ယတံၤသကိး ရၠာစးီဘၢး ဒီး ခိလ် အိၣ်ဒီး တၢ်လဲၤခီဖျိလၢအမုာ်လၢ အတၢ်ဆီဟံၣ်ဆီဃီ အပူၤ‚ လၢအါနံၣ်အါလါ ဒီးယအဲၣ်ဘၣ်ယဲအ၀ဲသ့ၣ်ခံဂၤ အတၢ်ဘၣ်ထွဲလိာ်သးကဒဲ ကဒဲန့ၣ်လီၤႉ ဖဲအအီၣ်ဟါတၢ်အီၣ်ကတီၢ်‚ ဖဲအတဂၤမ့ၢ်တဃ့ဒံး တၢ်နုၢ်ထံလီၤသကၤ အပလီ‚ အဂၤတဂၤ သုးဆိပာ်စၢၤလၢအကပၤန့ၣ်လီၤႉ အဂၤတဂၤတခီ‚ မၤပှဲၤက့ၤထံအီ လၢယွၤခၣ်စိးအပူၤလီၤႉ ဖဲအ၀ဲသ့ၣ်မ့ၢ်တဲတၢ်ဂ့ၢ်တၢ်ကျိၤတမံၤမံၤ‚ အ၀ဲသ့ၣ် တဲကတၢၢ်က့ၤ တၢ်ဂ့ၢ်တဂၤ၀ံၤတဂၤလီၤႉ တဘျီဘျီ‚ ဖျါလၢ အ၀ဲသ့ၣ်ဖးလိာ်သး‚ အသူၣ်အသးသ့၀ဲန့ၣ်လီၤႉ
တၢ်အံၤမ့ၢ်တၢ်လၢ အမၤမံသူၣ်မုာ်သးပှၤလၢ ကစၢ်ယွၤသ့ၣ်ညါ ဒီးကဟုကယာ်ပှၤ‚ အါန့ၢ်ဒံး ပှၤတဂၤလၢ ပသ့ၣ်ညါဒီးအဲၣ်ဘၣ်အီၤဒၣ်လဲာ်လီၤႉ ဖဲ၀ံယ့ှှါယၤ ပာ်ဖျါထီၣ် ကစၢ်ယွၤအတၢ်ဘၣ်ထွဲဒီး အပှၤဂီၢ်မုၢ်လၢဘီမုၢ်အပူၤ‚ အ၀ဲပာ်ဖျါထီၣ်တၢ်အဲၣ်တၢ်ကွံ‚ တၢ်ဘၣ်ထွဲ ဘူးဘူးတံၢ်တံၢ်တမံၤန့ၣ်လီၤႉ ကစၢ်ယွၤ စံးဘၣ် အပှၤဂီၢ်မုၢ်လၢ ‘‘ဒီးတၢ်ကမၤအသးလၢ အ၀ဲသ့ၣ်တချုးကိးထီၣ်ဒံးဘၣ်ဒီး ယကစံးဆၢတၢ် လီၤ’’ (ယ့ှှါ ၆၅း၂၄) ႉ
တၢ်အံၤမ့ၢ်၀ဲတီ၀ဲကသ့ဒ်လဲၣ်ႉ တၢ်ဂ့ၢ်အိၣ်၀ဲတနီၤလၢ ယဃ့ထုကဖၣ်လၢ အါနံၣ်အါလါ‚ ဘၣ်ဆၣ် ယတမၤန့ၢ် တၢ်စံးဆၢနီတမံၤဘၣ်ႉ ယနာ်လၢ‚ ဒ်ပဒိၣ်ထီၣ် တၢ်မူလၢ အအိၣ်ဘူးဘူးတံၢ်တံၢ်ဒီးယွၤ‚ စဲဘူးလိာ်သးဒီးအ၀ဲအသး‚ ပကမၤလိန့ၢ် တၢ်နာ်န့ၢ်အီၤလၢ အ၀ဲအတၢ်ကူၣ်ထီၣ်ဖးလီၤဒီး တၢ်ကဟုကယာ်တၢ်န့ၣ်လီၤႉ ပကစးထီၣ် တၢ်မိၣ်န့ၢ်သးလီလၢ အ၀ဲမိၣ်န့ၢ်သးလီ၀ဲန့ၣ်လီၤႉ ဖဲပဃ့ထုကဖၣ် ပဃ့ တၢ်လၢ တၢ်ဂ့ၢ်အါမံၤအကျါ‚ လၢအမ့ၢ်ယွၤအဘီအမုၢ်တနီၤ ဒ်အဘၣ်တၢ်ပာ်ဖျါထီၣ် လၢ လံာ်၀ံယ့ှှါယၤ ၆၅‚ တၢ်ကမၤကတၢၢ်ကွံာ် တၢ်သးအုး (း၁၉) န့ၣ်လီၤႉ ဟံၣ်မုာ် ဃီပၢၤဒီး တၢ်အီၣ်ပှဲၤလုၣ်ကွံာ်ဒီး တၢ်ဖံးတၢ်မၤလၢပှၤကိးဂၤအဂီၢ် (း၂၁-၂၃) လီၤႉ တၢ်ဃူတၢ်ဖိးလၢ တၢ်ဘၣ်တ့ကဒဲကဒဲ (း၂၅) လီၤႉ ဖဲယွၤအဘီမုၢ် လၢထီၣ်ပှဲၤထီၣ်န့ၣ် ကစၢ်ယွၤ ကစံးဆၢ တၢ်ထုကဖၣ်အလၢအပှဲၤန့ၣ်လီၤႉ