ အဃုမၤသံ ဖိသၣ်ပိာ်ခွါဖိတဖၣ် (၂ မိၤ ၁:၁၆) အဂီၢ်, အဝဲသ့ၣ် ဘၣ်ဃ့ၢ်ဟးထီၣ်ဝဲဆူ ကီၢ်တၢ်စံးပာ် (၂ မိၤ ၃:၁၇) အသိး, ဒ်သိးကဃ့ၢ်ပူၤဖျဲးအသးလၢ စီၤပၤအၢသီ, လၢအမၤတၢ်တမံၤဃီ (မး ၂:၁၃, ကွၢ်ဖဲ အဆၢဖိ ၁၆-၁၈) အဂီၢ်, ကစၢ်ယွၤ အကလူးတဂၤ စံးဘၣ် စီၤယိၤသးလၢ “ဂဲၤဆၢထၢၣ်ဟံးန့ၢ်ဖိသၣ်ဒီးအမိၢ်, ဒီးဃ့ၢ်ထီၣ်ဆူ အဲၤကူပတူး” န့ၣ်လီၤ.
လံာ်မးသဲ ပာ်ဖျါဝဲဒၣ်လၢ တၢ်လဲၤအံၤ မ့ၢ်ဝဲဒၣ် တၢ်မၤလၢပှဲၤ ဝံအတၢ်စံးပာ်, ဖျါဝဲဒၣ်လၢ ဟိၤရှ့ ၁၁:၁ အပူၤ, “ယကိးန့ၢ် ယဖိခွါလၢ အဲၤကူပတူးအပူၤလီၤ” (မး ၂:၁၃) န့ၣ်လီၤ. ဘၣ်ဆၣ်, တၢ်ဂ့ၢ်အံၤ မ့ၢ်စ့ၢ်ကီး တၢ်မၤသ့ၣ်နီၣ်ထီၣ်က့ၤပှၤလၢ ကစၢ်ခရံာ် နၢ်ပၢၢ် ပှၤကညီအတၢ်လဲၤခီဖျိ (ဧ့ၤ ၄:၁၅) န့ၣ်လီၤ. ပအိၣ်ဒီးတၢ်အုၣ်က့ၤခီၣ်က့ၤအကစၢ် လၢအသ့ၣ်ညါပှၤ, ဒီးလဲၤခီဖျိတ့ၢ်ဝဲဒၣ် တၢ်မၤကွၢ်, ဒီးတၢ်နးတၢ်ဖှီၣ်တဖၣ်တမံၤဃီ, ဒ်ပဘၣ်ကွၢ်ဆၢၣ်မဲာ်ဝဲအသိးန့ၣ်လီၤ. လၢပဘၣ်ကီဘၣ်ခဲအကတီၢ်တဖၣ်အပူၤန့ၣ် ပဃုအီၤသ့ဝဲဒၣ်န့ၣ်လီၤ. အဝဲကဒိကနၣ်ပှၤ, ဒီးကဃ့ကညးစၢၤတၢ်လၢပဂီၢ် (ဧ့ၤဘြံၤ ၄:၁၄-၁၆) န့ၣ်လီၤ.
