ကသံၣ်သရၠာစးၣ်ကူစါဘၣ်ဃး တၢ်မၤဂ့ၤထီၣ်တၢ်ပာ်သူၣ်ပာ်သး‚ ကသံၣ်သရၠာစးၣ် ဘၣ်ဘရၠာစးၣ် ဟါ၀းဒ် စံး၀ဲလၢ‚ ‘‘တၢ်သ့ၣ်ညါဘၣ်ဃး တၢ်အဲၣ်လီၤဆီမ့ၢ် ဒီပုၢ်၀ဲၢ်တၢ်ြပၢလိာ်သးအပူၤ တၢ်ဂ့ၢ်အဒိၣ်ကတၢၢ်အကျါတမံၤန့ၣ်လီၤႉ’’ တၢ်အဒိအံၤ လီၤဂာ်လၢ လံာ်စီဆှံအလီၢ်လံၤအပူၤ စီၤယိၤသး လၢအပၢ်အဲၣ်ဒိၣ်ကတၢၢ်ဖိခွါဒီး တၢ်အံၤ ဒုးသးဒိၣ်ထီၣ် အ၀ဲၢ်အဒိၣ် တဖၣ်န့ၣ်လီၤ (၁မိၤ ၃၇း၃-၄) ႉ အဃိ အ၀ဲၢ်သ့ၣ်တဖၣ် ဆါလီၤ စီၤယိၤသး ဆူပှၤကၤတၢ်ဖိတဖၣ်လၢ အလဲၤဆူ ကီၢ်အဲၤကူပတူးဒီး မၤဖျါ၀ဲ ဒ်ဆၣ်ဖိကီၢ်ဖိမၤသံအီၤအသိးန့ၣ်လီၤ (၃၇း၁၂-၃၆) ႉ အ၀ဲ အတၢ်မံမီၢ်သ့ၣ်တဖၣ် ဟးဂီၤကွံာ်ဒီးခါဆူညါ ဒီးဖျါလၢအတၢ်မုၢ်လၢ်တဖၣ် ဟါမၢ်ကွံာ်၀ဲန့ၣ်လီၤႉ
ဘၣ်ဆၣ်သနာ်က့‚ လၢစီၤယိၤသးအသးသမူ အတၢ်လဲၤကျဲဒီဘိန့ၣ်‚ အ၀ဲဃုထၢ လၢကတီဒီးအကစၢ်ယွၤ ဒီးသန့ၤအသးလၢအီၤ ဖဲလၢအတၢ်အိၣ်အသးတဖၣ်အၢသီအခါဒၣ်လဲၣ်န့ၣ်လီၤႉ ဖဲလၢအဘၣ် တၢ်ပာ်ဒ့ၣ် ပာ်ကမၣ် လၢအကစၢ်အမါ ဒီးဘၣ်တၢ်ထၢနုာ်လၢဃိာ်ပူၤ လၢတၢ်ကမၣ် လၢတမၤ ၀ဲဒၣ်အခါ‚ စီၤယိၤသး ဂဲၤပျုၢ်လၢ အတၢ်အိၣ်သး တၢ်တတီတလိၤတဖၣ် သနာ်က့ နာ်၀ဲကစၢ်ယွၤဒံးလီၤႉ
နံၣ်သ့ၣ်တဖၣ်ပူၤကွံာ်ဖဲန့ၣ်‚ အ၀ဲၢ်တဖၣ်ဟဲဆူ ကီၢ်အဲၤကူပတူး ဒ်သိး ကပရၤ တၢ်အီၣ် ဖဲလၢတၢ်သၣ်၀ံၤလီၤဒိကတီၢ်န့ၣ် အ၀ဲသ့ၣ်ပျံၤတၢ်ဖုးတၢ် မ့ၢ်လၢသ့ၣ်ညါဘၣ်၀ဲလၢအပုၢ်လၢအစူးကွံာ်တ့ၢ်၀ဲတဂၤ‚ အခဲအံၤကဲထီၣ် ပဒိၣ်ဖးဒိၣ်အဃိန့ၣ်လီၤႉ ဘၣ်ဆၣ် စီၤယိၤသးစံးအ၀ဲသ့ၣ်‚ ‘‘ဒီးခဲကနံၣ်အံၤ သုသုတသးအုးတဂ့ၤ‚ ဒီးသုသုတသးထီၣ်လီၤ သုသး လၢသုဆါကွံာ်ယၤဖဲအံၤအဃိတဂ့ၤႉ အဂ့ၢ်ဒ်အံၤ‚ ယွၤမၢယလဲၤလၢသုမဲာ်ညါ ဒ်သိးယကဒုးပူၤဖျဲးပှၤအသးသမူန့ၣ်လီၤ ႉႉႉဒီးခဲကနံၣ်အံၤ သုမၢယဟဲဖဲအံၤတမ့ၢ်ဘၣ်ႉ မ့ၢ်ယွၤလီၤႉ’’ (၄၅း၅‚၈)
စီၤယိၤသး အတၢ်အဲၣ်တၢ်ကွံအတၢ်ကတိၤတဖၣ်အံၤ ဒုးမိၣ်သ့ၣ်ညါဘၣ် ယသးဒိၣ်ဒိၣ် လၢမ့ၢ်ယအိၣ်ကတဲာ်ကတီၤယသး လၢတၢ်ဟ့ၣ်ကၣ်အဂီၢ်လံဧါ‚ မ့တမ့ၢ် မ့ၢ်ယကစံးဘျုးစံးထီၣ်ပ့တၢၤယွၤ မ့ၢ်လၢယသးပူၤ ယနာ်န့ၢ်ကစၢ်ယွၤအဃိလံဧါ အဂ့ၢ်န့ၣ်လီၤႉ