ပှၤကွဲးလံာ်ဒီး တၢ်အိၣ်ဖှိၣ်သရၠာစးၣ် အၤ၀့ၢ် လူၤစၢ် စံၣ်ဃဲၤကဒါက့ၤ တၢ်မၤအသးတမံၤ ဘၣ်ဃး ပှၤလၢအဒုးနဲၣ်တၢ်လၢ ကွဲၤဟူဖျါ အးလ့းလဲထၢၣ် ဒီးဖိသၣ်ပိာ်ခွါဖိတဂၤလၢ အတ့ ကစၢ်ယွၤအဂီၤ န့ၣ်လီၤႉ တၢ်လီၤနံၤဘၣ် လ့းလဲထၢၣ် အဃိ အ၀ဲတဲဘၣ်ဖိသၣ် အံၤ‚ ‘‘တၢ်အံၤ နတ့၀ဲတသ့ မ့ၢ်လၢပှၤလၢအထံၣ်ယွၤ တအိၣ်နီၤတဂၤဘၣ်အဃိ’’ လီၤႉ
ဖိသၣ်အံၤ စံးဆၢ၀ဲဂၢၢ်ဂၢၢ်ကျၢၤကျၢၤ‚ ‘‘အ၀ဲသ့ၣ်ကသ့ၣ်ညါဘၣ် ဖဲယတ့တၢ်ဂီၤ၀ံၤအခါန့ၣ်လီၤ’’ႉ ဘၣ်သ့ၣ်သ့ၣ် ပကဆိကမိၣ်လၢ ‘‘ယွၤလီၤဂာ်ဒီး မနုၤလဲၣ်‚ မ့ၢ်အ၀ဲဂ့ၤဧါ‚ မ့ၢ်အသူၣ်ဂ့ၤအသး၀ါဧါ‚ မ့ၢ်အသးအိၣ် တၢ်ဧါ’’ န့ၣ်လီၤႉ တၢ်သံကွၢ်တဖၣ်အံၤ အတၢ်စံးဆၢယိယိဖိန့ၣ် မ့ၢ်ကစၢ်ယ့ၣ်။းအတၢ်စံးဆၢက့ၤဆူ စီၤဖံလံးပူးအတၢ် ဃ့ကညး ‘‘ကစၢ်ဧၢ‚ ဒုးနဲၣ်ပှၤလၢ ပၢ်’’န့ၣ်လီၤႉ ကစၢ်ယ့ၣ်။း စံးဆၢ၀ဲ ‘‘စီၤဖံလံးပူးဧၢ‚ ယအိၣ်တ့ၢ်ဒီးသုယံာ်ထဲအံၤဒီး‚ နတသ့ၣ်ညါယၤဘၣ်ဧါႉ ပှၤလၢအထံၣ်ဘၣ်ယွၤန့ၣ်‚ မ့ၢ်အထံၣ်လံပၢ်န့ၣ်လီၤ’’ (ယိၤ ၁၄း၈-၉) ႉ
နမ့ၢ်ဆၢထံၣ်ဘၣ်ယွၤန့ၣ်‚ ကွၢ်ကစၢ်ယ့ၣ်။းတက့ၢ်ႉ စီၤပီလူးစံး၀ဲဒၣ်‚ ‘‘အ၀ဲဒၣ်န့ၣ်မ့ၢ်ယွၤ‚ လၢပှၤထံၣ်အီၤတသ့ဘၣ်တဂၤအက့ၢ်အဂီၤႉႉႉလီၤ’’ (ကလီး ၁း၁၅) ႉ ဖးဖျိကွံာ် လံာ်တၢ်သးခုကစီၣ် (၄) ဘ့ၣ်လၢ လံာ်စီဆှံအသီတက့တူၢ် လၢအမ့ၢ် လံာ်မးသဲ‚ လံာ်မၢ်ကူး‚ လံာ်လူၤကၣ်ဒီး လံာ်ယိၤဟၣ်တက့ၢ်ႉ ဆိကမိၣ်ယိာ်ယိာ် တၢ်လၢကစၢ်ယ့ၣ်။း မၤဒီးတဲတ့ၢ်၀ဲတဖၣ်တက့ၢ်ႉ ဒ်နဖးအီၤန့ၣ်‚ တ့လီၤယွၤအဂီၤ လၢနသးအမဲာ်အတၢ်ထံၣ်ဒၣ်နဲအသိးတက့ၢ်ႉ တုၤနတ့၀ံၤန့ၣ် နကသ့ၣ်ညါအါထီၣ်နဲ လၢအ၀ဲလီၤဂာ်ဒီးမနုၤလဲၣ်န့ၣ်လီၤႉ
ယတံၤသကိးတဂၤ တဘျီတဲဘၣ်ယၤ လၢယွၤထဲတဂၤဧိၤ လၢအ၀ဲစူၢ်နာ်၀ဲ သ့န့ၣ် မ့ၢ်ယွၤ လၢအ၀ဲထံၣ် လၢယ့ၣ်။းအပူၤန့ၣ်လီၤႉ နမ့ၢ်ဆိကမိၣ် လီၤတံၢ်လီၤဆဲးန့ၣ်‚ နကဘၣ်သူၣ်ဘၣ်သးဒီးအီၤလီၤႉ ဒ်နဖးကစၢ်ယ့ၣ်။းအဂ့ၢ်န့ၣ်‚ နသူၣ်ကပိၢ်နသးက၀း လီၤႉ အဂ့ၢ်ဒ်အံၤ‚ နမ့ၢ်တသ့ၣ်ညါဘၣ်ဆၣ်‚ ယ့ၣ်။းမ့ၢ်ယွၤလၢ နဃုတ့ၢ်အီၤ လၢနသးသမူဒီတစိၤလံန့ၣ်လီၤႉ