မ့ၢ်မုၢ်နံၤအယံာ်အထီတနံၤ, လၢတၢ်ဆါဟံၣ်အပူၤန့ၣ်လီၤ. တုၤခဲကနံၣ်အံၤဒၣ်လဲာ်, ပှၤသးစၢ်ဖိ အသးအိၣ်ဝဲ ၁၉ နံၣ်, လၢအဖၠဲးဒိၣ်မးတဂၤအံၤ ဒိးန့ၢ်ဝဲတၢ်ဆူးတၢ်ဆါမနုၤတမံၤလဲၣ်န့ၣ် ပှၤဃုထံၣ်တၢ်စံးဆၢတဖၣ် တန့ၢ်ဒံးဘၣ်အဃိ, လၢတၢ်သးဟးဂီၤအပူၤ, ဟံၣ်ဖိဃီဖိတဖၣ် ဟဲက့ၤဝဲဆူဟံၣ်န့ၣ်လီၤ. ဖဲအက့ၤတုၤဟံၣ်န့ၣ်ဒီး, လၢတၢ်ကမၢကမၣ်အပူၤ, ဟံၣ်အဃီသွါအလိၤန့ၣ်, ဟံၣ်ဖိဃီဖိတဖၣ် ထံၣ်ဝဲတၢ်ဘိၣ်ဖိတဘိၣ် ဘၣ်တၢ်ဘိၣ်ဘံဃာ်အီၤဃံဃံလၤလၤ, ဒီးတၢ်ဘိၣ်အမဲာ်ညါန့ၣ် အိၣ်ဝဲဒီး လံာ်စီဆှံအဆၢတဖၣ် အကလုာ်အကလုာ်, ဘၣ်တၢ်ကွဲးဟ့ၣ်ဂံၢ်ဟ့ၣ်ဘါ လၢတံၤသကိးတဖၣ် ကွဲးဝဲဒၣ်လၢအစုန့ၣ်လီၤ. အကတီၢ်နၣ်ရံၣ်ဆူညါန့ၣ် ဟံၣ်ဖိဃီဖိတဖၣ် လဲၤပူၤကွံာ်တၢ်ဆၢကတီၢ်လၢ တၢ်ဟံးန့ၢ် တၢ်န့ၢ်ဂံၢ်န့ၢ်ဘါ ဟဲခီဖျိလၢ ကစၢ်ယွၤအကလုာ်အကထါ, လၢအတံၤသကိးတဖၣ် ပာ်ဖျါထီၣ် တၢ်သူၣ်အိၣ်သးအိၣ်လၢ အဝဲသ့ၣ်အဂီၢ်န့ၣ်လီၤ.
ပှၤလၢအဘၣ်လဲၤခီဖျိ အကတီၢ်ကီခဲတဖၣ် မ့တမ့ၢ် ဟံၣ်ဖိဃီဖိ အတၢ်ဂ့ၢ်ကီတဖၣ်န့ၣ်, မၤဆူၣ်ထီၣ်က့ၤ သးအဂံၢ်အဘါသ့ဝဲဒၣ်ထီဘိန့ၣ်လီၤ. ကစၢ်ယွၤအကလုၢ်အကထါ, လၢအဆၢဒိၣ်မ့ၢ်ဂ့ၤ, အဆၢဖိဧိၤမ့ၢ်ဂ့ၤန့ၣ်, ဟ့ၣ်ဂံၢ်ဟ့ၣ်ဘါနၤ, တံၤသကိး
တဂၤဂၤ, မ့တမ့ၢ် ဟံၣ်ဖိဃီဖိတဂၤဂၤ သ့ဝဲဒၣ်န့ၣ်လီၤ. လၢနီၢ်တဂၤဘၣ်တဂၤအဂီၢ်မ့ၢ်ဂ့ၤ, ပှၤဒီဖုဒီကရူၢ်အဂီၢ်မ့ၢ်ဂ့ၤ, လံာ်ယရှါယၤ ၄၃ န့ၣ် အိၣ်ပှဲၤဒီး တၢ်ဟ့ၣ်ဂံၢ်ဟ့ၣ်ဘါ အကူာ်အက့ အဆံးဖိတဖၣ်န့ၣ်လီၤ. ပကဃုထၢဆိကမိၣ်ကွၢ်ထံ လံာ်စီဆှံအဆၢဖိစှၤထံၣ်န့ၣ်တက့ၢ်. အဆၢဖိ ၁ ပာ်ဖျါဝဲ ယွၤ “ တ့လီၤနၤ,” “မၤနၤ,” “ပှ့ၤက့ၤလံနၤ,” ဒီးကိးနၤ “လၢနမံၤ” န့ၣ်လီၤ. အဆၢဖိ ၂ န့ၣ် ယွၤ “ကအိၣ်ဒီးနၤ,” ဒီးအဆၢဖိ ၃ ပာ်ဖျါဝဲလၢ, ကစၢ်ယွၤမ့ၢ် “အံၣ်စရ့လးအတၢ်စီဆှံ,” ဒီး “တၢ်ပှ့ၤက့ၤနၤတဂၤ” န့ၣ်လီၤ.
ဖဲနကွၢ်ထံဆိကမိၣ် ယွၤအတၢ်အၢၣ်လီၤတဖၣ်န့ၣ်ဒီး, မ်အကကဲထိၣ် တၢ်န့ၢ်ဂံၢ်န့ၢ်ဘါလၢနဂီၢ်တက့ၢ်. တၢ်လၢနလိၣ်ဘၣ်တဖၣ်န့ၣ် ဒ်ယွၤဟ့ၣ်နၤအသိး, နဟ့ၣ်ဂံၢ်ဟ့ၣ်ဘါ ပှၤဂုၤပှၤဂၤသ့ဝဲဒၣ်န့ၣ်လီၤ. တၢ်ဘိၣ်ဖိလၢ အအိၣ်ဒီးလံာ်စီဆှံအဆၢတဖၣ်န့ၣ် အလုၢ်အပှ့ၤတအိၣ်အါဘၣ်ဆၣ်, အတၢ်သဟီၣ်န့ၣ် လုၢ်ဒိၣ်ပှ့ၤဒိၣ်နီၢ်မးန့ၣ်လီၤ. တၢ်ဆၢကတီၢ်ယဲၢ်နံၣ် လဲၤပူၤကွံာ်ဝံၤအလီၢ်ခံဒၣ်လဲာ်, ဟံၣ်ဖိဃီဖိတဖၣ် ပာ်လုၢ်ပာ်ပှ့ၤဝဲ လံာ်စီဆှံအဆၢအခးဖိတနီၤ, တုၤမုၢ်မဆါတနံၤအံၤအဖၢမုၢ်န့ၣ်လီၤ.
