ဃၣ်ကွံာ်တဂ့ၤ

‘‘ဆၢကတီၢ်လဲၤပူၤကွံာ်၀ဲ‚ ဒီးတၢ်ဒုးတၢ်ယၤဟဲတုၤ၀ဲလီၤ’’ႉ တၢ်အံၤ မ့ၢ်ပှၤကဲၣ်လံာ်ကိၣ် ဖိလၢကီၢ်စူၣ်ဒၢ်ကလံၤထံး ဘံရၠာစးှီးစဲၣ်မံၣ်နံၤကိၤ အတၢ်တဲဖျါ ဘၣ်ဃးအတၢ်အိၣ်ဖှိၣ် အတၢ်ဂဲၤလိာ်ဖးယံာ် ဒ်သိးကမၤန့ၢ်ဘၣ် လံာ်စီဆှံလၢ အ၀ဲသ့ၣ်အကျိာ်ဒၣ်၀ဲ ဘၣ်စဲၤခံ ဒ်လဲၣ်အဂ့ၢ်န့ၣ်လီၤႉ အနီၢ်နီၢ်န့ၣ် ကဲၣ်လံာ်ကိၣ်အကျိာ်အံၤ တဘၣ်တၢ်စဲကျံးတ့ၢ်အီၤ နီတဘျီဒံးဘၣ်ႉ အပူၤကွံာ် နံၣ်လၢအဆံတဖၣ်အခါ ဘံရၠာစးှီးနံၤကိၤအဖု စးထီၣ်ကွဲး ကျိာ်ထံလံာ်စီဆှံ တၢ်တိာ်မၤလၢတၢ်သးဒူအပူၤ‚ ဘၣ်ဆၣ် တၢ်ဒုးတၢ်ယၤဒီး တၢ်တမုာ် တခုၣ် မၤပတုာ်သပှၢ်ပှၢ် တၢ်ဂုာ်ကျဲးစၢးန့ၣ်လီၤႉ နာ်သက့‚ အ၀ဲသ့ၣ် အပှၤဘၣ်ကီ ဘၣ်ခဲဒဲက၀ီၤလၢကီၢ်ယူၢ်ကၢ်ဒၢ်ကလံၤစိးဒီး ကီၢ်ခီၣ် (န) ကိၢ်ဘၣ်တၢ်ဟဲမၤဒၢၣ်အီၤ အဘျီဘျီ ဘၣ်ဆၣ်‚ ဘံရၠာစးှီး ဒီးအပှၤစူၢ်က့ၤနာ်က့ၤတၢ်ဖိတဖၣ် တဆိကတီၢ်တၢ်မၤအံၤဘၣ်ႉ
အ၀ဲသ့ၣ်အတၢ်မၤစွံကတုၤအံၤ လၢအကတၢၢ်န့ၣ် ကဲထီၣ်လိၣ်ထီၣ်၀ဲလီၤႉအနံၣ် ၃၀ ဃၣ်ဃၣ်အလီၢ်ခံ‚ လံာ်စီဆှံအသီတက့တူၢ်လၢ ကဲၣ်လံာ်ကိၣ် အကျိာ်န့ၣ် ဘၣ်တၢ်နီၤဟ့ၣ်လီၤဆူ ပှၤဘၣ်ကီဘၣ်ခဲတဖၣ်အအိၣ် လၢမူးသးဖှံလၢအထိၣ်ဟူးထိၣ် ဂဲၤထီၣ် ပှၤအသးဖးဒိၣ်န့ၣ်လီၤႉ တၢ်တိာ်မၤအံၤ အပှၤဟ့ၣ်ကူၣ်တၢ်တဂၤစံး၀ဲဒ်အံၤ ‘‘ပှၤကဲၣ်လံာ်ကိၣ်ဖိတဖၣ် အတၢ်ထိၣ်ဂဲၤထီၣ်န့ၣ် တလၢကွံာ်တၢ်ကတိၤလၢပစံးအီၤသ့တက့ၢ်လီၤ’’ႉ…