ဖဲယမ့ၢ်ပှၤသးစၢ်ပိာ်ခွါဖိတဂၤလၢ ကီၢ်စဲၢ် အိၣ်ဟါအိၣ် (Ohio) အကတီၢ်, ပအိၣ်ဆိးတၢ်အလီၢ်န့ၣ်ဘူးဝဲဒီး ပှၤတ့တၢ်သူၣ်ထီၣ် အလီၢ်အကျဲတဖၣ်အါမး အကပၤန့ၣ်လီၤ. ပထံၣ်ဘၣ်ပှၤတ့တၢ်သူၣ်ထီၣ်တဖၣ်အံၤန့ၣ်, ထိၣ်ဂဲၤပသးလၢ တၢ်တ့ဘှီတၢ်အဃိ, ယၤဒီးယတံၤသကိးတဖၣ်န့ၣ်, ဒ်သိးပကတ့ထီၣ် တိာ်တဖျၢၣ်အဂီၢ်, ပထၢဖှိၣ်ပာ်ဖှိၣ်တၢ်အက့အခီ လၢအအိၣ်လီၤတဲာ်တ့ၢ်ဝဲတဖၣ်န့ၣ်လီၤ. ပဟံးန့ၢ်စူးကါ ပိးလီတဖၣ်လၢ ပမိၢ်ပပၢ်တဖၣ်အတၢ်, ပဟဲက့ၤစိာ်တွံၢ်ထုးသ့ၣ်အကူာ်အခီတဖၣ်, ဒီးကျဲးစၢးတ့ထီၣ် တၢ်လၢပကညိၣ်တ့ၢ်ဝဲအသိး အါနံၤအါသီန့ၣ်လီၤ. တၢ်န့ၣ်မ့ၢ်တၢ်သးခု, ဘၣ်ဆၣ် ပတၢ်ဂုာ်ကျဲးစၢးတဖၣ် မ့ၢ်တၢ်လၢ လီၤသးကညီၤ ဖဲထိၣ်သတြီၤဒီး တၢ်သူၣ်ထီၣ်ဂ့ၤ ဖဲပကပိာ်ကပၤတဖၣ်လီၤ. ပတၢ်တဖၣ်အံၤ တကျၢၤယံာ်ယံာ်ဘၣ်.

ပကထံၣ်ဘၣ် တၢ်တ့ဒုးအိၣ်ထီၣ် တၢ်သူၣ်ထီၣ်အတၢ်မၤမိၢ်ပှၢ်တမံၤ ဖဲ ၁ မိၤရှ့ ၁၁ အပူၤန့ၣ်လီၤ. ဖဲအဆၢဖိ ၄ န့ၣ် ပှၤအါဂၤစံးလိာ်သကိးအသးလၢ “ဟဲမီၣ်, ပမၤသကိးဝ့ၢ်တဝ့ၢ်လၢပဂီၢ်, ဒီးတၢးထီတဖျၢၣ်အိၣ်ဒီးအခိၣ်လၢမူခိၣ်” န့ၣ်လီၤ. တၢ်ဂ့ၢ်ကီဒိၣ်ဒိၣ်မုၢ်မုၢ်တမံၤလၢ တၢ်ဂုာ်ကျဲးစၢးအံၤအပူၤန့ၣ် မ့ၢ်ဝဲဒၣ်ပှၤသ့ၣ်တဖၣ်အံၤပညိၣ်ဝဲလၢ “ကမၤထီၣ်သကိးအမံၤ” အဂီၢ်န့ၣ်လီၤ.

တၢ်ဂ့ၢ်ကီအံၤ ကဲထီၣ်အသးတလီၢ်လီၢ် လၢပှၤဟီၣ်ခိၣ်ဖိတဖၣ်အဂီၢ်- ပတ့ဒုးအိၣ်ထီၣ်တၢ်သ့ၣ်နီၣ်ထီၣ်အလၢၢ်ထူၣ်တဖၣ်လၢပဂီၢ်ဒၣ်ဝဲ, ဒီးလၢပတၢ်မၤန့ၢ်မၤနၢၤတၢ်တဖၣ်အဂီၢ်န့ၣ်လီၤ. တၢ်တ့ဒုးအိၣ်ထီၣ်တၢ်သူၣ်ထီၣ်အံၤ ထီဒါလိာ်အသးဒီး အကတီၢ်လၢခံ, လၢလံာ်စီဆှံအတၢ်ဂ့ၢ်ဘၣ်ဃးဒီးစီၤရှလိၤမိၤ အတၢ်ပညိၣ်လၢ တၢ်တ့ဒုးအိၣ်ထီၣ်ယွၤ အတၢ်လုၢ်ဟံၣ်-၁ စီၤ ၅:၅ အပူၤန့ၣ် စီၤၡလိၤမိၤ ပာ်ဖျါဝဲ “ယစံးလၢ, ယမၤဟံၣ်လၢ ယွၤ ယကစၢ်အမံၤအဂီၢ်” န့ၣ်လီၤ.

တၢ်လၢအသူၣ်ထီၣ်ဘှီထီၣ်ဝဲန့ၣ် ကဘၣ်ပညိၣ်ဝဲဆူ ကစၢ်ယွၤ, ဒီးတမ့ၢ်လၢ အနီၢ်ကစၢ်ဒၣ်ဝဲအဂီၢ်ဘၣ်န့ၣ် စီၤရှလိၤမိၤ သ့ၣ်ညါနၢ်ပၢၢ်ဝဲဒၣ်န့ၣ်လီၤ. တၢ်အံၤမ့ၢ် တၢ်မၤလိလၢအကါဒိၣ်တကလုာ်အဃိ, ဘၣ်ဃးဒီးတၢ်ဂ့ၢ်အံၤန့ၣ်, အဝဲဘၣ်ကွဲးဒုးအိၣ်ထီၣ် ထါစံးထီၣ်ပတြၢၤတယုၢ်န့ၣ်လီၤ. စံးထီၣ်ပတြၢၤ ၁၂၇:၁ စးထီၣ်ဝဲလၢ “ယွၤမ့ၢ်တမၤဟံၣ်ဘၣ်ဒီးပှၤလၢအမၢဝဲတဖၣ်န့ၣ် မၤဝဲကလီကလီလီၤ” န့ၣ်လီၤ. လီၤဂာ်ဒ်ယဖိသၣ်အကတီၢ် ယတ့ထီၣ်တိာ်အသိး, တၢ်လၢပတ့ဒုးအိၣ်ထီၣ်တဖၣ်န့ၣ် တအိၣ်ဂၢၢ်ဆိးကျၢၤဘၣ်ဆၣ်, ယွၤအမံၤ, ဒီးပမၤတၢ်လၢယွၤအဂီၢ်တဖၣ်န့ၣ် အိၣ်ဂၢၢ်ဆိးကျၢၤဝဲ လီၤလီၤဆီဆီန့ၣ်လီၤ.