‘‘ယွၤမၤတၢ်အသီတမံၤမံၤ လၢသုတၢ်အိၣ်မူအပူၤဧါ’’ ပှၤဆှၢတၢ်သံကွၢ်၀ဲ က့ှူၢ်လၢ ယလီၤဘၣ် တယံာ်ဒံးဘၣ်အခါန့ၣ်လီၤႉ ဘၣ်ဖဲယတံၤသကိး မ့ဒံၢ် ဘၣ်ကွၢ်ဆၢၣ်မဲာ် တၢ်အိၣ်အသးလၢအကီအခဲတဖၣ်အကတီၢ်‚ ဒီးအ၀ဲစံးဆၢ၀ဲလီၤႉ အ၀ဲတဲ၀ဲ အတၢ်လိၣ်ဘၣ် တၢ်၀ံသးစူၤ လၢမိၢ်ပၢ်သးပှၢ်တဖၣ်အဂီၢ်‚ နီၢ်ခိဒီးသးအဂံၢ်အဘါ လၢကတူၢ်န့ၢ်ခီၣ်ကဲ အ၀ၤသးဘိ အတၢ်အိၣ်ဆူၣ်အိၣ်ခ@ အဂ့ၢ်အကျိၤတဖၣ်‚ ဒီးဘၣ်နၢၢ်ပၢၤစၢၤ အဖိအလံၤလၢ အတဃုထၢပိာ် ကစၢ်ယ့ၣ်။းအခံဒံးဘၣ်တဖၣ်အဂ့ၢ် န့ၣ်လီၤႉ အန့ၣ်၀ံၤဒီး အ၀ဲစံး၀ဲဒၣ်‚ ‘‘ယနာ်လၢ တၢ်အသီ လၢယွၤမၤန့ၣ် မ့ၢ်၀ဲယွၤမၤလဲၢ်ထီၣ်အါထီၣ် ယတၢ်သ့ တၢ်ဘၣ်ဒီး တၢ်ခွဲးတၢ်ယာ်တဖၣ် လၢယကအဲၣ်တၢ် အဂီၢ်န့ၣ်လီၤ’’ႉ အတၢ်ကတိၤအံၤ‚ ကထီဒါလိာ်သး သ့ၣ်သ့ၣ်ဒီး တၢ်လၢပညီနုၢ်ဆိကမိၣ်လီၤႉ ဘၣ်ဆၣ်‚ မ့ၢ်တၢ်လၢ အပာ်ဖျါထီၣ် အတၢ်နၢ်ပၢၢ်ထံၣ်ဆှံ လၢတၢ်အိၣ်အသးတဖၣ်အဖီခိၣ် န့ၣ်လီၤႉ
တၢ်အံၤ‚ လီၤပလိာ်သးဂ့ၤမးဒီး တၢ်မၢဖိစီၤပီလူးအတၢ်ထုကဖၣ်လၢ ပှၤစူၢ်က့ၤနာ်က့ၤတၢ်အသီတဖၣ် လၢသ့းစၤလနံအဂီၢ်န့ၣ်လီၤႉ ‘‘မ်ကစၢ်ဒုးအါထီၣ် သုတၢ်အဲၣ်လိာ်ကွံလိာ်သုသး‚ ဒီးသုတၢ်အဲၣ်ပှၤခဲလၢာ်အဂီၢ်လၢလၢပှဲၤပှဲၤ‚ ဒ်ပအဲၣ် အသိးန့ၣ်တက့ၢ်’’ (၁သ့း ၃း၁၂) ႉ အ၀ဲသိၣ်လိတ့ၢ်အ၀ဲသ့ၣ် ဘၣ်ဃးဒီး ကစၢ်ယ့ၣ်။း အဂ့ၢ်လံ‚ ဘၣ်ဆၣ် အ၀ဲဘၣ်ဟးထီၣ်ကွံာ်သတူၢ်ကလာ်‚ မ့ၢ်လၢ တၢ်တၢထီၣ်တၢလီၤ အဃိန့ၣ်လီၤ (မၤ ၁၇း၁-၉) ႉ ခဲအံၤလၢအတၢ်ပရၠာစးၢပူၤ‚ အ၀ဲဟ့ၣ်ဂံၢ်ဟ့ၣ်ဘါ အ၀ဲသ့ၣ် လၢကဆၢထၢၣ်ဂၢၢ်ကျၢၤ လၢအတၢ်စူၢ်တၢ်နာ်အပူၤ ဆူညါန့ၣ်လီၤ (၁ သ့း ၃း၇-၈) ႉ ဒီးအ၀ဲထုကဖၣ်လၢ ကစၢ်ကမၤအါထီၣ်အတၢ်အဲၣ် လၢပှၤခဲလၢာ်အဂီၢ် န့ၣ်လီၤႉ
ဖဲလၢတၢ်ကီတၢ်ခဲအကတီၢ်န့ၣ် အါစုအါဘျီ ပကဒူးကဒ့ၣ်တၢ်ဒီး သံကွၢ်တၢ်‚ ‘‘ဘၣ်မနုၤအဃိလဲၣ်’’ မ့တမ့ၢ် ပဆိကမိၣ် ‘‘ဘၣ်မနုၤအဃိ‚ တၢ်ဟဲဘၣ်ယၤလဲၣ်’’ န့ၣ်လီၤႉ ကျဲအဂၤတဘိလၢ ပကကွၢ်ဆၢၣ်မဲာ်ဆၢကတီၢ်ဒ်သိးအံၤတဖၣ်အဂီၢ်န့ၣ် ကမ့ၢ်၀ဲ ပကဃ့ကစၢ် ဒ်သိးကမၤအါထီၣ် အတၢ်အဲၣ်တၢ်ကွံ လၢပသးပူၤ‚ ဒီးမၤစၢၤပှၤ ဒ်သိးပကဟံးန့ၢ်ခွဲးယာ်အသီတဖၣ် လၢပကအဲၣ်ပှၤဂၤအဂီၢ်န့ၣ်လီၤႉ