စးထီၣ်လၢပဟးထီၣ် အီရံၣ်ကိၣ် (Oregon) အဝ့ၢ်, ဝ့ၢ်လၢပလုၢ်ဒိၣ်ထီၣ် ပဟံၣ်ဖိဃီဖိန့ၣ်, တၢ်ဆၢကတီၢ်ယံာ်တ့ၢ် အါနံၣ်လံန့ၣ်လီၤ. ဖဲန့ၣ် တၢ်သ့ၣ်နီၣ်အဒိၣ်အမုၢ်တဖၣ် အိၣ်ဝဲဒၣ်လၢပဂီၢ်, ဒီးတယံာ်ဒံးဘၣ်န့ၣ် ဖဲယက့ၤဟးလိၣ်ကွဲ ဝ့ၢ်အံၤန့ၣ် ယသ့ၣ်နီၣ်ထီၣ်က့ၤ တၢ်အကတီၢ်ဖိတဖၣ်လၢယသးပ့ၤနီၣ်တ့ၢ်တဖၣ်, ဒ်အမ့ၢ်ပဖိမုၣ်ဖိတဖၣ် အတၢ်လိာ်ကွဲဖျၢၣ်ထူ, ပဟံၣ်လီၢ်လံ, တၢ်အိၣ်ဖှိၣ် အတၢ်ထံၣ်လိာ်ရ့လိာ်သးတဖၣ်, ဒီးပတံၤသကိးတဖၣ် မဲးကစံၣ်ကၣ် Mexican တၢ်အီၣ်ကျးန့ၣ်လီၤ. ဝ့ၢ်အံၤ ဆီတလဲအသးလံဘၣ်ဆၣ် တၢ်လၢအညီနုၢ်လၢယဂီၢ်တဖၣ် အိၣ်ဒံးအလၢအပှဲၤ လၢအဒုးအိၣ်ထီၣ် ယသးဆၢက့ၤဟးလိာ်ကွဲအဂီၢ်န့ၣ်လီၤ.

ဖဲပှၤအံၣ်စရ့လးဖိတဖၣ် ဘၣ်တၢ်စိာ်မၢကဲကုၢ်အီၤလၢ ဘၤဘူၤလိၣ်အကတီၢ်န့ၣ်, သးသယုၢ်က့ၤ ပှၤကညီတဖၣ်, လီၢ်ပနီၣ်တဖၣ်, ဒီးတၢ်ဆဲးတၢ်လၤ လၢအညီနုၢ်ဒီး အဝဲသ့ၣ် တဖၣ်န့ၣ်လီၤ. အဝဲသ့ၣ် သးပ့ၤနီၣ်ကွံာ်ဝဲ တၢ်ဘၣ်စိာ်မၢကဲကုၢ်အီၤအံၤ မ့ၢ်လၢအပူထီၣ်ယွၤအဃိန့ၣ်လီၤ. ယံး ၂၈:၂-၄, ၂၉:၈-၉ အပူၤ, ဖဲဝံအဘျၣ်တဖၣ် စံးဝဲလၢ ခံနံၣ် အတီၢ်ပူၤ, အဝဲသ့ၣ်ကဟဲက့ၤဘၣ်ဆူအဟံၣ်န့ၣ်ဒီး ပထံၣ်ကဘၣ် ပှၤလၢအတူၢ်လိာ်တဖၣ်အိၣ်ဝဲဒၣ်န့ၣ်လီၤ. ညီဝဲဒၣ်လၢ ပှၤကဒိကနၣ် ဝံအဘျၣ်တဖၣ် အတၢ်ကတိၤလၢအဘျ့ကဆှၣ်, လၢအအၢၣ်လီၤ တၢ်ဟဲက့ၤဆူဟံၣ် လၢဆၢကတီၢ်တယံာ်ဘၣ်အပူၤန့ၣ်လီၤ.

ခါအပူၤကွံာ် ပှၤလၢအစံးကတိၤကဘျံးကဘျၣ်တၢ်တဖၣ်, ဒီးအတၢ်အၢၣ်လီၤ လၢအကမၣ်တဖၣ်န့ၣ် ယွၤတဘၣ်အသးဘၣ်. ယံးရမံယၤ ၂၉:၈ အပူၤန့ၣ် ကစၢ်ယွၤစံးဝဲ, “ဒုးလီန့ၢ်သုသးလၢသုဝံ, ဒီးသုပှၤဖးတၢ်ဖိလၢ အအိၣ်ဝဲလၢသုကျါတဂ့ၤ,” န့ၣ်လီၤ. အဆၢဖိ ၁၁ န့ၣ် ပကထံၣ်ဘၣ် ယွၤအိၣ်ဒီး အတၢ်ရဲၣ်တၢ်ကျဲၤတဖၣ်လၢအပှၤဂီၢ်မုၢ်အဂီၢ်, “မ့ၢ်တၢ်ကူၣ်ကျဲၤတဖၣ်လၢ ကဟဲစိာ်ခါဆူညါ အတၢ်မုၢ်လၢ်အဂီၢ်” န့ၣ်လီၤ. တၢ်အိၣ်အသးန့ၣ် မ့ၢ်တၢ်လၢအတၤအဝဲသ့ၣ်, မ့ၢ်တၢ်လၢအကီအခဲ, ဒီးမ့ၢ်တၢ်အသီ, ဘၣ်ဆၣ် ယွၤအိၣ်ဒီးအဝဲသ့ၣ်န့ၣ်လီၤ. အဆၢဖိ ၁၃ န့ၣ် ကစၢ်ယွၤစံးဝဲ, “သုကဃုယၤ, ဒီးတုၤသုဃုယၤလၢ သုသးဒီဖျၢၣ်ညါဒီး, သုထံၣ်န့ၢ်ယၤလီၤ” န့ၣ်လီၤ. အဆၢဖိ ၁၄ ပာ်ဖျါဝဲ ကစၢ်ယွၤကဟဲစိာ်ဆှၢက့ၤ အပှၤဂီၢ်မုၢ် “ဆူထံကီၢ်အပူၤလၢ ယတၢ်လီၢ် ဖဲယဆှၢဖျိးတ့ၢ်သုလၢ တၢ်စိာ်မၢကဲကုၢ်အပူၤ,” ဘၣ်ဆၣ် လၢကစၢ်ယွၤအဆၢကတီၢ်ဒၣ်ဝဲအပူၤန့ၣ်လီၤ.

တၢ်သးသယုၢ်က့ၤတၢ်လၢ အပူၤကွံာ်တဖၣ်န့ၣ် မၤကဒံကဒါ ပသး, ဒီးတၢ်ဆၢမိၣ်န့ၢ်က့ၤ တၢ်အပူၤကွံာ်တဖၣ်န့ၣ် ညီဝဲဒၣ်လၢပဂီၢ်န့ၣ်လီၤ. ဒုးလဲၤပူၤကွံာ် တၢ်လၢယွၤမၤတၢ်ခဲအံၤန့ၣ်တဂ့ၤ. ကစၢ်ယွၤကမၤလၢပှဲၤ အတၢ်အၢၣ်လီၤအီလီၤတဖၣ်န့ၣ်လီၤ.