‘‘အ၀ဲကိၣ်အက့ဒိၣ်န့ၢ်ယၤႉႉႉ’’ ဖဲယမ့ၢ်ဒံးဖိသၣ်အခါ‚ ယပုၢ်ခွါဒီးယၤ တဘျီတခီၣ် ပဂ့ၢ်လိာ်သးလၢ ပမိၢ်ဟ့ၣ်ပှၤကိၣ်အက့‚ နၤဒိၣ်ယၤဒိၣ်အဂ့ၢ်လီၤႉ ဘၣ်တနံၤ‚ ယပၢ်ကွၢ် ပတၢ်ကတိၤကလံးကလး‚ ဒီး၀ံၢ်ထီၣ် အမဲာ်တူၢ်ဒီး နံၤကမှံ ဆူယမိမိၢ်‚ ယူာ်ထီၣ်အနီခီ ဒီးစံး၀ဲ‚ ‘‘၀ံသးစူၤ‚ ဟ့ၣ်ဒၣ်ယၤကိၣ်အကူာ်လၢဒိၣ်ထဲသိး နသးဖိ တက့ၢ်’’ န့ၣ်လီၤႉ ယပုၢ်ဒီးယၤ ပကွၢ်တၢ် ဒီးပအိၣ်ဘရၣ်လၢ တၢ်သးလီၤကတုၤပူၤ‚ မ့မ့ၢ်ယမိမိၢ်တခီနံၤ‚ ဒီးဟ့ၣ် ယပၢ် လၢကိၣ်အက့အဒိၣ်ကတၢၢ်လီၤႉ
ပမ့ၢ်အိၣ်ဒီးတၢ်သးစဲ လၢပှၤဂၤအတၢ်စုလီၢ်ခီၣ်ခိၣ် အိၣ်ထဲအံၤထဲနုၤအဖီခိၣ်န့ၣ်‚ တၢ်သးကါတဖၣ်ဟဲနုာ်လီၤ ခဲအံၤခဲအံၤလီၤႉ ဘၣ်ဆၣ်‚ ကစၢ်ယွၤအကလုၢ်ကထါ ဒုးထံၣ်ပှၤတၢ်တဖၣ် လၢအလုၢ်ပရၤဒိၣ်န့ၢ် ဟီၣ်ခိၣ်အတၢ်စု လီၢ်ခီၣ်ခိၣ်လီၤႉ ပှၤကွဲးထါကွဲး၀ဲလၢ ‘‘ယွၤမ့ၢ်ယဂီၢ်လီၤႉ ယစံးလၢယကတိၢ်န့ၢ်ဖံးဃာ် နကလုၢ်ကထါလီၤႉ ယဃု နအိၣ်ပှိၤယၤ လၢယသးဒီဖျၢၣ်ညါလီၤ’’ (ထါစံးထီၣ်ပ့တၢၤ ၁၁၉း၅၇-၅၈) ႉ ခီဖျိ သးစီဆှံ အတၢ်ဟ့ၣ်ဂံၢ်ဟ့ၣ်ဘါန့ၣ် ပှၤကွဲးလံာ်ဒုးသ့ၣ်ညါ တၢ်မ့ၢ်တၢ်တီတမံၤ လၢအမ့ၢ် တၢ်အကါဒိၣ်န့ၢ် တၢ်အိၣ်ဘူးဒီးယွၤန့ၣ် တအိၣ်ဘၣ်အဂ့ၢ်လီၤႉ
တၢ်အကူာ်လၢပမၤန့ၢ်သ့‚ လၢအဂ့ၤန့ၢ်ပတၢ်တ့ကစၢ် လၢအအိၣ်လၢပှဲၤဒီး တၢ်အဲၣ်‚ ဒီးသ့တၢ်လၢာ်န့ၣ် မနုၤအဂၤအိၣ်ဒံးလဲၣ်ႉ တၢ်လၢဟီၣ်ခိၣ်လၢ ပထိၣ်သBတီၤသ့ဒီးအီၤမနုၤမးတအိၣ်ဘၣ်‚ ဒီးတၢ်လၢအဟံးန့ၢ်ကွံာ်အီၤလၢပအိၣ်သ့ တအိၣ်နီတမံၤဘၣ်ႉ ပှၤဟီၣ်ခိၣ်ဖိ အတၢ်သူၣ်လီသးကွံန့ၣ် မ့ၢ်တၢ်လီၤဟိလၢ ပမၤပှဲၤအီၤ တန့ၢ်ဘၣ်န့ၣ်လီၤႉ ပှၤတဂၤကအိၣ်ဒီး တၢ်ကိးမံၤဒဲးလၢဟီၣ်ခိၣ်အံၤ‚ ဘၣ်ဆၣ် ကအိၣ်ဒံးဒီးတၢ်သးအုးန့ၣ်လီၤႉ ဘၣ်ဆၣ်‚ ဖဲကစၢ်ယွၤ မ့ၢ်ပတၢ်သူၣ်ခု သးခုအခီၣ်ထံးန့ၣ် ပအိၣ်ဒီးတၢ်သးမံ အမ့ၢ်အတီလီၤႉ လၢပပူၤအံၤ တၢ်လီၢ်အိၣ်၀ဲ တလီၢ် လၢထဲဒၣ်ယွၤတဂၤဧိၤ မၤပှဲၤအီၤသ့လီၤႉ ထဲဒၣ် ယွၤတဂၤဧိၤ‚ ဟ့ၣ်ပှၤတၢ်ဃူတၢ်မုာ်လၢ အဘၣ်လိာ်ဖိးလိာ်ဒီးပသးတဖၣ် သ့၀ဲန့ၣ်လီၤႉ